Мэкъуогъум и 9 — 12-м къалэу Бытырбыф шыхэм язэнэкъокъу щыкIуагъ. Шыхэм ядунэе къэгъэлъэгъонэу «Иппосфера» зыфиIорэр мыгъэ я 24-рэ илъэсэу зэхащагъ. Шыу Хасэмрэ къэшъокIо купэу «Абрекхэмрэ» Адыгеир зэIукIэ иным къыщагъэлъэгъуагъ.

Шы лъэпкъ зэфэшъхьафхэм ядэхагъэ, кIуачIэу ахэлъыр, язекIуа­кIэхэр зыфэдэхэр къагъэлъэгъоныр ягухэлъэу Урысыемрэ IэкIыб къэралыгъо благъэхэмрэ яшахъохэр гъэмафэр къызэрихьэу Бытырбыф щызэфэсых. Мыгъэрэ Иппосферэм шы 200, лъэпкъ 20 хъухэу, шэхъо нэбгыришъэ, ахэм якъэгъэлъэгъонхэм яплъыгъэ нэбгырэ минипшI къекIолIагъ. Адыгэшыр мы къэгъэлъэгъоным республикэ Шыу Хасэм ишIуагъэ­кIэ яплIэнэрэ илъэс хъугъэу хэлажьэ. Мыгъэ Бытырбыф шибгъу ащагъ. Адыгеимрэ Къэрэщэе- Щэрджэсымрэ шы щырыщ, Къэ­бэртэе-Бэлъкарым шитIу, Краснодар краим зы къарыкIыгъ. Къэ­бэртэе лъэпкъыкIэ алъытэрэ Щагъди — адыгэшым — илъэтегъэуцо мафэ къэс пчэгум щы­кIуагъ. Тикъэгъэлъэгъон цIыфыбэмэ ашIогъэшIэгъоныгъ. Адыгэ шъуашэхэр зыщыгъ, къамэхэр зыголъ шыухэм яплъынэу зэкIэри фэягъ. Адыгэшыр нэмыкIхэм къа­хэзыгъэщырэр ыкIуачIэрэ ипытагъэрэ. Ар дэгъоу тишыухэм къагъэлъэгъуагъ, джащ фэдэу шымрэ шыумрэ азыфагу илъ гуфэбагъэр, зэпхыныгъэу яIэр къахэщыпэу, ашъхьэ лъагэу Iэтыгъэу Шыу Хасэм щыщхэр пчэгум итыгъэх.

Адыгеим и ЛIышъхьэ шыхэм якъэгъэлъэгъон хэлэжьэнэу кIуагъэхэм социальнэ хъытыухэмкIэ зафигъэзагъ, гъэхъагъэхэр ашIынхэу афэлъэIуагъ. «Адыгэшым идэхагъэрэ илъэшыгъэрэ зэращышъумыгъэгъупшэрэмкIэ тышъу­фэраз, Iофэу шъузыпылъыр Iофышху. Шъуинасып къерэхь!» — къытхыгъ КъумпIыл Мурат.

Къыхэзгъэщын, Адыгэ Респуб­ликэм илIыкIохэм зэIуахыгъэ хьа­кIэщыр Iухьэ-IукI зэпытыгъ. Адыгэ пщынэ макъэм цIыфхэр къырищалIэщтыгъэх. КъэшъокIо купэу «Абрекхэм» лъэпкъ культурэр Бытырбыф зэIукIэм къыщагъэлъэгъуагъ. Джащ фэдэу Iэпэ­Iасэхэм яIэшIагъэхэр къэгъэлъэгъоным ащэгъагъэх. А зэпстэур Иппосферэм иIофтхьабзэхэм къахэ­лы­дыкIэу, дахэу зэгъэкIугъэу хъугъэ.

Шы лъэпкъэу Иппосферэм кIуа­гъэхэм азыфагукIэ зэнэкъокъу 11 щыIагъ. Адыгэшхэр пштэмэ, чемпионыцIэр къэзыхьыгъэр Къэрэщэе-Щэрджэсым ит къуаджэу ПсэукIэ-Дахэ къикIыгъэ Налмэсыр ары. Шахъор – КIэдыкIое Замрэт. Ащ фэдэу зыщыщ лъэпкъхэм къа­хэщыгъэхэу, апэрэ чIыпIэр зэкIэмкIи шы 14-мэ афагъэшъошагъ. Ахэм язэнэкъокъу шъхьаIэ текIоныгъэ къыщыдэзыхыгъэр буденновскэ шы лъэпкъхэм ащыщ. Тэ ти Налмэс цIыфхэм яшIухьафтын къыфагъэшъошагъ.

ТIэшъу Светлан.