ЗыкI къэралыгъо реестрэм хагъэхьагъ
Къэралыгъо программэу «Шъолъырхэм ягъэнэфэнкIэ лъэпкъ системэу щыIэр» зыфиIорэр Адыгэ Республикэм игъэкIотыгъэу щагъэцакIэ.
ЧIыгу Iахьхэмрэ мыкощырэ мылъкумрэ афэгъэхьыгъэ къэбархэр реестрэм итхэгъэнхэм а программэр афэIорышIэ. ЖъоныгъокIэ мазэм къыкIоцI Адыгэ Республикэм ишъолъыр 22-рэ къыхагъэщыгъ ыкIи ахэм ягъунапкъэхэр агъэнэфагъэх, нэужым ЗыкI къэралыгъо реестрэм щатхыгъэх.Шъолъырым хэхьэх гъунапкъэхэу чIыгур зыщагъэпсэолъэщт ыкIи псэолъэшI Iофхэр зыщагъэцэкIэщт чIыпIэхэр.
Ащ фэдэ шъолъырхэм къагъэлъагъо чIыгу Iахьхэр зэрэщыбгъэфедэнхэ плъэкIыщтхэр, джащ фэдэу унэхэр атепшIыхьащтхэмэ. Зы чIыгу Iахьыр зы шъолъырым тетын фае, ау линейнэ объекткIэ алъытэхэрэ Iахьхэр ащ хахьэхэрэп.
«ЧIыпIэ зыгъэIорышIэжьыпIэхэр ары чIыгу Iахьхэр зыхэхьэхэрэ шъолъырхэр къэзгъэнафэхэрэр, сыда пIомэ ахэр къэбарым нахь щыгъуазэх, ащ дакIоу зэIухыгъэ едэIунхэм язэфэхьысыжьи къыдалъытэ. Къэлэгъэпсын документмэ къагъэнафэ псэолъэшI Iофхэр щыбгъэцэкIэнкIэ фитыныгъэ зыщыряIэ шъолъырхэу ежьежьырэу агъэпсэолъэн алъэкIыщтхэр, джащ фэдэу фитныгъэ къызаратырэ ужым агъэпсэолъэшъущтхэри. Ащ фэдэ шапхъэхэр зыкIагъэнэфагъэхэр а чIыпIэхэм цIыфхэм зи къащямыгуаоу, гупсэфэу ащыпсэунхэм фэшI», — къыIотагъ Роскадастрэм Адыгэ РеспубликэмкIэ и ГъэIорышIапIэ ипащэу ХъуакIо Аюбэ.
Шъолъыр гъунапкъэмэ якъэбар ЕГРН-м итхэгъэным фэшI документхэу ащ фэгъэзэгъэ къулыкъухэм къатыхэрэр агъэфедэ. Документхэр электроннэ шIыкIэм тетэу XML форматымкIэ агъэхьых ыкIи аIапэхэр электроннэу акIадзэх. Гъунапкъэхэу шъолъырыр зыдэщыIэр къизыIотыкIыхэрэ графическэ тхыгъэр шIокI имыIэу а документмэ ягъусэнхэ фае. IофшIэгъу мэфэ 15-м къыкIоцI шъолъыр гъунапкъэхэм афэгъэхьыгъэ къэбарыр ЕГРН-м ратхэ, ар документыр къызаIэкIэхьэгъэ мафэм къыщыублагъэу агъэцакIэ.
Шъолъыр гъунапкъэхэр нафэ къызыхъухэрэм ахэр Публичнэ кадастровэ картэм иплъэгъонхэ плъэкIыщтых ЕГРН-м къытырэ тхьапэмкIэ шъолъыр гъунапкъэхэм афэгъэхьыгъэ къэбарыр джащ фэдэу зэбгъэшIэшъущт. Ащ пае МФЦ-м зыфэбгъэзэн плъэкIыщт е электроннэ шIыкIэмкIэ сервисэу Росреестрэм исайт къызфэбгъэфедэшъущт, нэмыкI шIыкIэхэри щыIэх.
«Къэралыгъо программэу «Шъолъырхэм ягъэнэфэнкIэ лъэпкъ системэу щыIэр» зыфиIорэр республикэм зэрэщыдгъэцакIэрэм изы Iахь ЕГРН-р шъолъыр гъунапкъэхэм- кIэ зэрэтыушъэрэр, ащ ишIуагъэкIэ чIыгухэр зэрагъэфедэрэм идэгъугъэ зыкъиIэтыщт, Адыгэ Республикэм иэкономикэ хэхъоныгъэхэр егъэшIыгъэным фэIорышIэщт», — къыIотагъ Росреестрэм Адыгэ РеспубликэмкIэ и ГъэIорышIапIэ ипащэ ипшъэрылъхэр зыгъэцэкIэрэ ЕмыкI Мариет.