Амыгъэкощырэ мылъкум итхын
Электроннэ шIыкIэм тетэу «амыгъэкощырэ мылъку хъызмэтым» епхыгъэ къагъэхьыгъэ документ мини 6 фэдиз зэхафыгъах ыкIи атхыгъах.
2023-рэ илъэсыр къызихьагъэм къыщыублагъэу зэкIэмкIи документ 6451-мэ ахэплъагъэх, ахэр атыгъэх ыкIи регистрациер арагъэкIугъ.
ЗэкIэ «амыгъэкощырэ мылъку хъызмэтыр» охътабэ темышIэу ябгъэтхыныр, документ пыплъхьаныр нахь Iэрыфэгъу зыхъугъэр 2022-рэ илъэсым ижъоныгъуакIэ мазэ щегъэжьагъ. Амыгъэкощырэ мылъку хъызмэтыр — ар унэу зычIэсхэр, унэ псэупIэхэр (фэтэрхэр, унэ хэхыгъэхэр), чъыгхатэмэ адэт унэхэр, нэмыкI псэуалъэхэр (унэе гаражхэр, хъызмэтым тегъэпсыхьэгъэ унэхэр, къакъырхэр), кIэкIэу къэпIон хъумэ, цIыфыр зыщыпсэурэ чIыпIэм къешIэкIыгъэ мыкощырэ мылъкур зэкIэ ащ къыхеубытэ.
«Амыгъэкощырэ мылъкум итхын апшъэрэ Iофэу ГъэIорышIапIэм ыгъэцакIэхэрэм ащыщ. Охътабэ тетымыгъэкIуадэу псэуалъэхэр учетым хэтэгъэуцох», — къыхигъэщыгъ Росреестрэм Адыгэ РеспубликэмкIэ и ГъэIорышIапIэ ипащэ ипшъэрылъхэр зыгъэцакIэрэм.
Къэралыгъо регистрациер пкIуным пае электроннэ шIыкIэр къызфэбгъэфедэн плъэкIыщт. Ащ пае интернетым ухэхьан ыкIи электроннэ шIыкIэмкIэ пIапэ кIэбдзэжьыгъэу щытын фае. Росреестрэм иэлектроннэ фэIо-фашIэхэр сервисхэу интернет-портал Росреестра ыкIи единый портал государственных услуг зыфиIорэм къегъэнафэх.
Джырэ уахътэм Росреестрэм ипортал сервис 30 фэдиз хэт, хахьэхэрэм ахэр хагъотэнхэ алъэкIыщт. ГущыIэм пае, амыгъэкощырэ мылъкум къэралыгъо регистрациер егъэкIугъэныр ыкIи ащкIэ фитыныгъэу иIэхэр гъэнэфэгъэнхэр; мыкощырэ мылъкур учетым хэгъэуцогъэныр; ЕГРН-р къыдэхыгъэныр ыкIи нэмыкIхэр.
Электроннэ шIыкIэр бгъэфедэмэ шIуагъэу къытыхэрэр:лъэIу тхылъыр птыным пае МФЦ-м укIон ищыкIагъэп, ар узыщыфэе уахътэм бгъэцэкIэшъущт; чэзыу зэримыIэр, уахътэр къызэрэбгъэнэжьыщтыр.