Урысые Iофтхьабзэу «Тэ — Урысыем тырицIыф» зыфиIорэм те­гъэпсыхьагъэу респуб-ли­кэм иправительствэ зычIэт Унэм Адыгеим щыщ ныбжьыкIэхэу зыныбжь илъэс 14 хъугъэ­хэм ­Адыгеим и ЛIышъхьэу КъумпIыл Мурат пас­портхэр щаритыжьыгъэх. Мы Iофтхьабзэм хэлэжьагъэх федеральнэ инспектор шъхьаIэу Сергей Дрокиныр, АР-м гъэсэныгъэмрэ шIэны­гъэмрэкIэ иминистрэ ипшъэрылъхэр зыгъэца­кIэу Евгений Лебедевыр, ны-тыхэр.

Документ шъхьаIэр къа­щаIахыжьыным иамал ара­тыгъ еджапIэхэм ащызэхащэгъэ олимпиадэ ыкIи спорт зэнэкъокъубэхэм текIоныгъэр къащыдэзы­хыгъэ кIэлэ­еджэкIо 12-мэ. Урысыем ицIыф ныбжьыкIэхэм шIуфэс къарихызэ Адыге­им и ЛIышъхьэ къызэрэхигъэщыгъэмкIэ, къэралыгъо мэфэкI анахь шъхьаIэхэм зыкIэ ащыщым — Урысыем и Мафэу мэкъуогъум и 12-м хагъэунэфыкIырэм ехъу­лIэу паспортхэр къараты­жьых.

«Паспортыр къызышъуа­тыжькIэ, Урысыем инэ­мыкI цIыфхэм афэдэ фитыны­гъэхэр шъори шъуиIэ мэхъух. Ащ къикIырэр тихэгъэгу игражданин шъып­къэу шъущытын зэрэфаер ары. НэмыкI цIыфхэм яфитыныгъэхэмрэ яшъхьафитыныгъэхэмрэ лъы­тэ­ны­гъэ афэшъушIын, нахьыжъхэм шъуафэгумэкIын, ты­къэ­зыуцу­хьэрэ дунаир къэ­шъуухъу­мэн, шъуи Хэгъэгу иухъумакIоу шъущытын, шъуигупсэ респуб­ликэмрэ, джащ фэдэу цIыф лъэпкъыбэ зыщыпсэурэ Урысыемрэ ятарихърэ якультурэрэ лъытэныгъэ афэшъушIын фае», — къы­Iуагъ КъумпIыл Мурат. Республикэм и ЛIышъхьэ анахьэу къыхигъэщыгъэр Урысыер джыри нахь зэтегъэпсыхьагъэ хъуным, цIыф лъэпкъыбэ зыщыпсэу­рэ къэралыгъом ыкIуачIэ нахь пытэным апае ыпэкIэ щыIэгъэ лIэужхэр зышъхьа­мысыжьхэу зэрэлэжьагъэ­хэр ары. Адыгеим и ЛIы­шъхьэ къызэриIуагъэмкIэ, непэрэ лIэужхэми ятэжъхэм яхэбзэ шIагъохэр лъа­гъэкIотэнхэ фае.

«Непэ тэ, нахьыжъхэм, республикэмрэ хэгъэгумрэ янепэрэ мафи, якъэ­кIощт­ри тэгъэпсы. Шъо­ры­рэ шъуилэгъухэмрэ ары Адыгеимрэ Урысыемрэ зыщыгугъхэрэр. Гъэхъэгъа­кIэхэм ренэу шъуафакIу, шъуигупсэхэмрэ къышъу­пэблагъэхэмрэ кIэгъэкъон цыхьэшIэгъоу шъуряI ыкIи шъуи Родинэ ренэу шIу шъулъэгъу», — къыIуагъ КъумпIыл Мурат.

КIэлэеджакIохэм ащыщ­хэу Урысыем ицIыф зэрэ­хъугъэхэр къэзгъэшъып­къэжьрэ паспортхэр непэ къаратыгъэх Алиса Зоринам (МыекъуапэкIэ гурыт еджапIэу N 10-р), Антон Шубнэм (МыекъуапэкIэ гурыт еджапIэу N 3-р), Арина Хьакуамэ (Адыгэ­къалэкIэ гурыт еджапIэу N 2-р), София Черновам (Джэджэ районымкIэ гурыт еджапIэу N 6-р), Темрыкъо Бэллэ (Тэхъутэмыкъое районымкIэ гурыт еджапIэу N 1-р), Алина Бугайчук (Красногвардейскэ районымкIэ гурыт еджапIэу  N 15-р), Вэрэкъо Рустам (Кощхьэблэ районымкIэ гурыт еджапIэу N 10-р), Валерия Мирошниченкэм (Мыекъопэ районымкIэ гъэсэныгъэ зыщарагъэгъо­тырэ гупчэу N 3-р), Леонид Гусевым (Мыекъопэ районымкIэ гъэсэныгъэ зы­щарагъэгъотырэ гупчэу N 4-р), Мэкъуао Бэллэ (Шэуджэн районымкIэ гурыт еджапIэу N 1-р), Тхьаркъохъо Рузаннэ (Теу­цожь районымкIэ гурыт еджапIэу N 6-р), Тыу Аннетэ (къалэу Мыекъуапэ- кIэ Адыгэ республикэ гимназиер).

«Адыгеир къышъорэгу­шхо ыкIи къышъущэгугъы. Джыри зэ сышъуфэгушIо паспортхэр къызэрэшъуатыжьыгъэхэм ыкIи къэблэгъэрэ мэфэкIым — Урысыем и Мафэ афэшI!», — къыIуагъ КъумпIыл Мурат кIэлэеджакIохэм закъыфигъазэзэ.

Паспортхэр заретыжьхэ нэуж Адыгеим и ЛIышъхьэ кIэлэеджакIохэм гущыIэгъу афэхъугъ, гухэлъхэу яIэхэр къаригъэIуагъ, джащ фэдэу гъэсэныгъэ тапэкIи республикэм щызэрагъэгъотынымкIэ, яшIоигъоныгъэхэр къадэхъунхэмкIэ тишъо­лъыр амалэу иIэхэм афэгъэхьыгъэу къыIотагъ.

Алиса Зоринамрэ ащ ятэу Алексей Зоринымрэ Урысые зэнэкъокъоу «Большая перемена» зыфиIорэм икIэуххэм ялъытыгъэу «Москва — Владивосток» гъогур зэпачын алъэкIыным епхыгъэ Iоф­тхьабзэмкIэ IэпыIэгъу къы­зэрафэхъугъэм пае рес­публикэм и ЛIышъхьэ зэрэфэразэхэр къаIуагъ. Пшъэшъэжъыем КъумпIыл Мурат ригъэблэгъагъ Iоныгъом и N 1-м яеджапIэ шIэныгъэм и Мафэу щыкIощтым къэ­кIонэу. Амал иIэ зы­хъукIэ еджэпIэ мэфэкIым къэ­кIонэу рес­пуб­ликэм и ЛIышъхьэ ар ыгъэгу­гъагъ.

Республикэм гъэсэныгъэ Iофыр нахь дэгъоу щызэхэщэгъэным епхыгъэ Iо­фыгъохэм ыкIи ренэу кIэлэцIыкIухэм ынаIэ зэ­рэтыригъэтырэм апае КъумпIыл Мурат зэрэфэразэхэр ны­-ты­хэм къаIуагъ.

Мыщ дэжьым къыхэгъэ­щыгъэн фае: Iоф­тхьабзэм хэлажьэрэ пэпчъ паспортымрэ шIуфэс тхы­лъэу къыратыгъэмрэ анэмыкIэу республикэм и ЛIышъхьэ ыцIэкIэ шIухьафтын лъапIэ — планшет къыратыгъ. ЗэIукIэгъум икIэухым Къум­пIыл Мурат кIэлэ­еджакIохэм афэлъэIуагъ псауныгъэ пытэ яIэнэу, гъэхъэгъакIэхэр ашIынхэу, шIоу щыIэр къадэхъунэу.

АР-м и ЛIышъхьэ ипресс-къулыкъу