Мы мэфэкIыр Урысыер къызыхъу­гъэ мафэу зэрэщытым дакIоу, къэралыгъом игушхоныгъэ ыкIи илъытэныгъэ зыщаIэтырэ маф. Лъэпкъхэм язэгурыIоныгъэ, языкIыныгъэ ятамыгъэу щыт, Урысыем къырыкIощтымкIэ пстэуми пшъэдэкIыжь зэрэтхьырэр ащ тыгу къегъэкIыжьы. Анахь зыщымырэхьат уахътэу джыдэдэм тызыхэтым Урысыем щыпсэурэ цIыф лъэпкъ зэфэшъхьафыбэр зэрэзэ­къоуцуагъэм зыкIыныгъэ зыхэлъ къэралыгъошхоу тызэрэщытыр зэрэдунаеу шыхьат къафишIыгъ. Зыфэдэ къэмыхъугъэ кIэн ыкIи лIэшIэ­гъухэм къапхырыкIыгъэ тарихъ зиIэ ти­къэралыгъо ишъхьафитыныгъэ къы­гъэнэным пчъагъэрэ фэбэнагъ. А тарихъ баир джы къыткIэхъухьэхэрэм зэралъыд­гъэIэсыщтым, ар зэрэлъыдгъэкIотэщтым тыпылъыщт. Урысыем и Мафэ ипэгъокIэу респуб­ликэм щыпсэурэ ыкIи щеджэрэ ныбжьыкIэхэм ащыщхэм гущыIэгъу тафэхъугъ. Ахэм мэфэкIым еплъыкIэу фыряIэм зыщыдгъэгъозагъ. ГъукIэлI Нурбый, АР-м инахьыжъхэм я Совет ­итхьамат: — Урысыем щыхагъэунэфыкIырэ мэфэкIхэм уахаплъэмэ, мыр анахь ныбжьыкIэхэм ащыщ. Илъэс 31-м къыкIоцI зэблэхъугъэр макIэп, тикъэралыгъо илъ щыIэкIэ-псэукIэр нахьышIу хъузэ тыкъырэкIо. Хэгъэгум ыпэ илъыр бэ, пшъэрылъышхохэр зыфегъэуцужьых. Джы ахэр зыпшъэ илъыщтыр, зэшIозыхыщтхэр ныбжьыкIэхэр арых. Тигуапэ мэфэкIым имэхьанэ къагурыIозэ, ныбжьыкIэхэр чанэу ащ ихэгъэунэфыкIын зэрэхэла­жьэхэрэр. Урысыем инеущырэ мафэ зэрэпытэщтым, тэ нахьыжъхэм, тицы- хьэ телъ. Тыгъужъ Фатим, Мыекъопэ къэралыгъо технологическэ университетым икIэлэегъадж: — Урысыем и Мафэ цIыфхэр зэфэзыщэхэрэ мэфэкI. Тикъэралыгъо дунаим чIыпIэу щиубытырэр ащ тыгу къегъэ­кIыжьы. Лъэпкъ зэфэшъхьафыбэу щы­псэу­хэрэр зэрепхых, зыкIыныгъэ къахелъхьэ. Ащ дакIоу, мэкъуогъу мэфэ фабэм тыгукIэ къытпэблэгъэ цIыфхэм таIукIэным иушъхьагъу. Ниныхъу Светлан, кIэлэцIыкIу IыгъыпIэм иIофышI: — Илъэс къэс тиунагъокIэ хабзэ зэ­рэтфэхъугъэу, мэфэкIым ихэгъэунэфыкIын тыхэлажьэ. Сишъхьэгъусэу Андрейрэ сэррэ кIалэрэ пшъашъэрэ зэдэтэпIу. ЦIыфым ицIыкIугъом къыщегъэжьагъэу ихэгъэгу итарихъ ебгъэшIэнэу щыт. ЗэрэтфэлъэкIэу лъэпкъ зэфэшъхьафэу къэралыгъом, тиреспуб­ликэ ащыпсэухэ­рэм зэгурыIоныгъэр зэрагъэ­пытэрэр, быракъым, гимным, гербым якъэбархэр къафэтэIуатэ. Мы илъэсми щыIэщт Iоф­тхьабзэхэм тигуапэу тахэлэжьэщт. Iэшъынэ Сусан.