Адыгеим 2024-рэ илъэсым щызэтырагъэпсыхьащт общественнэ чIыпIэхэм якъыхэхын фэгъэхьыгъэ рейтинг мэкъэтыныр ыкIэм фэкIуагъ. Республикэм щыпсэурэ нэбгырэ мин 36,5-м ехъу мыщ хэлэжьагъ.

Лъэпкъ проектэу «Iэрыфэгъу къэлэ щыIакIэр гъэпсыгъэныр» зыфиIорэм ишIуагъэкIэ къэкIощт илъэсым псэупIэ инхэм къахиубытэрэ чIыпIищ зэтырагъэпсы­хьащт.

Мыекъуапэ ибульварэу «ТекIоныгъэм ия 55-рэ илъэс» зыфиIорэр, ИнэмкIэ – Зэкъошныгъэм иплощадь агъэцэкIэжьыщтых, Яблоновскэ иурамэу Титовым ыцIэ зыхьырэм иунэу 68/1-м къыхиубытэрэ спорт площадкэр зэтырагъэпсыхьащт.

Iэрыфэгъу щыIакIэр гъэпсыгъэнымкIэ Адыгеим икъалэхэм ыкIи икъуаджэхэм ащагъэцэкIэрэ IофшIэным мыр изы Iахь ныIэп. ТапэкIэ республикэм псэолъакIэхэр щашIынхэр, чIыпIэхэр нахьыбэу щызэтыра­гъэпсыхьанхэр гухэлъхэм ащыщых.