Хэгъэгумрэ республикэмрэ ялIыкIо анахь дэгъухэм къэралыгъо тын­хэр афэгъэшъошэгъэнхэм епхыгъэ Iофтхьабзэр Адыгэ Республикэм и Къэралыгъо филармоние непэ  щыкIуагъ.

Мы Iофтхьабзэр къызэIуи­хызэ Адыгеим и ЛIышъхьэу Къум­пIыл Мурат къыхигъэщыгъ Адыгеимрэ Урысыемрэ яхэхъоныгъэ мыщ къыщызэIукIагъэхэм яIахьэу хашIыхьагъэм ыкIи тихэгъэгу икъэралыгъо мэфэкI анахь шъхьа­Iэхэм зыкIэ ащыщыр — Урысыем и Мафэ къызщыблагъэрэм тын лъапIэхэр ахэм зэраратыжьыгъэм мэхьэнэ гъэ­нэфагъэ зэриIэр.

«Тихэгъэгушхо нахь зэтегъэ­псыхьагъэ хъуным пае зыкIыныгъэм, уикъэралыгъо уфэшъып­къэн, гъэпсын IофшIэным нахь чанэу ухэлэжьэн зэрэфаем ятамыгъэу щыт мы мэфэ­кIыр. Урысыем кIуачIэу иIэр къэзытырэр ащ ицIыфхэр, зи­хэгъэгу гупсэ шIу зылъэгъухэ­рэр, ащ инепэрэ ыкIи икъэ­кIощт мафэкIэ пшъэдэкIыжь зэрахьырэр къызгурыIохэрэр ыкIи щыIакIэр на­хьышIу хъуным зышъхьамысыжьэу фэлажьэхэрэр ары», — къыIуагъ АР-м и ЛIышъхьэ.

Республикэм ипащэ къызэ­рэхигъэщыгъэмкIэ, Хэгъэгум уфэшъыпкъэу уфэлэжьэн зэрэфаемкIэ мыщ къекIолIагъэхэр щысэ шIагъоу щытых. Тын лъа­пIэр зыфагъэшъуашэрэ пэпчъ пшъэдэкIыжь ин зэрихьырэр къыгурэIо, экономикэм, социальнэ лъэныкъом хэхъоныгъэ ашIынымкIэ ишIуагъэ къегъакIо, джащ фэдэу цIыфхэр щынэгъончъэу псэунхэмкIэ амалэу щыIэр зэкIэ гъэфедагъэ хъуным ынаIэ тырегъэты.

«Ащ фэдэ цIыфхэр ары къэралыгъом гугъапIэу иIэхэр, хэ­гъэгур ыпэкIэ лъызгъэкIотэрэ кIуачIэр, лъэгэпIакIэхэм ар къа­фэзыщэрэр, уахътэм къыгъэуцурэ Iофыгъо къинхэм язэшIо­хын зышъхьамысыжьэу зыкIуачIэ фэзгъэIорышIэхэрэр. Урысыер непи ушэтын къинхэм яутэлIагъ. Ау хэгъэгум и Президентэу Владимир Путиным къызэриIуагъэмкIэ, «тикъэралыгъо ишъхьафитыныгъэ зыукъо­нэу фежьэрэ пстэуми Урысыем ис цIыфхэр зыкIыныгъэ ахэ­лъэу апэуцужьых, ячIыгу гупсэ зы­шъхьамысыжьэу къаухъумэ», — къыIуагъ КъумпIыл Мурат.

ХэушъхьафыкIыгъэ дзэ операцием хэлэжьэрэ тидзэкIолIхэм ялIыхъужъныгъэ, зэрифэшъуа­шэу япшъэрылъ лъапIэ зэрагъэ­цакIэрэр, хэгъэгум ыпашъхьэ гущыIэ пытэу щатыгъэр къагъэ­шъыпкъэжьынымкIэ лIыхъужъныгъэ зэрэзэрахьэрэр ащ къыхигъэщыгъ. Тын лъапIэхэр зыфагъэшъошагъэхэм ащыщых хэушъхьафыкIыгъэ дзэ операцием зипшъэрылъ лъапIэ щызгъэцакIэхэрэр.

«Урысыем ичIыпIакIэхэр къау­хъумэхэзэ лIыхъужъныгъэрэ псэемыблэжьныгъэрэ зезыхьэгъэ нэбгы­рэ пэпчъ Урысые Фе­дерацием икъэ­ралыгъо тын лъапIэ къыфагъэшъошагъ. НепэкIэ заом хэлэ­жьэрэ пстэури лIы­хъужъ шъыпкъэу плъы­тэн плъэкIыщт», — къыIуагъ респуб­ликэм и ЛIышъхьэ.

Шъхьафэу къыхагъэщыгъэх врачхэр ыкIи медицинэ сестрахэр, шIокI зимыIэ медицинэ страхованием, санитарнэ лъыплъэным алъэныкъокIэ Iоф зышIэхэрэр, кIэлэ­егъаджэхэр ыкIи социальнэ IофышIэхэр.

Къэралыгъо гъэIорышIэным, мэкъу-мэщым, промышленностым ыкIи нэмыкI отраслэхэм ащылажьэхэрэм, экономикэмрэ социальнэ лъэныкъомрэ гъэ­хъагъэ хэлъэу ыпэкIэ лъыкIо­тэнхэм иамал къэзытырэ, рес­публикэм ис цIыфхэм ящыIакIэ нахьышIу хъунымкIэ зишIуагъэ къэзгъэкIорэ пстэуми зэрафэразэр ащ къыхигъэщыгъ.

«Iофэу шъушIэрэмрэ шъуиIэпэIэсэныгъэрэ, тигупсэ респуб­ликэ ыкIи хэгъэгум щыIакIэу арылъым джыри нахь зыкъы­Iэтыным шъузэрэфэхьазырым апае зэкIэми сызэрэшъуфэразэр къэсэIо. Тызэгъусэу лъэпкъ гухэлъ лъагэу тиIэхэм танэсыщт, урысые къэралыгъор джыри нахь дгъэпытэщт, текIоныгъа­кIэ­хэмрэ гъэхъагъэхэмрэ лъэ­псэшIу афэтшIыщт. Пшъэрылъэу тиIэр бэ. ТIэ зэкIэдзагъэмэ, ты­зэгурыIомэ, бэ къызэрэддэ­хъущтым сицыхьэ телъ», —- къыIуагъ республикэм ипащэ.

АР-м и ЛIышъхьэ ипресс-къулыкъу