ЖъоныгъуакIэм ыкIэм къыщегъэжьагъэу ощх зэпымыоу Адыгеим ичIы­пIэхэм къащещхыгъэм къыздихьыгъэ гумэкIыгъохэр Кощхьэблэ ыкIи Мыекъопэ районхэм япсэупIэхэм зэращыдагъэзыжьыгъэхэр «Адыгэ макъэм» зэригъэшIагъ.

АР-м и ЛIышъхьэу КъумпIыл Мурат пэ­щэныгъэ зыдызэри­хьэгъэ опера­тивнэ штабхэм Iо­фышхо ашIагъ. УФ-м ошIэ-дэмышIэ IофхэмкIэ и Министерствэ АдыгеимкIэ и ГъэIорышIапIэ икъулыкъушIэхэм зэпыу ямыIэу чIыпIэ къин ифэгъэ псэупIэхэм ащыIэхэу къэгъэ­нэжьынгъэцэ­кIэжьын IофшIэнхэр зэрахьагъэх. Къыхэгъэщыгъэн фае, мы районхэм ащы­псэухэрэр зэрэзэде­Iэжьыгъэхэм имызакъоу, цIыф­хэм ягумэкIыгъо идэгъэзыжьын къыхэлажьэхэ ашIоигъоу нэ­мыкI районхэм къа­рыкIыхи цIыфыбэ къафэкIуагъ, чIыпIэ къин ифагъэхэм ящыкIэгъэ IэпыIэ-гъур арагъэгъотыгъ.

АР-м граждан зыкъэухъумэжьынымкIэ ыкIи ошIэ-дэмышIэ IофхэмкIэ и Комитет иотделэу Кощхьэблэ районым щыIэм ипэ­щэ IэнатIэ зыгъэцэкIэрэ Тхьагъу Руслъан къызэрэтиIуагъэмкIэ, Фэдз ыкIи Вольнэ къоджэ псэу­пIэхэм ащыпсэурэ унэгъо 853-мэ псыр акIэхьагъ. Ахэм нэбгырэ 2454-рэ ащэпсэу, унэ 89-мэ псыр арыхьагъ. Ощхыпсым на­хьыбэу изэрар зэкIыгъэр Фэдз къоджэ псэупIэр ары.

Мы мафэхэм псыкъиуным иягъэ зэригъэкIыгъэ унагъохэм ящыIэныгъэ тIэкIу-тIэкIузэ зы­пкъ еуцожьы. Фэдз къоджэ псэупIэм ипащэу Лъоснакъ Рэмэзан къы­зэрэтиIуагъэмкIэ, псыр зэкIэ­кIожьыгъ. Унэ кIоцIхэр, щагухэр, урамхэр агъэкъэбзэжьыгъэх, ахэм ятIэу, мыжъоу, хэкIэу ате­лъыгъэр атырахыжьыгъ, псыр адащыгъ. Арэу щытми, чIычIэгъым джы псыр къычIэкIэу ригъэжьагъ, мы мафэм ехъулIэу унэгъуи 4-мэ ящагу псыр дэт. Ащ лъапсэ фэхъугъэр ощхыбэу къещхыгъэр ары, чIыгур цIынэ зэрэхъугъэм къыхэкIэу псыр икъоу чIым зыхищэрэп. Кощ­хьэ­блэ район администрацием ыкIи къоджэдэсхэм яIэпыIэгъукIэ мы уахътэм псэупIэу зигугъу къэтшIыгъэхэм ящагухэм псыр адэщыгъэным фэшI ар зэрэкIощт къуладжэр атIы. Ащ нэмыкIэу псырыкIуапIэхэр агъэкъабзэх.

ПэшIорыгъэшъэу къызэралъы­тагъэмкIэ, фермерхэм ячIыгу гектар 300-м ехъумэ псыр акIэ­хьагъ, лэжьыгъэхэр ыгъэкIодыгъэх.

— Комиссием хэтхэм унагъо­хэр къакIухьэзэ япсэупIэхэм фыкъуагъэу афэхъугъэхэр атхыгъэх. ЗэкIэмкIи псым изэрар унэгъо 662-мэ якIыгъ, ахэм ащыщэу унэ 70-мэ псыр ары­хьагъ. Мыхэм IэпыIэгъоу аратыщтыр зыфэдизыр джыри агъэ­нафэ. Псыр зиунэ ихьагъэ­хэу, чIыпIэ къин ифэгъэ цIыфхэм зэкIэми IэпыIэгъу агъотыщт, — къыIуагъ Рэмэзан. Къоджэ псэупIэм ипащэ къы­зэриIуагъэмкIэ, зашъохэрэ псыр цIыфхэм джыри аратыжьыгъэп, ащ къыхэкIэу псы къабзэр цIыф­хэм къафащэ. Ащ изытет ги­гиенэм ыкIи эпидемиологием и Гупчэу АР-м щыIэм мафэ къэс еуплъэкIу, ащ Iизын къызитыкIэ псыр цIыфхэм аIэкIагъэхьа­жьыщт.

Кужорскэ къоджэ псэупIэм ипащэу Владимир Крюковым къызэрэтиIуагъэмкIэ, зэкIэмкIи чIыгу Iахь 50-мэ псыр акIэхьагъ, уни 6 фэдизмэ псыр макIэу арыхьагъ. Псыр псынкIэу зэ­кIэкIожьыгъ ыкIи IэпыIэгъу зищы­кIагъэхэм арагъэгъотыгъ, ана­хьэу нэжъ-Iужъхэм.

КIАРЭ Фатим.