МэфэкIым ипэгъокIэу
Урысыем и Мафэ ипэгъокIэу Адыгеим ихьыкум приставхэм хэгъэгум зэрэфэшъыпкъэщтхэмкIэ тхьэлъанэ арагъэтыгъ.
Мыщ фэгъэхьыгъэ Iофтхьабзэм хэлэжьагъэх Мыекъуапэ ипащэу Геннадий Митрофановыр, хьыкум приставхэм якъулыкъу АдыгеимкIэ и ГъэIорышIапIэ щызэхэщэгъэ Общественнэ советым ипащэу Хъымыщ Казбек, Мыекъопэ ыкIи Адыгэ епархием идинлэжьэу Александр, Адыгеим ыкIи Краснодар краим я ДиндэлэжьапIэ имуфтий иIэпыIэгъоу Папэ Азэмат.
ЯIэнатIэ Iухьанхэм ыпэкIэ хьыкум пристав-гъэцэкIэкIо 12-мэ гущыIэ атыгъ УФ-м и Конституциерэ ихэбзэгъэуцугъэхэмрэ атетхэу, шъыпкъэныгъэ хэлъэу хьыкум пристав IофшIэныр зэрагъэцэкIэщтымкIэ.
Ащ ыуж нэбгырэ 30-м ехъумэ къалэжьыгъэ щытхъу тхылъхэмрэ бгъэхалъхьэхэмрэ къулыкъум ипащэу Александр Ихно аритыжьыгъэх.
КъулыкъушIэ ныбжьыкIэхэу гущыIэ зытыгъэхэм хьакIэу къекIолIагъэхэр къафэгушIуагъэх, пшъэдэкIыжьэу ателъыр къагурыIозэ тапэкIи Iоф ашIэнэу закъыфагъэзагъ.