Тикъэралыгъо ищынэгъончъагъэ къэухъумэгъэным фэшI 2022-рэ илъэсым Iоныгъом и 20-м къыщегъэжьагъэу частичнэ мобилизациеу Урысыем щырагъэжьагъэм къыхиубытэгъэ тидзэкIолIхэу илъэсны­къорэ къулыкъур зыхьыгъэхэм тхьамэфитIу зыгъэпсэфыгъо джы къа­ратыгъ.

Зыгъэ­псэфыгъо къэкIогъэ мобили­зованнэхэм ащыщэу Руслъан (ылъэкъуацIэ къыхэтыу­­тырэп, джыри ащ ыгъэзэжьыщт) гу­пшысэу зыдиIыгъхэмкIэ «Адыгэ макъэм» къыдэгощагъ.

— Руслъан, хэушъхьафыкIыгъэ дзэ операциер апэ зырагъажьэм бэхэм агъэшIэгъуагъ, ащыщхэр къэралыгъом икIыжьыгъэх. О сыдэущтэу ащ уеплъыра ыкIи ухэлэжьэнэу хъугъа?

— Урысыем и Главнокомандующэ иунашъокIэ мобилизациер Iоныгъо мазэм зырагъажьэм сэри сыхэфэнэу хъугъэ. Апэ дэкIыгъэхэм сащыщ ыкIи чъэпыогъум и 7-м «кIэпсэжъыем» зэпырыкIыгъэхэм сахэтыгъ. Къу­шъхьэ-штурмовой бригадэ­хэм ащыщ къулыкъур щысэхьы. Плъыр-стырыр зыщыкIорэ чIыпIэм пыимрэ тэрырэ псыхъоу Днепр тазыфагу. Анахь пшъэ­рылъ шъхьаIэу дгъэцакIэрэр пытапIэр ащ щытIыгъыныр ары.

Макъэ къызэрэсагъэIугъэм тетэу теубытагъэ хэлъэу сы­кIуагъ, зызгъэбылъэу сыхэтыгъэп. Хэти амал иIагъ апэрэ мафэхэм загъэбылъынэу, узхэр къызфаугупшысыжьынхэу, нэмыкI ушъхьагъухэр къагъо­тынхэу. Ухъулъфыгъэу, хэгъэгум уиIэпыIэгъу зэрищыкIагъэр пшIэзэ а зекIуакIэхэр сыдэущтэу къыпхэфэщтха? Къэралыгъом ыпашъхьэ пшъэдэкIыжьэу сиIэр згъэцэкIэныр къыхэсхыгъ.

— ЩыIэныгъэ къызэрыкIоу узхэтыгъэм сыд фэдэ IофшIэна щыбгъэцакIэщтыгъэр? Дзэ Iофым хэшIыкI фиуиIэу, ащ уепхыгъэу щытыгъа?

— Дзэ Iофым сищыIэныгъэ епхыгъэу щытыгъэп, сыныбжьыкIэ къыстефэ зэхъум 1996 — 1997-рэ илъэсхэм къулыкъум сыщыIагъ. Мотострелковэ батальоным сыхэтыгъ. КъыхэкIыгъ уахътэ зэзэгъыныгъэкIэ къулыкъур илъэситIо схьыгъэу. Псэу­пIэ-коммунальнэ хъызмэт Iоф­шIэнхэм япхыгъэ предприятиехэм ащыщ сыIутыгъ. Апэ механикэу езгъэжьэгъагъ, нэужым завгарэу Iоф сшIагъэ.

— Плъыр-стыр чIыпIэхэм къулыкъур ащыпхьыныр псынкIагъоп. Апэрэ гуп­шысэу пшIыгъэхэр къыт­фэ­Iуатэба.

— Тырахыгъэ кином фэдагъ, ау а зэкIэри сызхэт щыIэны­гъэм зэрэщыхъурэр чыжьэкIэ къызгурыIощтыгъ. Ащ етIани апэрэ мэфэ дэдэм зэпэуцужьым ты­хэфагъ. Зы джэгукIэ горэм ты­хэтэу къысщыхъущтыгъ. Дзэ операцием щыхъурэ-щышIэрэр къыбгурыIоным, зэхэпшIэным охътэ гъэнэфагъэ ищыкIагъ.

— Руслъан, сыд фэдэ щы­Iэ­кIэ-псэукIа ащ щышъуиIэр?

— Мафэ къэс зэфэшъхьаф. Тхьамафэрэ натрыф шъофым тыхэты, адрэ тхьамафэм — мэ­зым, щыIэмэ — окопым, блиндажым, чIыунэм, унэ дэгъум.

КIымафэри амал зэриIэкIэ итхыгъ, зыщычъыехэрэ дзыохэм яшIогъэшхо къытэкIыгъ. Зэпымыоу шIушIэ IэпыIэгъур къы­тIэ­кIахьэ, ащ лъэшэу тыгу къыдещае. Генераторхэр, гъомылэпхъэ ыкIи хъызмэтым щагъэфедэрэ пкъыгъо зэфэшъхьафхэр къытфарагъащэх. Нахьыбэу ты­зыфаер псы бэшэрэбхэр ары, акIэ щыIэ псым уешъонкIэ дэи.

— Шъузхэт Iоф мыпсын­кIэм шъугу мыкIодынымкIэ, неущрэ мафэм шъуицыхьэ телъынымкIэ сыда IэпыIэгъу къышъуфэ­хъурэр?

— Пстэуми анахь шъхьаIэр мамыр щыIакIэм кIэхъопсырэ цIыфхэм ар къафыдэтхыныр ары. Тиуашъо къаргъоу, лъэпсэ пытэ зиIэ къэралыгъо гъэпсыгъэ­ным тиIахьышIу зэрэхатлъхьэ­рэм кIуачIэ къытеты. ТекIоныгъэр зэрэтиещтым сицыхьэ телъ!

— Адэ мары джы зыгъэ­псэфыгъом укъэкIуагъ, мамыр щыIэкIэ-псэукIэм сыдэу ущыхъура?

— ЧIыпIэ зэжъу тифэу къы­хэкIыгъ. Сыд фэдиз лIыгъэ пхэлъми, умыщынэнэу хъурэп. ХэушъхьафыкIыгъэ дзэ операцием тыщыIэу щэрыоныр зэ­хэтымыхэу, кIым-сым зыхъукIэ нахь гумэкIыгъо тыхафэ, къэхъу­щтыр тымышIэу. Зыгъэпсэфыгъо апэрэ мэфэ зыщыплIым къин сыхэтыгъ, зыгорэ къысщыкIэрэм фэдэу. Игъорыгъозэ зыпкъ сыкъеуцо.

— Руслъан, бгъэзэжьынкIэ къэнагъэ щыIэп. Сыда ана­хьэу о зыдэпхьымэ пшIоигъор?

— Ащ фэдиз зыгорэм бэу тыщэкIэ сфэIонэп, ау нахьыбэу зыдэсштэщтыр щыгъынхэр ары. Сыда пIомэ тызхэтым елъытыгъэу, ахэр бэрэ зэIэтхъых, зыго­рэ къяхъулIэ, зыушIоихэкIэ игъом бгыкIынхэу хъурэп. Арышъ, ащ­кIэ зызэтезгъэпсыхьащт.

— ЗэзэгъыныгъэкIэ къулыкъум кIо зышIоигъохэм сы­да къяпIон плъэкIыщтыр?

— Ащ фэдэ унашъо хъулъфы­гъэм ышIыным зыгорэ хэгущы­Iэнэу щытэп. Теубытагъэ хэ­лъэу а лъэбэкъур ежь ышIын фае. Хэгъэгум ыпашъхьэ пшъэдэ­кIы­жьэу иIэр ыпэ ригъэуцомэ, сыд фэдэрэ къиныгъуи зэпичыныр псынкIэ къыфэхъущт.

— Уахътэ къыхэбгъэкIи гущыIэгъу укъызэрэтфэ­хъугъэмкIэ тхьауегъэпсэу.

Шъугу къэдгъэкIыжьын, илъэс 18 — 60 зыныбжьыхэу Урысые Федерацием щыпсэухэу гурыт гъэсэныгъэ зиIэхэр дзэкъулыкъушIэ хъунхэ алъэкIыщт. НыбжьыкIэхэу зыныбжьыкIэ къулыкъур зыхьынэу къэсыгъэхэр зы илъэсым ычIыпIэ илъэситIу зэ­зэгъыныгъэм кIэтхэнхэ амал яI. Урысыем и Президентэу Владимир Путиным иунашъокIэ, къулыкъур зэзэгъыныгъэ шIыкIэм тетэу ыхьыным апэрэу кIат­хэрэм зэтыгъо ахъщэу сомэ мини 195-рэ, Адыгеим и ЛIышъхьэу КъумпIыл Мурат иуна­шъо­кIэ зэтыгъоу сомэ мини 150-рэ араты.

ЗэзэгъыныгъэкIэ къулыкъур зыхьы зышIоигъохэр шъузыщы­псэурэм елъытыгъэу дзэ комиссариатхэм зафэжъугъэзэн шъу­лъэкIыщт. ЗэкIэ ахъщэ тынхэм ыкIи фэгъэкIотэнэу щыIэхэм япхыгъэ къэбарыр нахь игъэкIотыгъэу зэзгъашIэ зышIоигъохэм телеграм-каналэу «Адыгея — Служу Родине» зыфиIорэм ра­гъотэщт.

Iэшъынэ Сусан.