Энергием икъэкIуапIэхэр гъэкIэжьыгъэным фытегъэпсыхьэгъэ шIэныгъэ лабораторием илъэтегъэуцо Адыгэ къэралыгъо университетым щыкIуагъ.

Лъэпкъ проектэу «ШIэныгъэр ыкIи университетыр» зыфиIорэм къыдыхэлъытагъэу ар АКъУ-м щагъэ­псыгъ. Университетым ипащэхэр, лабораторием иIофышIэхэр, шIэныгъэ сообществэм илIыкIохэр ыкIи апшъэрэ еджапIэм иныбджэгъухэр лъэтегъэуцом хэлэжьагъэх.

Лабораториер Урысыем апшъэрэ гъэсэныгъэмрэ шIэныгъэмрэкIэ и Министерствэ яIэпыIэгъоу зэха­щагъ. Ащ ахъщэу пэIуагъэхьагъэр 2022-рэ илъэсым федеральнэ бюджетым къыхагъэкIыгъ, зэкIэмкIи ар сомэ миллион 17,9-рэ мэхъу. Адыгэ къэралыгъо университетым ипроектэу «ШIуагъэ къэ­зытырэ энергетическэ системэ гъэпсыгъэнымкIэ энергием икъэ­кIуапIэхэр гъэфедэгъэныр» зыфиIоу ныбжьыкIэ лабораторием пхырищыгъэм федеральнэ грантыр къыхьыгъ. Проектым игъэцэкIэн илъэсищым те­лъытагъ. Лабораторием гъусэ къыфэхъугъэх инновационнэ ыкIи термоядернэ ушэтынхэмкIэ Троицкэ институтымрэ (Москва) ыкIи пшъэдэкIыжьэу ыхьырэмкIэ гъунэпкIэ гъэнэфагъэ зиIэ обществэу «Инженернэ зэфэхьысыжьхэм ясистемэрэ» (Нижний Новгород).

НыбжьыкIэ лабораторием ипащэр техническэ шIэныгъэхэмкIэ кандидатэу, къэбархэр зэзыгъэзэфэрэ автоматизированнэ системэм икафедрэ идоцентэу, АКъУ-м иинженернэ-физическэ факультет игъэIорышIапIэ ипащэу Семен Теплоуховыр ары. Лабораторием иIофышIэхэр зыдэлажьэхэрэр агъэкIэжьырэ энергетикэм уасэ фэшIыгъэнымкIэ системэм изэхэгъэ­уцон ары.

Адыгэ Республикэм геотермальнэ къэкIуапIэхэр щыбгъэфедэнхэмкIэ Iэрыфэгъоу щыт. Мыщ щыIэх тыгъэм иамалкIэ Iоф зышIэрэ станциехэр, гидроэлектростанциехэр, жьы энергетикэр.

Адыгеим гурытымкIэ зы илъэсым къыкIоцI мэфэ 250-рэ тыгъэр къыщепсы. Жьыбгъэм ыкIуачIэкIэ Iоф зышIэрэ электростанциеу республикэм итым Урысыем ятIонэрэ чIыпIэр щеубыты.

Мыщ фэдэ лабораторие Адыгеим къызэрэщызэIуа­хыгъэм мэхьанэшхо иIэу щыт. Московскэ къэралыгъо университетэу М.В. Ломоносовым ыцIэ зыхьырэм иIофышIэу Софья Кисилевам къызэрэхигъэщыгъэмкIэ, Урысыем и Къыблэ мы лъэныкъомкIэ ушэтынхэр мымакIэу щашIыгъэхэми, тапэкIэ мы Iофым АКъУ-м иIахьышхо хишIыхьан ылъэкIыщт, сыда пIомэ, ащ хьисап моделированиер егъэфедэ.

Лъэтегъэуцом ыуж Кавказ хьисап гупчэм Iэнэ хъу­раеу «Интеллектуальные системы и технологии для решения теоретических и прикладных задач» зыфиIорэр щызэхащагъ.

Ащ иIофшIэн хэлэжьагъэх АКъУ-м иректорэу Мамый Даут, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Инженер зэфэхьысыжьхэм ясистем» зыфиIорэм ипащэ игуадзэу Михаил Оболенскэр, Московскэ къэралыгъо университетэу М.В. Ломоносовым ыцIэ зыхьырэм илIыкIоу Софья Кисилевар, шIэныгъэхэмкIэ Урысые Академием иIофшIэкIо шъхьа­Iэу Николай Коргиныр, кибер щынэгъончъэным ыкIи къэбарым иухъумэнкIэ КубГТУ-м икафедрэ ипрофессорэу Владимир Симанковыр, Иннополис университетым къэбар щынэгъончъэнымкIэ и Гупчэ ипащэу Сергей Петренкэр, Адыгэ Республикэм и Лъэпкъ банк экономикэмкIэ иотдел ипащэу Ирина Воробьевар, МКъТУ-м иинженернэ факультет идеканэу Беданэкъо Мурат, лабораторием иIофышIэхэр. Ахэр лъэныкъо зэфэшъхьафхэм атегущыIагъэх.

АКъУ-м ипресс-къулыкъу