Кощхьэблэ районым пхырыкIырэ псыхъоу Фарзэ телъ лъэмыджыр агъэцэкIэжьыщт. Ащ фэдэ къэбар къеты монополием пэшIуекIогъэнымкIэ федеральнэ къулыкъум АдыгеимкIэ и ГъэIорышIапIэ.

Фарзэ телъ лъэмыджыр агъэцэкIэжьыным фэшI аукционэу зэхащагъэм къулыкъум ынаIэ тыридзэнэу хъугъэ, ар къызхэкIыгъэр ащ хэлэжьи, текIоныгъэр къыщыдэзыхыгъэр Iоф зыдапшIэ мы­хъущт организациехэм яреестрэ зэрэхагъэхьагъэр ары. Предпринимателэу атекIуа­гъэр игъом зэзэгъыныгъэм кIэтхагъэп.

Монополием пэшIуекIогъэнымкIэ федеральнэ къулыкъум АдыгеимкIэ и Гъэ­IорышIапIэ ипресс-къулыкъу къызэритыгъэмкIэ, жъоныгъуакIэм иапэрэ мафэхэм муниципальнэ гъэпсыкIэ зиIэ «Дмитриевскэ къоджэ псэупIэм» зэнэкъокъур зэхищагъ, ар зыфэгъэхьыгъагъэр поселкэу Дружбэм дэжькIэ Фарзэ телъ лъэмыджыр гъэцэкIэжьыгъэныр ары. Кощ­хьаблэ щыщ предпринимателыр а зэнэкъокъум щытекIуагъ, ащ уасэу къы­гъэлъэгъуагъэр зэкIэмэ анахь мэкIагъ.

ЖъоныгъуакIэм и 18-м нэс аукционым щытекIуагъэр зэзэгъыныгъэм кIэтхэнэу щытыгъ, ау ушъхьагъу гъэнэфагъэм ыпкъ къикIэу ар ыгъэцэкIэнэу хъугъэп.

«Зэзэгъыныгъэм кIэтхэным зыщи­гъэзыягъэу зэрэщымытыгъэм, ар зыпкъ къикIыгъэр зэрагъэунэфыгъэм ыкIи документхэм къызэрагъэлъэгъуагъэмкIэ предпринимателэу текIоныгъэр къыдэзыхыгъэр гъэцэкIэн IофшIэнхэм афежьэным зэрэфэхьазырым афэшI ыкIи федеральнэ банкхэм ащыщ ахъщэ чIыфэ къызэрэритыгъэри къыдалъыти, ар Iоф зыдапшIэ мыхъущтхэм яреестрэ ха­гъэкIыжьыгъ», — къыщаIуагъ ФАС-м АдыгеимкIэ и ГъэIорышIапIэ ипресс-къу­лыкъу.

Арэу щытми а предпринимателыр арэп лъэмыджыр зыгъэцэкIэжьыщтыр, ар зэзэгъыныгъэм икIэрыкIэу кIэтхэ­жьынэу хъугъэп. Дмитриевскэ къоджэ псэупIэр аукционым ятIонэрэ чIыпIэр къыщызыхьыгъэм зэзэгъыныгъэм дыкIэтхагъ.