КIэлэегъаджэхэу ыкIи кIэлэпIухэу республикэ зэ­нэкъокъухэм щатекIуагъэхэр республикэм и Къэралыгъо филармоние щагъэшIуагъэх.

[caption id="attachment_133963" align="aligncenter" width="800"] Сурэтыр: А. Гусев.[/caption]

Адыгеим и ЛIышъхьэу КъумпIыл Мурат кIэлэегъаджэхэу, гъэсакIохэу тынхэр къызыфа­гъэшъошагъэхэм афэгушIуагъ.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэ игуадзэу Iэщэ Мухьамэд, АР-м гъэсэ­ныгъэмрэ шIэныгъэмрэкIэ иминистрэ ипшъэрылъхэр зыгъэцакIэу Евгений Лебедевыр, АКъУ-мрэ МКъТУ-мрэ яректорхэу Мамый Даутрэ Къуижъ Саидэрэ, АР-м и Общественнэ палатэ АР-м профсоюзхэмкIэ ифедерацие, муниципалитетхэм, чIыпIэ зыгъэIорышIэжьынымкIэ къулыкъухэм япащэхэр, гъэсэныгъэм иIофышIэхэр.

Республикэм и ЛIышъхьэ къызэрэхигъэщыгъэмкIэ, мы илъэсым иублэгъу Урысыем просвещениемкIэ иминистрэу Сергей Кравцовым игъусэу Урысые зэнэкъокъоу «Илъэсым имастер» зыфиIорэм ибыракъ Адыгеим щагъэIагъ, зэнэкъо­къоу «АдыгабзэмкIэ ыкIи литературэмкIэ кIэлэегъэджэ анахь дэгъу» зыфиIорэр ублагъэ зэ­рэхъугъэр къаIуагъ. Республикэ зэнэкъокъухэм якIэуххэр зэфа­хьысыжьыгъахэх.

[caption id="attachment_133964" align="aligncenter" width="800"] Сурэтыр: А. Гусев.[/caption]

«Зэнэкъокъухэм щатекIуа­гъэхэм ыкIи шIухьафтынхэр къа­щызыхьыгъэхэм специалист ныбжьыкIэхэр зэрахэтхэр гу­шIуагъу. Ащ къикIырэр ныбжьыкIэ чанхэм сэнэхьатэу къыхахыгъэмкIэ гъэхъагъэхэр зэрашIырэр ары», — къыIуагъ КъумпIыл Мурат.

Республикэм и ЛIышъхьэ зэрэхигъэунэфыкIыгъэмкIэ, кIэ­лэегъэджэ, кIэлэпIу дэгъухэр гурыт еджапIэхэми, кIэлэцIыкIу IыгъыпIэхэми, колледжхэми, апшъэрэ еджапIэхэми ящыкIагъэх. Республикэм ипащэ зэрилъытэрэмкIэ, гъэсэныгъэм илъэныкъо пстэури Адыгеим дэгъоу щызэхэщэгъэн фае.

КъумпIыл Мурат анаIэ тыраригъэдзагъ Урысыем и Правительствэ иIэпыIэгъукIэ гурыт еджапIэхэр, кIэлэцIыкIу IыгъыпIэхэр республикэм зэрэща­гъэпсыхэрэм ыкIи зэрэщагъэцэкIэжьыхэрэм, гъэсэныгъэмкIэ учреждениехэр мылъкукIи, тех­никэкIи нахьышIоу зэтегъэ­псыхьагъэ зэрэхъухэрэр, инновационнэ площадкэхэмрэ гъэсэныгъэмкIэ гупчэхэу «Точки роста» зыфиIохэрэм афэдэхэмрэ зэрэзэхащэхэрэм.

Адыгеим и ЛIышъхьэ къызэрэхигъэщыгъэмкIэ, кIэлэцIыкIухэм яегъэджэнкIи япIункIи, кIэлэегъаджэхэм яIэпэIэсэныгъэ зыкъегъэIэтыгъэнымкIи респуб­ликэм ищыкIэгъэ амалхэр зэкIэ щызэрахьэх.

«А пстэумэ яшIуагъэкIэ кIэлэ­егъаджэм истатус зыкъеIэты, а сэнэхьатым мэхьанэу ратырэм хэхъо. Мыщ фэдэ зэнэкъокъу-хэм республикэм исхэр нахьыбэу къахэлажьэхэ зэрашIоигъор тигуап. Профессиональнэ Iэпэ­IэсэныгъэмкIэ Урысые движением хэлажьэхэрэр илъэс къэс нахьыбэ мэхъу. Гъэсэныгъэм зегъэушъомбгъугъэнымкIэ ащ мэхьанэшхо иI», — къыIуагъ КъумпIыл Мурат.

Экономикэм илъэныкъо зэ­фэшъхьафхэм ящыкIэгъэ кад­рэхэм якъэгъэхьазырынкIэ, технологиякIэхэр гъэфедэгъэнхэмкIэ пшъэрылъхэр Адыгеим и ЛIышъхьэ къыгъэнэфагъэх. КIэлэцIыкIухэм хэгъэгум итарихърэ икультурэрэ шIу алъэгъуным мэхьанэшхо зэриIэр КъумпIыл Мурат къыIуагъ.

ЕгъэджакIохэу республикэ зэнэкъокъухэм щатекIуагъэхэм тынхэр Iофтхьабзэм щараты­жьыгъэх. Республикэ зэнэкъо­къоу «Адыгеим илъэсымкIэ икIэлэегъэджэ анахь дэгъу» зы­фиIорэм текIоныгъэ къыщыдэзыхыгъэр къуаджэу АдыгеякIэм игурыт еджапIэу N 27-м икIэлэегъаджэу Елена Мосо­ловар ары.

Шъолъыр зэнэкъокъухэм щатекIуагъэхэу Адыгэ республикэ гимназием адыгабзэмрэ литературэмрэкIэ икIэлэегъаджэу Мыгу Анжелэ, Кощхьэблэ районымкIэ кIэлэцIыкIу IыгъыпIэу N 1-м икIэлэпIоу ШъэоцIыкIу ФатIимэт, Красногвардейскэ районымкIэ кIэлэцIыкIу IыгъыпIэу N 1-м имузыкальнэ пащэу Марина Овсянниковам, шъо-лъыр гупчэу «Полярис-Адыгея» икIэлэегъаджэу Дмитрий Шумиловым, Мыекъуапэ икIэлэцIыкIу IыгъыпIэу N 39-м икIэлэегъэ­джэ-логопедэу Вероника Попеловам, поселкэу Новэм игурыт еджапIэу N 13-м ипедагог-­психологэу Ольга Ждан, Мые­къопэ медицинэ колледжым ипащэ игуадзэу, икIэлэегъаджэу Ольга Кононенкэм шIу­хьаф­тынхэмрэ дипломхэмрэ къафагъэшъошагъэх.

Адыгеим и ЛIышъхьэу КъумпIыл Мурат республикэм икIэлэегъаджэхэм адэгущыIагъ, яупчIэхэм джэуап къариты­жьыгъ, гъэсэныгъэм епхыгъэ IофыгъохэмкIэ яеплъыкIэхэр къызэфаIотагъэх. Республикэм и ЛIышъхьэ гъэсэныгъэ языгъэгъотырэ учреждениехэм ягъэпсынкIэ, ягъэцэкIэжьынкIэ, ящагухэм язэтегъэпсыхьанкIэ хэбзэ къулыкъухэм Iофэу ашIэрэр къафиIотагъ. Лъэпкъ проектэу «Гъэ­сэныгъэм» ипхырыщынкIэ, ныбжьыкIэ сэнаущхэмрэ шIэныгъэлэжь ныбжьыкIэхэмрэ IэпыIэгъу ягъэгъотыгъэнымкIэ амалэу зэрахьэхэрэм къатегущыIагъ. ЗэIукIэм хэлэжьагъэхэм адыгабзэм изэгъэшIэн епхыгъэ программэхэм лъэшэу анаIэ атырагъэтыгъ.

АР-м и ЛIышъхьэ ипресс-къулыкъу