Урысые Федерацием и Президентэу Владимир Путиным пшъэрылъ зэрэфишIыгъэм тетэу УФ-м и Президент и Полномочнэ лIыкIоу ­Къыблэ федеральнэ шъо­лъырым щыIэ Владимир Устиновым пэIудзыгъэ шIыкIэм тетэу непэ конференциеу цIыф­хэр зыгъэгумэкIыхэрэ IофыгъохэмкIэ зэхищэгъагъэм шъолъырхэм япащэхэри хэлэжьагъэх.

Мы Iофтхьабзэм хэлэжьагъ Адыгеим и ЛIышъхьэу КъумпIыл Мурат. Джащ фэдэу федеральнэ инспектор шъхьаIэу Сергей Дрокиныр, АР-м псэолъэшIынымкIэ и Министерствэ ипащэ игуадзэу Лафышъэ Рэмэзан, къуаджэу Тэхъутэмыкъуае ипащэу Нэужьырэкъо Алый ащ хэлэжьагъэх.

Къыблэ федеральнэ шъолъы­рым исубъект зэфэшъхьафхэм ащыпсэурэ цIыфхэм ялъэIу тхылъхэм мыщ щахэплъагъэх, Адыгеим щыщхэри ахэм ахэтыгъэх. Къуаджэу Тэхъутэмы­къуае щыпсэурэ Еутых Азмэт къыкIэ­лъэIугъ район гупчэм щыпсэу­хэрэм псы къабзэ аIэкIэгъэхьэгъэным ылъэныкъокIэ ишIуагъэ къаригъэкIынэу. Нэбгырэ пчъа­гъэу ащ щыпсэурэр нахьыбэ зэрэхъурэм ыкIи псыубытыпIэхэр жъы зэрэхъугъэхэм къа­хэкIэу псэуалъэхэр зэтегъэ­псы­хьэгъэнхэ фаеу хъугъэ.

КъумпIыл Мурат къызэриIуа­гъэмкIэ, а IофыгъомкIэ унашъо аштэгъах ыкIи 2023-рэ илъэсым шэкIогъум нэс ар зэшIохыгъэ хъущт. Федеральнэ проектэу «Псы къабзэр» зыфиIоу лъэпкъ проектэу «ПсэупIэхэмрэ къэлэ щыIакIэмрэ» зыфиIорэм къыдыхэлъытагъэу щытым тегъэ­псыхьагъэу IофшIэнхэр зэ­шIуахых.

Къуаджэу Тэхъутэмыкъуае непэкIэ псэолъи 3-мэ язэтегъэ­псыхьан щаублагъ, псыубы­тыпIэхэм псыр зыукъэбзыщт ыкIи куоу чIым къычIэзыщыщт станциехэр ахэтыщтых. Метрэ 200-м нэс икууагъэу аубырыузэ псэуалъэхэм язэтегъэпсыхьан лъагъэкIотэщт. Бактерициднэ установкэхэр ахагъэуцощтых, ащ дакIоу псыр къэзытыщт пкъыгъохэу хэтын фаехэри зэ­рищыкIагъэм тетэу зэхагъэу­цощтых, псыубытыпIэм къыпэ­Iулъ чIыпIэри нахь зэтыра­гъэ­псыхьащт. А гухэлъхэм апэ­Iуагъэхьанэу сомэ миллион 85-рэ фэдиз къафатIупщыщт.

«Хэгъэгум и Президентэу Владимир Путиным пшъэрылъ къыгъэуцугъ социальнэ лъэныкъом ыкIи гъогухэмрэ инженер инфраструктурэмрэ хэхъоныгъэ ягъэшIыгъэнэу, мыщ хэхьэх къоджэ псэупIэхэри. А пшъэ­рылъыр зэшIохыгъэ хъуным пае республикэм бэ щагъэцакIэрэр. Лъэпкъ проектхэмрэ къэралыгъо программэхэмрэ а IофшIэныр лъыкIотэнымкIэ яшIуагъэ къэкIо. Республикэм ис цIыфхэм ящы­IакIэ нахьышIу хъуным пае тэри ахэм тахэлэжьэщт. Муниципалитет пэпчъ анахь зигъо Iофыгъохэу къащыуцухэрэр псынкIэу къыхэгъэщыгъэнхэм ыкIи зэшIохыгъэнхэм апае цIыфхэм зыкъызэрэтфагъэзэрэ тхылъхэм япхыгъэ IофшIэным ренэу ты­наIэ тет», — къыхигъэщыгъ Адыге­им и ЛIышъхьэ.

УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым къуаджэм псыр IэкIэгъэхьэгъэнымкIэ уна­шъоу аштагъэр игъом гъэцэ­кIагъэ хъуным пае ищыкIэгъэ Iофтхьабзэхэр пхырищынхэу Адыгеим и ЛIышъхьэ пшъэрылъ къыфишIыгъ.

Проектэу «Псы къабзэр» зы­фиIорэм къызэрэдилъытэрэм тетэу 2019-рэ илъэсым къыщыублагъэу 2022-рэ илъэсым нэс псэу зэшъощтхэмкIэ псэолъэ 13 республикэм щатIупщыгъ. Ащ ишIуагъэкIэ республикэм щыщ­хэу зэшъощтхэ псы къабзэр зыIэкIахьэхэрэм япчъагъэ процент 82,4-м нэсыгъ, къэлэдэс­хэмкIэ ар зэрэхъурэр процент 92-рэ. Гухэлъэу щыIэр 2024-рэ илъэсым гупчэм къикIэу зэ­шъощтхэ псы къабзэр респуб­ликэм щыпсэухэрэм япроцент 87,1-м IэкIахьэу шIыгъэныр ары. Ащ пае IофшIэнхэр лъагъэкIуа­тэх. Проектэу «Псы къабзэр» зыфиIорэм диштэу мы илъэсым псэу зэшъощтхэмкIэ псэолъэ 13-м ащызэшIуахыщт Iофтхьа­бзэхэм апэIуагъэхьанэу сомэ миллион 308-рэ агъэнэфагъ.

АР-м и ЛIышъхьэ ипресс-къулыкъу