Гъогухэр шапхъэхэм адиштэнхэм пае
Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэм дэжь щызэхэщэгъэ Советым изэхэсыгъо Адыгеим и ЛIышъхьэу КъумпIыл Мурат хэлэжьагъ. Владимир Устиновым тхьамэтагъор ащ щызэрихьагъ.
Iофтхьабзэр пэIудзыгъэ шIыкIэм тетэу кIуагъэ, республикэм ыцIэкIэ ащ хэлэжьагъэх федеральнэ инспектор шъхьаIэу Сергей Дрокиныр, АР-м ипрокурорэу Игорь Шевченкэр, АР-м хэгъэгу кIоцI IофхэмкIэ иминистрэу Олег Безсмельницыныр, АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан. Зэхэсыгъом зыщатегущыIэгъэхэ Iофыгъохэм ащыщых хэгъэгум и Къыблэ ишъолъырхэм 2023 — 2027-рэ илъэсхэм гъогухэм япхыгъэ IофшIэнэу агъэцэкIэщтымкIэ мурадэу яIэхэм ыкIи автомобиль гъогухэм япроцент 85-м нахь мымакIэу шапхъэхэм адиштэу щытынхэм яIофыгъохэр.
Владимир Устиновым къызэрэхигъэщыгъэмкIэ, Урысыем и Президентэу Владимир Путиным къыгъэуцугъэ пшъэрылъхэм адиштэу IофшIэныр агъэцакIэ.
«ПшъэдэкIыжь ин зыхэлъ пшъэрылъ зэшIохыгъэн фаер — хабзэм ифедеральнэ къулыкъухэмкIи, шъолъырхэм якъулыкъухэмкIи ащ мэхьанэшхо иIэу щыт. КъэкIуапIэу ыкIи амалэу щыIэр зэкIэ ащкIэ дгъэфедэн фае. Арышъ, транспортымкIэ Министерствэр тигъусэу тишъолъырхэм а IофшIэныр зэращызэхэщагъэм, Iофыгъохэу щыIэхэм, джыри зэшIохыгъэн фаехэм тахэплъэщт», — къыIуагъ Владимир Устиновым.
А лъэныкъомкIэ Iофэу ашIэрэм фэгъэхьыгъэу къэгущыIагъэх федеральнэ гъогу агентствэм (Росавтодорым) ипащэу Роман Новиковыр, Къыблэ федеральнэ шъолъырым къыхиубытэрэ субъектхэм япащэхэр.
2023-рэ илъэсым АдыгеимкIэ гъогу фондыр сомэ миллиарди 4,2-м ехъу. Ащ хэхьэ республикэ ыкIи чIыпIэ мэхьанэ зиIэ автомобиль гъогухэр шапхъэхэм адиштэхэу шIыгъэнхэм пае къыхагъэкIыгъэ сомэ миллиардым ехъурэр.
Транспортым тегъэпсыхьэгъэ документхэу зэхагъэуцуагъэхэм адиштэу республикэ е муниципальнэ мэхьанэ зиIэ автомобиль гъогуи 8, километрэ 208-м ехъу якIыхьагъэу агъэнэфагъэхэм ахагъэхьагъ. Автомобиль гъогухэр шапхъэхэм адиштэхэу шIыгъэнхэм пае илъэсыр къызихьагъэм къыщыублагъэу автомобиль гъогоу Мыекъуапэ — ТIуапсэ щыщэу километри 2,7-мэ гъэцэкIэжьын IофшIэнхэр арашIылIагъэх, ахэм сомэ миллион 41,7-рэ апэIухьагъ.
АР-м и ЛIышъхьэ ипресс-къулыкъу