ЩыIэныгъэм чIыпIэ къин ригъэуцогъэ цIыфхэм гущыIэ фабэхэр, гукIэгъур апэзы­гъо­хырэ IофышIэхэм неущ ямэфэкI хагъэу­нэфыкIы.

Зизакъоу псэурэ нэжъ-Iужъхэм гущыIэгъу афэхъурэ, янеущ­рэ мафэ къызэрэсыщтымкIэ ыкIи ялыуз IэкIыб зэрэхъущтымкIэ гугъэ язытыхэрэ социальнэ IофышIэхэм непэ ящытхъу тIо­ныр къалэжьыгъ. ГукIэгъуны­гъэм икъулыкъу иIэпыIэгъу цIыфхэр сыдигъуи къежэх.

Непэ нэIуасэ шъузыфэтшIымэ тшIоигъор зиIоф хэшIыкI фызиIэу, гущыIэ фабэхэр къэзыгъотын, гушIубзыоу цIыфхэм апэ­гъокIызэ агу къэзыIэтын зы­лъэкIырэ Хъуажъ Фатимэ ары. ЦIыфхэм ясоциальнэ фэIо-фа­шIэхэр афэзыгъэцэкIэрэ гупчэу Кощхьэблэ районым щыIэм ия 5-рэ отделение ар иIофышI.

— Зыныбжь хэкIотагъэхэм уаIущхыпцIэ къодыекIэ икъурэп, — къеIуатэ Фатимэ.

—Яжъышъхьэ, язэкъоныгъэ къа­фэпсынкIэным фэшI нэкIи, гукIи, псэкIи ахэм уапэблэгъэн фае. Джарэущтэу зыхъурэм ежьхэми шIу уалъэгъущт, нахь зы­къыпфащэищт.

Социальнэ IофышIэу ущытыныр псынкIэп, кIуачIи гузэхэшIэныгъи хэолъхьэх. ЦIыфым илыуз зэхэпшIэныр къызэрыкIоп, арышъ, мы сэнэхьатым фэгъэзагъэхэм ар гукIи, псэкIи къыхахы. Ащ дакIоу цIыфыгъэшхо зищыкIэгъэ сэнэхьат.

Хъуажъ Фатимэ социальнэ IофышIэу зылажьэрэр илъэси 7 мэхъу. ИцIыф гъэпсыкIэкIэ зэкIэми жабзэ къадигъотын елъэкIы, ащ къыхэкIэу иIофшIэн къыфэпсынкI.

— Мы IофшIэныр згъэцэкIэныр ошIэ-дэмышIэу хъугъэ, — къытфеIуатэ Фатимэ.

— Сэ сицIыкIугъом къыщегъэжьагъэу нэжъ-Iужъхэм сафэщагъэу сыщытыгъ. Ахэр бэрэ гущыIэгъу сшIыщтыгъэх. Краснодар кооперативнэ техникумым икъутамэу Шытхьалэ дэтыгъэр къы­зысэухым илъэс пчъагъэрэ бух­галтерэу колхозым Iоф щыс­шIагъ. Колхозхэр щымы­Iэжьхэ зэхъум сэри IофшIэпIэнчъэу сыкъэнагъ. СисэнэхьаткIэ IофшIэн згъотыныгъэнкIи хъун, ау ащ дэжьым тефэу социальнэ IофышIэ ящыкIагъэу зызэ­хэсэхым, Гупчэм сыкъэкIуагъ ыкIи непэрэ мафэм нэс ащ сыщэлажьэ. Зы мафи сырыкIэгъожьэу къыхэкIыгъэп.

ТигущыIэгъу къызэриIуагъэмкIэ, джырэ уахътэм нэбгыри 10-мэ социальнэ IэпыIэгъу аре­гъэгъоты. ГущыIэм пае, гъомылапхъэхэм якъэщэфынкIэ, унэм игъэкъэбзэнкIэ, сымэджэщым щэгъэнхэмкIэ ахэм адеIэ, ащ фэдэ IэпыIэгъу зищыкIагъэхэмкIэ социальнэ IофышIэм ышIэрэр гъунэнчъэу къащэхъу. Мыхэм яшIуагъэ зэрагъэкIырэр пенсием кIогъэ нэжъ-Iужъхэу зизакъоу псэухэрэр, сэкъатныгъэ зиIэ цIыфхэр ары. Гъэнэфагъэ, мы Iофыр зышIэшъущтыр цIыф­хэм IэпыIэгъу афэхъуныр зыгукIэ къыхэзыхыгъэр ары.

— Згъэрэзэнхэр, згъэгушIонхэр ары IофшIапIэм сызыIохьэм пшъэрылъ шъхьаIэу зыфэзгъэуцужьыгъагъэр, — игущыIэ лъегъэкIуатэ Фатимэ.

— Сыдигъуи ар сымыукъоу, ыпэкIэ езгъэхъуным сыпылъ. Апэрэ мафэм сямыкIункIэ е зыгорэ тэрэзэу сымышIэнкIэ сыщынэщтыгъ, ау джы ащ фэдэ гумэкI сиIэжьэп. IэпыIэгъу сызфэхъурэ нэжъ-Iужъхэр къызэрэсфыщытхэм мэхьанэшхо есэты. Ахэр къысфэдэгъух, гуфэбэныгъэу апэзгъохырэр зэхашIыкIы.

Бзылъфыгъэ нэшIо-гушIом иIофшIэн шIу елъэгъу, ыгу етыгъэу егъэцакIэ. ИIофшIэгъу уахътэ ыухыгъэми, нэжъ-Iужъхэм акIэрысэу бэрэ къыхэкIы. Ощхышхоу щыIагъэхэм апкъ къикIыкIэ Кощхьаблэ игупчэ псышхо иуцогъагъ. Фатимэ зылъыплъэхэрэм ащыщ зэ­шъ­хьэгъусэхэр а чIыпIэм щэпсэу­хэти, афэгумэкIэу зэу афы­теуагъ, IэпыIэгъу ящыкIагъэмэ кIэупчIагъ. Адрэхэми ягуапэу къыраIожьыгъ: «Тхьауегъэпсэу, ти Фатим, сыдэу дэгъуа узэ­рэтиIэр!»

— ФэIо-фашIэу афэбгъэца­кIэ­рэм нахьи гущыIэгъу уафэ­хъу­ныр бэкIэ нахь зигопэ нэжъ-Iужъхэри ахэтых, — къыхегъэщы Хъуажъ Фатимэ.

— Ялъфыгъэхэм, ахэм къапы­хъо­жьыгъэхэм ягугъу къэзы­шIыхэ­рэр ахэтых. Зыхэм яузхэр, ягукъаохэр къысфаIуатэх. Шъып­къэр пIощтмэ, сэри лъэшэу ахэм сясагъэу пенсием сыкIожьымэ сызэрэхъущтым сегупшысэ. Зы унэгъо­шхом тыфэдэу сщыщ хъугъэхэу сэ­лъытэ.

Джащ фэдэу социальнэ IофышIэм къызэриIуагъэмкIэ, Кощхьаблэ дэс нэжъ-Iужъэу зылъыплъэхэрэм зизакъоу, Iа­хьыл гупсэ зимыIэхэр ахэтых, ау бэми лъфыгъэхэр яIэх. Ащ къикIырэп янэ-ятэхэр чIадзы­жьыгъэхэу, къалъымыплъэхэу. ЩыIэныгъэм иамалхэм ялъытыгъэу ахэм ащыщхэр яIофшIэнкIэ чыжьэу кIонхэ фаеу мэхъу.

— Тызылъыплъэрэ нэжъ-I­ужъхэм фэIо-фэшIэ зэфэшъхьафхэр афэтэгъэцакIэх, — къе­Iуатэ Фатимэ.

— Ахэм зэу ащыщ япсауныгъэ гъэпытэгъэнымкIэ жьы къабзэм хэтхэу таригъусэу къядэгъэкIухьаныр, Iэпкъ-лъэпкъхэр зэкIэкIынхэмкIэ зарядкэ ядгъэшIыныр, яIэпIэ кIэлъынхэр афызэблэтхъунхэр, лъыдэкIуаер, ятемпературэ афэтшыныр. Джащ фэдэу юбилей зиIэхэм тафэгушIо, ащ фэдэу бэ къэппчъын плъэ­кIыщтыр.

Социальнэ IофышIэхэм агъэ­цакIэрэм имэхьанэ уасэ фэшIыгъуай, ахэм псэпэшхо къа­хьы.

ЯмафэкIэ непэ тэри тафэгушIо, агу пыкIырэм фэдэ пчъагъэкIэ къафигъэзэжьынэу тафэлъаIо!

Iэшъынэ Сусан.