«Адыгэ макъэм» иредакцие къэтхагъ цIыфхэм социальнэ IэпыIэгъу ягъэгъотыгъэнымкIэ Зэхэубытэгъэ гупчэу Шэуджэн районым итым имэфэ отделение ипащэу Къэрэ­бэт Асиет. Якъулыкъу щылажьэхэрэм Iофэу агъэцакIэрэм непэрэ мафэм мэхьанэу иIэм ар къытегущыIагъ.

ЦIыфхэм социальнэ IэпыIэгъу ягъэгъотыгъэнымкIэ Зэхэубытэгъэ гупчэу Шэуджэн районым итым иотделениеу Iэпы­Iэгъу зищыкIэгъэ нэжъ-Iужъхэмрэ сэкъатныгъэ зиIэхэмрэ апае мафэрэ Iоф зышIэрэр бэдзэогъум и 8-м, 2022-рэ илъэ­сым къызэIуахыгъагъ. Бэгъэдыр Къэралбый ыцIэ зыхьырэ спорт комплексым чIыпIэ хэхыгъэ щытиIэу тхьамафэм зэ ащ тыщызэрэугъоищтыгъ. Зетэгъэ­жьакIэм отделением иIофшIэн ащ фэдизэу тищыкIэгъэщтми, лъэныкъуабэ зэдиубытыщтми, тшIогъэшIэгъоныщтми тшIэщтыгъэп.

ЦIыф псэупIэ зэфэшъхьафхэм къарыкIыхэзэ къытфакIох: Хьатыгъужъыкъуае, Хьакурынэ­хьаблэ, Мамхыгъэ, къутырхэу Чер­нышовым, Михайловым, ХьапакIэм, Трудым, поселкэу Ульскэм.

ТынаIэ зытет нэжъ­-Iужъхэр джы купитIу мэхъух, нэбгырэ 23-рэ хъухэу тхьама­фэм тIо къытфакIох. КъакIо­хэрэм япчъагъэ нэбгырэ 30-м нэдгъэсын тимурад, сыда пIомэ IэпыIэгъу лые хъурэп. ТынаIэ зытетхэм лъыр дэкIоягъэмэ афэтэшы, яжьыкъащэ тэуплъэкIу, аIэпкъы-лъэпкъыхэм нахь тэрэзэу Iоф язгъэшIэщт процедурэхэр ятэгъэшIых, нэ­ужым шъхьадж ищыкIагъэу ылъытэрэ лъэныкъомкIэ IэпыIэгъу языгъэгъотыщтхэм аIутэгъакIэх.

Джэнчэтэ Сэфэрхъан гупчэм имэфэ отделение къакIохэрэм ащыщ, IэпыIэгъу къызэрэфэ­хъухэрэм ащ осэшхо фешIы: «Къулыкъум иIофышIэхэм тищыIэныгъэ зэрахъокIыгъ, сабый­хэм афэдэу анаIэ къыттет. Лъы­тэныгъэ къытфашIы, къытфэгумэкIых, къытфэсакъых, Iофтхьэбзэ зэфэшъхьафхэр тфызэхащэх. Социальнэ Iоф­шIэнымкIэ специалистхэр: Набэкъо Диана, Аулъэ Людмила, социальнэ IофышIэр Чэсэбый Луиза, психологыр ПIатIэкъо Зар, культурэ Iофтхьабзэхэр зэхэзыщэхэрэр ШъэоцIыкIу Рэ­мэзанрэ ШъэоцIыкIу Фатимэрэ. Ахэм лъэшэу тафэраз!»

ТичIыопс идэхагъэ нэIуасэ фэтэшIых, чIыпIэ зэфэшъхьаф­хэр ятэгъэлъэгъух. Джащ фэдэу Азишскэ гъочIэгъым тIогъогогъо техыгъагъ, псыфабэхэм защагъэпсэфынэу щэгъогогъо тщагъэх, АР-м и Камернэ музыкальнэ театрэ тыщыIагъ, Еутых Асе и Дышъэ Ордэунэ, Свято-Михайловскэ чылысым, АР-м и Лъэпкъ музей, адыгэ къуаем ифестиваль тащыIагъ. СпортымкIэ, орэд къэIонымкIэ, къэшъонымкIэ зэнэкъокъухэр, джэгукIэ зэфэшъхьафхэр ренэу афызэхэтэщэх, сурэтхэр ятэ­гъэшIых, мэфэкI мафэхэр зэды­хэтыгъэунэфыкIых. НэкIмазэм ехъулIэу ТхьэлъэIоу тшIы­гъа­гъэр анахь мэхьанэ зиIэ ыкIи цIыфыбэ зыхэлэжьэгъэ Iофтхьэ­бзагъ.

Гупчэм ипащэу ГутIэ Зарэ зэкIэми ынаIэ атет, IэпыIэгъу тызыфэхъухэрэм ямэфэкI ма­фэхэмкIи ренэу тафэгушIо. «ШIу шIи псым хадз», еIо адыгэ гущыIэжъым, цIыфхэм IэпыIэгъу ябгъэкIыныр, дахэ япIоныр псэ­пэшIагъэмэ ащыщ. Тигуапэу типшъэрылъхэр тэгъэцакIэх.

Социальнэ IофышIэм и Ма­фэкIэ тиIофшIэгъухэм зэкIэми тафэгушIо, псауныгъэ пытэ яIэу, IэпыIэгъу зищыкIагъэхэм ар игъом арагъэгъотышъунэу та­фэлъаIо!

Къэрэбэт Асиет. Шэуджэн районым социальнэ IэпыIэгъумкIэ и Зэхэубытэгъэ гупчэ имэфэ отделение ипащ.