Урысыем иректорхэм я Федерациерэ араб университетхэмрэ яя III-рэ форум Зэхэт Араб Эмиратхэм якъалэу Шарджи дэт Университетым щыкIуагъ, Iофтхьабзэм изэхэщакIор Урысыем иректорхэм я Союз ары.

Урысыем шIэныгъэ-гъэсэныгъэ зэдэлэжьэныгъэу араб дунаеу нэбгырэ миллион 400-м ехъу зэлъызыубытырэм дыриIэм къыдыхэлъытэгъэ мы Iофтхьабзэм ректор 200 фэдиз хэлэжьагъ. Ахэр Урысыем иуниверситет пэрытхэм, УФ-м шIэ­ныгъэмкIэ ыкIи апшъэрэ гъэсэныгъэмкIэ и Министерствэ, Зэхэт Араб Эмиратхэм, Мысыр, Оман, Судан, Катар ыкIи Ливием ялIыкIох.

Форумым икъызэIухын фэгъэ­хьыгъэ мэфэкI зэхахьэм хэлэжьагъэх Урысыем шIэныгъэм­кIэ ыкIи апшъэрэ гъэсэныгъэмкIэ иминистрэ игуадзэу Константин Могилевскэр, Урысыем иректорхэм я Союз ипрезидентэу, Московскэ къэралыгъо университетэу Ломоносовым ыцIэ зыхьырэм иректорэу Виктор Садовничэр, Шарджи иэмир игуадзэу, Шарджи иуниверситет ипрезидентэу шейхэу Султан бин Ахмед Аль Касими, Зэхэт Араб Эмиратхэм гъэсэныгъэмкIэ иминистрэу Ахмад Абдулла Хумаид Абдулла Белхул Аль Фаласи.

ШIэныгъэ ыкIи академическэ программэхэр зэгъусэхэу зэ­хагъэуцонхэм ыкIи нэмыкI лъэ­ныкъо зэфэшъхьафыбэмкIэ зэрэзэдэлажьэхэрэм, тапэкIи Iоф зэрэзэдашIэщтым форумым хэлажьэхэрэр тегущыIагъэх, Урысыем ыкIи араб хэгъэгухэм арыт университетхэм Iофыгъуа­кIэу къащырахьыжьэхэрэмкIэ зэхъожьыгъэх. Академическэ аккредитацием, зэхэт спорт программэхэм язэхэщэн, ныбжьыкIэхэм IэпэIэсэныгъэшхо ахэлъэу гъэсэгъэнхэм, нэмыкI лъэныкъохэми анэсыгъэх.

Адыгэ къэралыгъо университетым иректорэу Мамый Даутэ секцием докладэу «Университетхэм азыфагукIэ академическэу зэдэлэжьэныгъэм истратегие ыкIи ныбжьыкIэхэр IэпэIасэхэу гъэсэгъэнхэмкIэ зэдэлэжьэгъэныр, зэхэт Iофтхьабзэхэр, спорт программэхэр зэхэщэгъэн­хэр, ащкIэ урысые ыкIи араб университетхэм яопыт» зыфи­Iорэр къыщишIыгъ.

Секциер зезыщагъэр Московскэ къэралыгъо университетэу Ломоносовым ыцIэ зыхьырэм иректорэу Виктор Садовничэр ары. Ащ игъусагъ Тунис университетым иректорэу Лотфи Белгасем. Секцием къыщыгущыIагъэх Шарджи иуниверситет иректорэу Хамид М.К. Аль- Наймий, Саудовскэ Аравием иуниверситетэу Мохаммад Бин Фахда ыцIэ зыхьырэм иректорэу Исса Алансари, Мысыр- Урысые университетым иректорэу Шериф Фахри.

Iофтхьабзэм Урысыем иуниверситетхэм ялIыкIо 50 ыкIи арабхэм яехэм къарыкIыгъэ нэбгыри 150-рэ хэлэжьагъэх. Апэрэ форумыр 2018-рэ илъэсым Бейрут щырагъэкIокIыгъагъ, ятIонэрэр 2019-рэ илъэсым Московскэ къэралыгъо университетым щыкIуагъ.

Урысые ыкIи араб университетхэм я Федерацие 2018-рэ илъэсыр ары зызэхащагъэр, ащ зэкIэмкIи университет 70-рэ хэхьэ.

Адыгэ къэралыгъо университетым ипресс-къулыкъу