Хэбзэнчъэу уIэшыгъэ формированиехэр зэхэзыщэхэрэм е ахэм ахэлажьэхэрэм уголовнэ пшъэдэкIыжь зэрарагъэхьырэм анаIэ тырарегъадзэ Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ.

Ащ къызэритырэмкIэ, уIэшыгъэ формированиехэр хэбзэнчъэу зэхэзыщэхэрэм е ахэм ахэлажьэхэрэм Урысыем и Уголовнэ кодекс ия 208-рэ статья диштэу уголовнэ пшъэдэкIыжь арагъэхьы. Статьям къыдилъытэрэр илъэс 20 хьапс.

АгъэмысэнымкIэ IэубытыпIэ хъу­хэрэр:

1) хэбзэнчъэу уIэшыгъэ формированиер зэрэзэхищагъэр;

2) ащ пэщэныгъэ зэрэдызэрихьэрэр;

3) мылъку зэрэпэIуигъахьэрэр;

4) ежь ышъхьэкIэ зэрэхэлажьэрэр (я 208-рэ статьям ия 2-рэ Iахь);

5) Урысые Федерацием ифедэхэм апэшIуекIоу Iашэхэмрэ дзэ техникэмрэ ыгъэфедэхэзэ, IэкIыб къэралхэм уIэшыгъэ зэIуупIэныгъэхэу, дзэ Iофтхьабзэхэу ащызэрахьэхэрэм зэрахэла­жьэрэр. Федеральнэ хэбзэгъэуцугъэу щыIэм къыгъэуцугъэ шапхъэхэм апэшIуекIоу уIэшыгъэ формированиер зэхэщагъэ зыхъукIэ ары хэбзэнчъэ нэшанэ иIэ зыхъурэр. УФ-м ишъолъырхэм яхэбзэ къулыкъухэм, чIыпIэ зыгъэIорышIэжьыным, гъэцэкIэкIо хабзэм якъулыкъухэм яунашъохэм атетэу зэхащэрэ уIэшыгъэ формированиехэри хэбзэнчъэу алъытэнхэ алъэкIыщтых, сыда пIомэ хэгъэгум икъэухъумэнрэ ищынэгъончъагъэрэ афэгъэзагъэр Урысые Федерациер ары (УФ-м и Конституцие ия 71-рэ статья).

Джащ фэдэу уIэшыгъэ формированиехэр гухэлъ зэфэшъхьафхэм афэIорышIэнхэ алъэкIыщт: кIуачIэкIэ хабзэр штэгъэныр, Урысые Федерацием и Конституцие аукъозэ хэгъэгум конституционнэ гъэпсыкIэу иIэр зэблэхъугъэныр ыкIи нэмыкIхэр.

Ащ фэдэ уIэшыгъэ формированиехэм ахэтхэу бзэджэшIагъэ зезыхьагъэхэм Урысыем и Уголовнэ кодекс ия 208-рэ статья къыдилъытэрэ пшъэдэкIыжьыр арагъэхьы. Ежь-ежьырэу цIыфым бзэджэшIагъэу зэрихьэрэр зэпигъэугъэми, ащ пае уголовнэ пшъэдэкIыжь ымыхьыжьынэу къикIырэп.

Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу