АдыгеимкIэ апэр
АдыгеимкIэ апэрэ скейт-паркыр къалэу Мыекъуапэ иреспубликэ стадион къыщызэIуахыгъ.
[caption id="attachment_133879" align="aligncenter" width="800"] Сурэтыр: А. Гусев.[/caption]
Псыхъоу Шъхьэгуащэ инэпкъ изэтегъэпсыхьан амыублэзэ кIэлэцIыкIухэр къэлэ паркым щыIэ чIыпIэ зэтегъэпсыхьагъэм а спорт лъэпкъым щыпылъыгъэх. Джы кIэлэцIыкIу спортсменхэм уахътэм диштэрэ амал дэгъухэр яIэ хъугъэх. КIэлэцIыкIухэм яшIоигъоныгъэхэр къыдалъытэхэзэ, конструкцие зэфэшъхьафхэр агъэпсыгъэх.
Спортсмен ныбжьыкIэхэм ыкIи спортым фэщагъэхэм афэгушIонэу къэкIуагъ Адыгеим и ЛIышъхьэу КъумпIыл Мурат.
Джащ фэдэу Iофтхьабзэм хэлэжьагъэх АР-м физическэ культурэмкIэ ыкIи спортымкIэ и Комитет итхьаматэу Дэгужъые Мурат, къалэу Мыекъуапэ ипащэу Геннадий Митрофановыр, республикэ стадионым иIофышIэхэр.
«Мыекъуапэ инэпкъэу зэтырагъэпсыхьагъэр ащ фэдэ спорт лъэпкъхэм къякIущтыгъэп. ЦIыфхэр зыщытезекIухьэхэрэ чIыпIэ рэхьатэу ар щыт. Непэ скейт-паркхэр зэрэхэгъэгоу ащызэлъашIэ хъугъэх, ащ къыхэкIэу спорт шъолъыр стадионым щыгъэпсыгъэнэу унашъо ашIыгъагъ. ЦIыф ныбжьыкIэхэм, кIочIэшхохэм, зицыхьэ зытелъыжьхэм агу рихьырэ, агу зыфэкIорэ гупчэу ар зэрэхъущтым сицыхьэ телъ», — къыIуагъ КъумпIыл Мурат.
Спорт псэолъакIэм видеокамерэ хагъэуцуагъ, зэтырагъэпсыхьагъ ыкIи къалэм теплъэу иIэм диштэу щыт. Квадрат метрэ 825-м ехъу скейт-паркым чIыпIэу ыубытырэр. Ар модули 5-у зэхэт, 4-р бетон конструкцие зыкIкIэ зэпхыгъэу щытых, я 5-рэ модулыр трюкхэм афытегъэпсыхьагъэу щыт, материал пытэм хэшIыкIыгъ, хэушъхьафыкIыгъэу ар щыт. Мы проектым иподрядчикыр компаниеу XSA Ramps. Фирмэм ипащэу Константин Тарановым къызэриIуагъэмкIэ, 2006-рэ илъэсым къыщегъэжьагъэу Урысыем ыкIи ащ пэIудзыгъэ чIыпIэхэм мыщ фэдэ псэолъэ 500-м ехъу ащагъэпсыгъ.
ЦIыфэу къекIолIагъэхэм апае Мыекъуапэрэ Краснодаррэ къарыкIыгъэ спортсменхэм якъэгъэлъэгъонхэр зэхащэгъагъэх. Ахэм ащыщхэм мызэу-мытIоу Урысыем щырекIокIыгъэ чемпионатхэм текIоныгъэхэр къащадахыгъэх. ЕзыгъэжьэгъэкIэ спортсменхэм апае мастер-классхэр зэхащагъэх, якъулайныгъи къагъэлъэгъуагъ.
АР-м и ЛIышъхьэ ипресс-къулыкъу