Къэралыгъом икъыблэ лъэныкъо лэжьыгъэхэм яхэлъхьан щылъагъэкIуатэ, ащкIэ зи­шIуагъэ къэкIуагъэр мыгъэ гъатхэр нахь фа­бэу зэрэщытыгъэр ары.

Лэжьыгъэхэм якъэгъэкIын зэ­шIохыгъошIу хъунэу Адыгеим имэкъумэщышIэхэм алъытэ. Урысыем и Банк жъоныгъуакIэм къышIыгъэ докладэу «Шъо­лъыр экономикэр» зыфиIорэм а Iофыгъом къыщытегущыIэ.

Урысыем и Банк кIэупчIэзэ къыугъоигъэ къэбарым къызэригъэнэфагъэмкIэ, шъолъырым имэкъумэщышIэхэу фэбапIэхэм хэтэрыкIхэр къащызыгъэкIы­хэ­рэр къэралыгъо чылапхъэхэм ыкIи чIыгъэшIухэм атехьажьыгъэх. Ащ ишIуагъэкIэ лэжьы­гъэу Iуахыжьырэм идэгъугъэ хэ­хъуагъ, IэкIыбым къыщыдагъэ­кIырэ чылапхъэхэмкIэ ащ фэдэу дэгъоу ыкIи бэу лэжьыгъэ ахэм къахьыжьыщтыгъэп. ЧIыпIэ бэ­дзэрхэм, Краснодар краим, Ростов хэкум, къалэу Москва продукциер ащыIуагъэкIы.

Щылэ мазэм къыщегъэжьагъэу гъэтхапэм нэс Адыгеим мэкъумэщ лэжьыгъэу къыща­хьыжьыгъэр гъэрекIорэм шъхьа­дэкIыгъ ыкIи ащ ыуасэ сомэ миллиард 1,5-м нэсыгъ.

Лэжьыгъэу къахьыжьырэм зэрэхахъорэр бэкIэ инвести­циехэм япхыгъ. «Агростартап» зыфиIорэ проектым ишIуагъэкIэ 2023-рэ илъэсым фермерхэм къэралыгъо IэпыIэгъоу арагъэкIыщтыр процент 30-кIэ нахьыбэ хъугъэ.

Урысыем и Гупчэ Банк и Къутамэ — Адыгэ Республикэм и Лъэпкъ банк.