ОшIэ-дэмышIэ тхьамыкIагъохэр къэмыгъэхъу­гъэн­хэмкIэ ыкIи ахэм къыздахьырэ гумэ­кIыгъохэр дэгъэзыжьыгъэнхэмкIэ, джащ фэ­дэу машIом зыкъымыштэнымкIэ АР-м и Комиссие изимычэзыу зэхэсыгъо зэрищагъ Адыгеим и ЛIышъхьэу КъумпIыл Мурат.

[caption id="attachment_133871" align="aligncenter" width="800"] Сурэтыр: ОшIэ-дэмышIэ IофхэмкIэ АР-м икъулыкъу.[/caption]

Ар зыфэгъэхьыгъагъэр Кощ­хьэблэ ыкIи Мыекъопэ районхэм ощхышхохэу ащыIагъэхэм къахэкIэу псыр къызэракIэуагъэм иIофыгъохэр ары. Мыщ иIофшIэн хэлэжьагъэх ведомствэхэм ыкIи къулыкъу зэфэшъхьафхэм, зэрар зыхьыгъэ чIыпIэхэм япащэхэр.

Шъугу къэтэгъэкIыжьы: ощхы­шхоу щыIагъэхэм апкъ къикIэу Кощхьэблэ районымкIэ къуа­джэу Фэдз ихэпIэ 90-рэ фэдизмэ, къутырэу Кармолино-­Гидроицкэм ихэпIэ 50-мэ псыр къакIэогъагъ.

Социальнэ мэхьанэ зиIэ псэуалъэхэр ахэм къахиубытагъэхэп.

[caption id="attachment_133872" align="aligncenter" width="800"] Сурэтыр: ОшIэ-дэмышIэ IофхэмкIэ АР-м икъулыкъу.[/caption]

Мыекъопэ районым ипсэупIэу Кужорскэми ихэпIэ 59-мэ псыр къатехьагъ, джащ фэдэу унэ зырызми арыхьагъ. ПсэупIэм электричествэр къылъыIэсы­жьыщтыгъэп.

«ЗэкIэ къулыкъухэу ыкIи ве­домствэхэу, муниципалитетхэм япащэхэу псынкIэу гумэкIыгъом икIэуххэм ядэгъэзыжьын хэлэжьагъэхэм сызэрафэразэр къэсэIо. ЗэкIэми япшъэрылъ агъэцэкIагъ, цIыфхэми къэралыгъо къулыкъушIэхэм анаIэ къызэратетыр зэхашIагъ. ДжырэкIэ анахь мэхьанэ зиIэр а гумэкIыгъом икIэуххэр пIэлъэ кIэкIым дэгъэзыжьыгъэнхэр, цIыфхэм тэрэзэу ящыкIэгъэ IэпыIэгъур ятыгъэныр ыкIи щыIэкIэ гупсэфым къыфягъэ­гъэзэжьыгъэныр ары», —къы­Iуагъ АР-м и ЛIышъхьэу КъумпIыл Мурат.

[caption id="attachment_133873" align="aligncenter" width="800"] Сурэтыр: ОшIэ-дэмышIэ IофхэмкIэ АР-м икъулыкъу.[/caption]

Урысыем ошIэ-дэмышIэ Iоф­хэмкIэ и Министерствэ Адыгэ РеспубликэмкIэ и ГъэIорышIапIэ ипащэу Станислав Илющенкэм къызэриIуагъэмкIэ, муниципалитет пстэуми акIуа­чIэрэ амал­хэу яIэхэмрэ агъэфедагъэх гумэкIыгъом идэгъэзыжьынкIэ. ЧIыпIэ пэпчъ штабхэр щызэ­хащагъэх. Къэгъэ­нэжьакIохэр цIыфхэм къафы­къокIыгъэ тхьамыкIагъом икIэ­уххэм ядэгъэзыжьын фежьа­гъэх. Ащ пае нэбгыри 144-рэ ыкIи техникэ 35-рэ ащ хэлэ­жьагъ.

Бригадэ гъэнэфагъэхэм псыр унэхэмрэ ахэм къапэIулъ чIыпIэхэмрэ къаращы, щагухэр ыкIи гъогухэр аукъэбзых, псынэхэм арыт псыр дезинфекцие ашIы. Районхэм яадминистрациехэм цIыфхэр зэшъощтхэ псыр аIэкIэгъэхьэгъэным иIоф зэхащагъ. Эпидемиологием ылъэныкъокIэ Iофхэм язытет санитарнэ къулыкъухэр лъэплъэх. Зэрарэу ахьыгъэр къизыдзэрэ комис­сиехэми яIофшIэн лъагъэкIуатэ.

Станислав Илющенкэм къы­Iуагъэхэм къатегущыIэзэ Адыге­им и ЛIышъхьэ къызэрэхигъэщыгъэмкIэ, чIыпIэхэр ащ фэдэ псышхохэм ащыухъумэгъэнхэм ылъэныкъокIэ мы аужырэ илъэс­хэм республикэм бэ щызэшIуа­хыгъэр. Джащ фэдэу нэпкъхэм ягъэпытэн епхыгъэ IофшIэн гъэ­нэфагъэхэри зэшIуахыгъэх. Ар джыри лъыгъэкIотэгъэн фае. Республикэм и ЛIышъхьэ хэушъхьафыкIыгъэу анаIэ зыты­раригъэдзагъэхэм ащыщ ведомствэхэм язэдэлэжьэныгъэ гъэпытэгъэным, зэдегъэштэныгъэ ахэлъэу ошIэ-дэмышIэгъэ гумэкIыгъохэм апэуцужьынхэм мэхьанэшхо зэряIэр.

АР-м и ЛIышъхьэ ипресс-къулыкъу