Урысые ыкIи араб университетхэм яректорхэм я Федерацие ия III-рэ форумэу Зэхэт Араб Эмиратхэм якъалэу Шарджа щыкIуагъэм зэгурыIоныгъэмрэ зэдэлэжьэныгъэмрэ афэгъэхьыгъэ зэзэгъыныгъэм щызэдыкIэтхагъэх. АКъУ-м иректорэу Мамый Даутэрэ Шарджи университетым иректорэу Хамид М.К. Аль-Наймийрэ аIапэхэр зэзэгъыныгъэм кIадзагъэх.

Адыгэ къэралыгъо университетым фэшъхьафэу ащ фэдэ зэзэгъыныгъэмэ арабхэр адыкIэтхагъэх Московскэ къэралыгъо университетэу Ломоносовым ыцIэ зыхьырэмрэ Апэрэ Мос­ковскэ къэралыгъо медицинэ университетэу Сеченевым ыцIэ зыхьырэмрэ. А Iофыгъом епхыгъэ мэфэкI зэхахьэм хэлэжьагъэх Урысыем иректорхэм я Союз ипрезидентэу, академикэу Виктор Садовничэр, араб университетхэм я Ассоциацие игенеральнэ секретарэу, профессорэу Амр Эззат Салам ыкIи Шарджи университетым ипрезидентэу, шейхэу Султан бин Ахмед Аль Касими.

Адыгэ къэралыгъо университетымрэ Шарджи университетымрэ зэгурыIоныгъэ азыфагу илъыным фэгъэхьыгъэ зэзэ­гъыныгъэм къыделъытэх апшъэ­рэ еджапIэхэм шIэныгъэмрэ гъэсэныгъэмрэ алъэныкъокIэ Iоф зэдашIэныр, зэгъусэхэу ушэтынхэр ашIынхэр, гъэсэныгъэ проектыкIэхэр агъэпсынхэр, академическэ программэхэм ахэлэжьэнхэр. Джащ фэдэу а зэзэгъыныгъэм ишIуагъэкIэ семинар-зэхэсыгъохэр, шIэныгъэ конференциехэр, нэмыкI Iоф­тхьабзэхэр рагъэкIокIынхэ алъэ­кIыщт.

Шарджи университетыр 1997-рэ илъэсым зэхащагъ, ар зыгъэпсыгъэр Шарджи ипащэу шейхэу ыкIи шIэныгъэлэжьэу Султан бен Мухаммед Аль-Касим. Араб хэгъэгухэм яуниверситет анахь дэгъуипшIымэ ар ахалъытэ.

Шъугу къэдгъэкIыжьын, Урысые ыкIи араб университетхэм яректорхэм я Федерацие яя III-рэ форумыр Зэхэт Араб Эмиратхэм якъалэу Шарджа жъоныгъуакIэм и 31-м къыщегъэжьагъэу мэкъуогъум и 1-м нэс щыкIуагъ. Урысыем иапшъэ­рэ еджапIэхэм ялIыкIо 50 ыкIи арабхэм алъэныкъокIэ 150-рэ Iофтхьабзэм хэлэжьагъэх. Ахэр Урысыем, Зэхэт Араб Эмиратхэм, Мысыр, Оман, Судан, Катар ыкIи Ливием ащыщыгъэх.

Адыгэ къэралыгъо университетым ипресс-къулыкъу