Хъунэго Рэщыдэ щытхъуцIэ къыфагъэшъошагъ
Адыгэ къэралыгъо университетым гумэкIыгъохэм адэлажьэрэ шIэныгъэ ушэтынхэмкIэ иинститут ипащэу Хъунэго Рэщыдэ Ростов дэт къэралыгъо экономическэ университетым ипрофессор гъэшIуагъэ хъугъэ. ЖъоныгъуакIэм и 30-м Ростов-на-Дону шIэныгъэхэм ясоветэу щырагъэкIокIыгъэм профессор гъэшIуагъэм иаттестат Хъунэго Рэщыдэ къыщыратыжьыгъ.
Хъунэго Рэщыдэ социологие шIэныгъэхэмкIэ доктор, профессор, Урысыем щызэлъашIэрэ философ ыкIи социолог, ащ иIофшIагъэхэм къахеубытэх социальнэ философиер, гъэсэныгъэм ыкIи гъэIорышIэным ясоциологие, политологиер, этнологиер, шъолъыр экономикэр, геоинформационнэ технологиехэр. ЗэкIэмкIи ащ монографие 15, егъэджэн ыкIи методическэ пособие 13 къыдигъэкIыгъэх, статья 150-рэ къыхиутыгъ.
1996-рэ илъэсым къыщегъэжьагъэу 2019-рэ илъэсым нэс Хъунэго Рэщыдэ Адыгэ къэралыгъо университетым иректорыгъ, 2020-рэ илъэсым къыщыублагъэу Адыгэ къэралыгъо университетым гумэкIыгъохэм адэлажьэрэ шIэныгъэ ушэтынхэмкIэ иинститут ипащ, философиемрэ социологиемрэ якафедрэ ипрофессор, социологие культурэмкIэ диссертационнэ советым итхьамат. Р. Хъунагор джащ фэдэу РАН-м социологиемкIэ и Институт ыкIи Абхъаз къэралыгъо университетымрэ Къыблэ федеральнэ университетымрэ ядоктор гъэшIуагъ.
Адыгэ къэралыгъо университетым ипресс-къулыкъу