Кощхьэблэ районым ит къуа­джэу Фэдз тхьамафэкIэ узэкIэIэбэжьмэ ощхэу къещхы­гъэм зэрарэу рихыгъэм ыуж зыкъишIэжьынэу игъо имыфэзэ джыри ушэтыпIэ ифагъ.

[caption id="attachment_133800" align="aligncenter" width="800"] Сурэтыр: ОшIэ-дэмышIэ IофхэмкIэ къулыкъур[/caption]

Ощхыпсэу чIыпIэ хэIэтыкIыгъэхэм къячъэхырэр непэ къоджэдэсхэм джыри къакIэхьагъ, псыхъо ­чъэрыр угу къыгъэкIэу ар урамхэм арычъэщтыгъэ, щагухэм, унэхэм яблэщтыгъэп. Чылэм идэхьапIэрэ ыгупчэрэ анахьэу иягъэ зэригъэкIыгъэхэр.

Кощхьэблэ районым ипащэу Хьамыр­зэ Заур къызэриIуагъэмкIэ, цIыфышъхьэр псау, псым ыгъэфыкъогъэ псэупIэ пчъа­гъэр джыри гъэнэфагъэу ашIэрэп, къа­лъытэщт. Мыщ фэдэ хъугъэ-шIагъэм епхыгъэу зэшIуахын фэе пстэури зэрахьэ.

Адыгэ Республикэм и ЛIышъхьэу КъумпIыл Мурат иунашъокIэ тишъолъыр ирайонхэм арыт хэушъхьафыкIыгъэ техникэр чIыпIэм къыращэлIагъ, лъэтемытэу ошIэ-дэмышIагъэм ебэнынхэу рагъэжьагъ.

ОшIэ-дэмышIэ IофхэмкIэ республикэ къулыкъум къызэритыгъэмкIэ, ГъэIоры­шIапIэм ипащэхэр, оперативнэ купыр Фэдз кIуагъэх ащ щыпсэухэрэм ищыкIэгъэ IэпыIэгъур арагъэгъотыным пае. — ТхьамафэкIэ узэкIэIэбэжьмэ псыр зыкIэогъэгъэ псэупIэхэм джыри къа­кIэ­хьагъ, щагухэм адэт, зэрыхьэгъэ унэ­хэри щыIэх, — къыфиIотагъ «Адыгэ макъэм» Фэдз къоджэ псэупIэм ипащэу Лъоснэкъ Рэмэзан. — ОшIэ-дэ­мышIа­гъэм илъэшыгъэ блэкIыгъэм щы­Iагъэм фэдэ хьазыр. Техникэу районхэм арытыр джырэ уахътэм етIупщыгъэу къекIуалIэ, псыдэчъыпIэхэр ашIых.

Пчыхьэм сыхьатыр 8-м Рэмэзан зэ­дэгущыIэгъоу дэтшIыгъэм ехъулIэу ощхыр уцужьыгъэу, къакIэогъэ псыр тIэкIу-тIэкIоу ехыжьэу къытиIуагъ. Зэрарыр ко­миссиеу зэхащагъэм непэ джыри къылъытэщт. Iофхэр зэрэкIорэм Адыгеим и ЛIышъхьэу КъумпIыл Мурат ежь ышъхьэкIэ лъэплъэ.

ОшIэ-дэмышIагъэу блэкIыгъэ зыгъэпсэ­фыгъо мафэхэм щыIагъэм джащ фэдэу къин хидзагъэх Кощхьэблэ районым ит нэмыкI къоджэ псэупIэхэри. Ащ фэгъэ­хьыгъэ къэбарыр я 3-рэ нэкIубгъом ижъугъотэщт.