Мэкъуогъум и 3-м Кощхьэблэ районым ощхы­шхо къызэрэщещхыгъэм къыхэкIэу псыхъоу Неволькэр нэпкъым къы­дэугъ ыкIи Майскэ къоджэ псэупIэм псыр дэлъэдагъ.

[caption id="attachment_133776" align="aligncenter" width="800"] Сурэтыр: МЧС-м иотделэу Кощхьэблэ райным щыIэр.[/caption]

Ащ къыхэкIэу къутырэу Краснэм ыкIи поселкэу Майскэм ящагу 79-мэ псыр акIэхьагъ, ахэм нэбгыри 178-рэ ащэпсэу, нэбгырэ 43-р кIэлэцIыкIух, уни 7-мэ псыр арыхьагъ.

Шъугу къэдгъэкIыжьын, мыщ ыпэ, тхьамафэкIэ узэкIэIэбэжьмэ, къуаджэу Фэдз ыкIи къутырэу Вольнэм ащыпсэухэрэм ящагу 699-мэ псыр къакIэуагъ, цIыфышъхьэ хэкIодагъэп. Ау псыр лъэшэу унэхэм арыхьагъ, хатэм лэжьыгъэу дэлъыгъэр зыпари къэмынэу псым ыгъэ­кIодыгъэх, яунэхэм фыкъуагъэ­хэр афишIыгъэх.

Кощхьэблэ район админист­рацием тызэрэщигъэгъоза­гъэм­кIэ, Майскэ къоджэ псэупIэм ощхышхоу щыIагъэм ыпкъ къи­кIэу псыр унабэмэ, щагубэмэ адэхьагъ, чэухэр зэщигъэкъуагъэх. ГумэкI хэфэгъэ цIыфхэм, анахьэу нэжъ-Iужъхэм адэжь кIохэзэ Iофхэм язытет заща­гъэгъуазэ, псыр, гъомылапхъэр аIэкIагъахьэ. ПэшIорыгъэшъэу къызэралъытагъэмкIэ, фермер­хэм ячIыгу гектар 686-м фэдизмэ псыр акIэхьагъ, лэжьыгъэхэр ыгъэкIодыгъэх.

Псыкъиуным къыздихьыгъэ тхьамыкIагъом щыухъумэгъэнхэм ыкIи гумэкIыгъохэр дэгъэзыжьыгъэнхэм фэшI жъоныгъуа­кIэм и 26-м къыщыублагъэу къулыкъу зэфэшъхьафхэм Кощ­хьэблэ районым гъэлъэшыгъэ шIыкIэм тетэу Iоф щашIэ.

Псыкъиуным къызыдихьыгъэ тхьамыкIагъом ыгъэгумэкIэу, Iофхэм язытет зыфэдэм зыщигъэгъозэнэу, цIыфхэм ягумэкIыгъохэр адигощынэу Адыгеим и ЛIышъхьэу КъумпIыл Мурат а мэфэ дэдэм Майскэ къоджэ псэупIэм кIуагъэ. ГумэкIыгъом идэгъэзыжьын фэгъэзэгъэ пстэу­ми яIофшIэн нахь агъэлъэ­шынэу, псыр зыкIэогъэ цIыфхэм анаIэ атырагъэтынэу респуб­ликэм ипащэ афигъэпытагъ. Ежь ышъхьэкIэ Iофыр зэрэлъыкIуа­тэрэм ынаIэ тет.

— Псыкъиуным зизэрар къе­кIыгъэхэм зэкIэми ящыкIэгъэ IэпыIэгъур ядгъэгъотыщт, — къыIуагъ АР-м ЛIышъхьэу КъумпIыл Мурат.

[caption id="attachment_133777" align="aligncenter" width="800"] Сурэтыр: МЧС-м иотделэу Кощхьэблэ райным щыIэр.[/caption]

АР-м граждан зыкъэухъумэжьынымкIэ ыкIи ошIэ-дэмышIэ IофхэмкIэ и Комитет иотделэу Кощхьэблэ районым щыIэм ипэщэ IэнатIэ зыгъэцэкIэрэ Тхьагъу Руслъан къызэрэтиIуагъэмкIэ, мы мафэм ехъулIэу псыр зэкIэкIожьыгъ. ЦIыфхэм ящыIэныгъэкIэ ыкIи япсауныгъэ­кIэ зыпари щынагъо щыIэп. Ахэр зэрэпсэущтхэм фытегъэпсыхьэгъэ системэхэм зыпкъ итэу Iоф ашIэ. Аварийнэ-гъэцэкIэжьын IофшIэнхэр рагъэкIокIых, урам­хэм ыкIи чIыунэхэм псыр адащы, щагухэр, урамхэр аукъэ­бзых, ахэм ятIэу, мыжъоу, хэ­кIэу ателъыгъэр атырахыжьы. Джащ фэдэу псыр зэрэкIощт къуладжэр атIы.

— ЧIыпIэ къин ифагъэхэм ящыкIэгъэ IэпыIэгъур ятэгъэ­гъоты. Псыр зэкIэкIожьыгъ нахь мышIэми, ар зиунэ ихьагъэхэм яIофхэр дэгъоп. УплъэкIунхэр зэхэзыщэрэ купхэм ахэтхэм псыр зыкIэогъэ унагъохэр къа­кIухьэх, тхьамыкIагъо хэфагъэ­хэм IэпыIэгъоу ящыкIагъэр зэрагъашIэ, IофшIэнхэр джыри лъагъэкIуатэх, — къыIуагъ Тхьагъу Руслъан. Кощхьэблэ район админист­рацием къызэрэщаIуагъэмкIэ, АР-м и ЛIышъхьэ оперативнэ штабым пэщэныгъэ дызэри­хьэзэ, къулыкъу зэфэшъхьафхэр игъусэхэу гумэкIыгъом идэгъэзыжьын ыуж итых. Министерст­вэхэр, къулыкъухэр зэкIэ къы­хигъэлажьэхи, ящыкIэгъэ техникэр икъоу аIэкIагъэхьагъ, ащ ишIуагъэкIэ щагухэм адэтыгъэ псыр дащыгъ.

[caption id="attachment_133778" align="aligncenter" width="800"] Сурэтыр: МЧС-м иотделэу Кощхьэблэ райным щыIэр.[/caption]

Гупчэм къикIырэ зашъохэрэ псым изытет зэрэдэим къы­хэ­кIэу, ар зэфашIыгъэу псы къабзэр цIыфхэм къафащэ. Сомэ мин 88500-рэ зыосэ литритф зэрыфэрэ псы бэшэрэб 1500-рэ цIыфхэм аIэкIагъэхьагъ. Ащ нэ­мыкIэу псэупIэхэр дезинфекцие ашIых. Комиссие зэхащагъэу унагъохэр къакIухьэхэзэ, псэу­пIэхэм фыкъуагъэу афэхъугъэ­хэр атхых, ахэм ягъэцэкIэжьын пэIухьащт мылъкур къырадзэ. Псыр зиунэ ихьагъэхэу, чIыпIэ къин ифэгъэ цIыфхэм зэкIэми IэпыIэгъу агъотыщт.

Шъугу къэдгъэкIыжьын, мыщ ыпэкIэ АР-м иминистрэхэм я Кабинет иIэпэчIэгъэнэ фонд щыщ ахъщэ Кощхьэблэ ыкIи Мыекъопэ районхэм ащыпсэу­хэу псыкъиуным зизэрар екIыгъэхэм IэпыIэгъу аратынэу Адыгеим и ЛIышъхьэ унашъо ышIыгъ. Ащ къыпкъырыкIыхэзэ Кощхьэблэ районым ищагу 699-мэ ябысымхэм сомэ мин 20 зырыз, псыр зыкIэхьэгъэ унэ 58-мэ ябысымхэм сомэ мин 50 зырыз аратыщтых. Джащ фэдэу Мые­къопэ районым ащыпсэухэрэм яхэтэ 20 фэдизмэ псыр къызкIэуагъэхэм сомэ мин 20 зырыз, зиунэ ихьэгъэ бысыми 6-мэ сомэ мин 50 зырыз аратыщтых.

Шъугу къэдгъэкIыжьын, тхьамэфитIукIэ узэкIэIэбэжьмэ, ощхышхоу щыIагъэм ыпкъ къи­кIэу псыхъоу Фарзэ къызеум, Краснодар краим и Мостовской район ифедеральнэ автомобиль гъогоу Мыекъуапэ пхырыкIырэм телъыгъэ лъэмыджыр зэщигъэкъуагъ. Ар ашIыжьыгъ ыкIи машинэхэр рыкIонхэ алъэ­кIынэу къызэIуахыжьыгъ.

Синоптикхэм къызэратыгъэм­кIэ, мэкъуогъум Гурыт Азием жьы фабэр ыкIи Средизем­номорьем шынэгъакIэ зыхэлъ жьыр къарыкIыщт. Ащ къыхэкIэу температурэр гурытымкIэ шап­хъэхэм ашIокIыщт, мафэхэр къы­хэкIыщтых ощх къещхэу ыкIи ошъу къехэу. Мы тхьамафэм ыкIэхэм Адыгеим джыри чIыпIэ­чIыпIэу къыщещхыщт. Анахьэу Iофыр зыщыдэищтыр къушъхьэ­хэр ыкIи ахэм къапэблэгъэ районхэр арых. Мыщ фэдэу оялэу зыщытыгъэу къашIэжьырэр 2001-рэ ыкIи 2011-рэ илъэс­хэр ары.

КIАРЭ Фатим. Сурэтхэр: МЧС-м иотделэу Кощхьэблэ райным щыIэр.