КъэбархэмкIэ инфраструктурэм зэрар езыхыхэрэм япшъэдэкIыжь
Урысые Федерацием къэбархэмкIэ иинфраструктурэ хэбзэнчъэу дэзекIохэрэм, зэрар ащ езыхыхэрэм уголовнэ пшъэдэкIыжь зэрарагъэхьырэм анаIэ тырарегъадзэ Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ.
Урысые Федерацием къэбархэмкIэ иинфраструктурэ зэрар езыхыхэрэр Урысыем и Уголовнэ кодекс ия 274.1-рэ статья къызэрэдилъытэрэм тетэу агъэпщынэх.
КъэбархэмкIэ инфраструктурэм зэрар рахымэ ашIоигъоу компьютер программэхэр зэхэзгъэуцохэрэм, аIэкIэзгъахьэхэрэм, зыгъэфедэхэрэм е ащ итыр зыгъэкIодыхэрэм, зэблэзыхъухэрэм, тезышIыкIыхэрэм егъэзыгъэ Iоф хэлъэу илъэситфэ Iоф арагъашIэ, илъэситIо дагъэсых, е илъэситIум къыщегъэжьагъэу илъэситфым нэс хьапс атыралъхьэ, ащ дакIоу тазыр сомэ мин 500-м къыщыублагъэу сомэ миллионым нэс арагъэты.
Урысые Федерацием къэбархэмкIэ иинфраструктурэ къагъэгъунэрэ къэбарэу IэкIэлъыр нэмыкI компьютер программэхэр къызфагъэфедэхэзэ ямурад бзаджэхэр къадэхъунхэм пае инфраструктурэм зэрар езыхыхэрэм илъэситф пIалъэкIэ егъэзыгъэ хэлъэу Iоф арагъашIэ, сомэ мин 500-м къыщыублагъэу сомэ миллионым нэс арагъэты, е лэжьапкIэу иIагъэр (нэмыкI федэу къыIэкIахьэрэр) илъэсищым телъытагъэу рагъэты, е илъэситIум къыщыублагъэу илъэсихым нэс хьапс тыралъхьэ, ащ дакIоу сомэ мин 500-м къыщегъэжьагъэу миллионым нэс рагъэты.
Компьютер къэбарэу къагъэгъунэрэр е Урысые Федерацием иинфраструктурэ IэкIэлъ къэбарыр, джащ фэдэу къэбар-телекоммуникационнэ хъытыухэм, автоматизированнэ системэхэм, электросвязым ихъытыухэм къарыхьэхэрэр къызIэкIэзгъахьэхэзэ Урысые Федерацием къэбархэмкIэ иинфраструктурэ зэрар езыхыхэрэм илъэситфым нэс егъэзыгъэкIэ Iоф арагъашIэ, IэнэтIэ гъэнэфагъэхэр нэужым аIыгъынхэ фимытхэу ашIых.
Зы нэбгырэм е нэбгырэ заулэм яшIэ зэхэлъэу, зэзэгъыгъэхэу къулыкъу IэнатIэу аIыгъыр къызфагъэфедэзэ ащ фэдэ бзэджэшIагъэхэр зэрахьэхэмэ, илъэсищым къыщыублагъэу илъэсиим нэс хьапс атыралъхьэ, илъэсищым нэс IэнэтIэ гъэнэфагъэхэр аIыгъынхэ фимытхэу ашIы.
ЫпшъэкIэ зигугъу къэтшIыгъэ бзэджэшIагъэхэм кIэух тхьамыкIагъохэр зафэхъухэкIэ, илъэситфым IэнэтIэ гъэнэфагъэхэр ыIыгъынхэ фимытхэу ашIы.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ ипресс-къулыкъу