Ахъщэ-чIыфэ политикэм иIофыгъохэм защытегущыIэ­гъэхэ общественнэ упчIэжьэгъу зэхэсыгъо Урысыем и Банк апэрэу къэралыгъом икъыблэ щызэхищагъ.

[caption id="attachment_133734" align="aligncenter" width="800"] Сурэтыр: АР-м и Лъэпкъ банк.[/caption]

Видеозэпхыныгъэ шIыкIэм тетэу УФ-м и Гупчэ Банк и Къутамэ — АР-м и Лъэпкъ банк Iофтхьабзэм хэлэжьагъ. Экономикэ упчIэхэр зэхафынхэу зэхэсыгъом къырагъэблэгъагъэх Адыгеим ихэбзэ къулыкъухэм ялIыкIохэр, экспертхэр, шIэныгъэ сообществэм ыкIи бизнесым хэтхэр.

Iофтхьабзэм изэхэщакIохэм мурадэу яIагъэр бизнесым, общественнэ организациехэм, хэбзэ къулыкъухэм ялIыкIохэм ыкIи экспертхэм яшIошIхэм защагъэгъозэныр ары.

Мы Iофтхьабзэм ишIуагъэкIэ обществэм инфляцием ыкIи ахъщэ-чIыфэ политикэм еплъыкIэу фыриIэр нахь зэхэфыгъэ хъущт ыкIи Iофыгъоу зытегущыIагъэхэм изэфэхьысыжьхэр тапэкIэ унашъохэр ашIы хъумэ къыдалъытэщтых.

Iофтхьабзэр едзыгъуитIоу зэтеутыгъагъ. Апэрэ Iахьыр Iэнэ хъурэе шIыкIэм тетэу кIуагъэ. Ащ хэлэжьагъэх Урысые Банкым и Тхьаматэ игуадзэу А. Заботкиныр, Урысые Банкым ахъщэ-чIыфэ политикэмкIэ и Департамент ипащэу К. Тремасовыр, хэбзэ гъэцэкIэкIо къулыкъум, бизнесым ялIыкIохэр. ЯтIонэрэ Iахьым зэхэсыгъом хэлажьэхэрэр яшIошIхэмкIэ зэхъожьыгъэх.

УпчIэ шъхьаIэу зытегущыIагъэхэм ащыщ 2017 — 2021-рэ илъэсхэм щыIэгъэ инфляцие цIыкIур ыкIи 2022-рэ илъэсым инфляцие инэу щыIагъэр компаниехэм ыкIи цIыфхэм зэрэзэхашIагъэр.

ЩыIэкIэшIу уиIэным, бизнесым упылъыным афэшI инфляциер сыд фэдизын фая? Компанием иIофшIэн ыгъэпсынымкIэ чIыфэм иштэн мэхьанэу иIэр сыд фэда?

А. Заботкиным къызэриIуа­гъэмкIэ, ахъщэ-чIыфэ политикэм игъэIорышIэн мэхьанэу иIэр уасэм зыпкъитыныгъэ иIэныр, ащ къикIырэр инфляциер цIыкIуныр ары. А мурадыр къыдэ­хъуным пае Урысыем и Банк 2015-рэ илъэсым къыщегъэжьагъэу маркетингыр къызфегъэфедэ ыкIи ащ ишIуагъэкIэ къэкIо.

— Инфляциер проценти 4-м зэрэшIотымыгъэкIыщтым тыпылъыгъ ыкIи ар къыд­дэхъугъ. Обществэм ар зэрэзэхишIагъэм ыкIи еплъы­кIэу фыриIэм зыщыдгъэгъуазэмэ тшIоигъоу мы Iоф­тхьабзэр зэхэтщагъ. Джащ фэдэу тапэкIи мы мурадым ты­къызэрэфэкIощтым тызэдегупшысэн фае, — къы­Iуагъ А. Заботкиным.

Урысыем и Банк и Къэралыгъо гъэIорышIапIэу Къыблэм щыIэм ипащэу Е. Эберенц къы­зэриIуагъэмкIэ, илъэсым телъы­тэгъэ инфляциеу Урысыем щыIэр пштэмэ къыблэм ар щынахьыб. ГущыIэм пае, 2017-рэ илъэсым къыщегъэжьагъэу 2021-рэ илъэ­сым нэс гурытымкIэ къэралыгъом инфляциеу щыIагъэр проценти 4,2-рэ, къыблэм а пчъагъэр проценти 4,4-рэ фэдиз. Ар зэлъытыгъэу къыIуагъэр Къыблэ федеральнэ ыкIи Темыр-Кавказ федеральнэ шъо­лъырхэм ащы­псэухэрэм гъомылапхъэу агъэфедэхэрэм апэIуагъахьэрэр зэ­рэнахьыбэр ары.

Бизнесым, хэбзэ къулыкъум, общественнэ организациехэм ялIыкIохэм ыкIи шIэныгъэлэжьхэм экономикэм епхыгъэ упчIэу къаIэтыгъэхэмкIэ яшIошIхэр къыраIотыкIыгъэх. Зэхэсыгъор сыхьатиплIым къыриубытэу кIуа­гъэ. КIэухым журналистхэм яупчIэхэм джэуапхэр къаратыжьыгъэх.

Урысыем и Банк зыкI къэралыгъо ахъщэ-чIыфэ политикэм ипроект ыгъэхьазыр хъумэ зэхэ­сыгъом хэлэжьэгъэ экспертхэм яшIошIхэр къыдалъытэщтых.

КIАРЭ Фатим.