Хьисапыр атыгъ
Гурыт еджапIэр къэзыухыхэрэм хьисапымкIэ заушэтыгъ. Мы аужырэ илъэсхэм ар тIоу гощыгъэу аты, базовэ ыкIи профильнэ лъэныкъомкIэ зэтыраутыгъэх.
[caption id="attachment_133709" align="aligncenter" width="800"] Сурэтыр: А. Iэшъын.[/caption]
Апшъэрэ еджапIэм чIэхьан мурад зимыIэхэм е хьисапыр яеджэнкIэ зимыщыкIэгъэщтхэм базовэ программэм тетэу аты, профильнэр мы предметыр нахь къызыфэфедэжьыщтхэм къыхахы. БлэкIыгъэ илъэсхэм мэфэ зэфэшъхьафхэм ушэтыныр зэхащэщтыгъэмэ, мыгъэ ар зы мафэ ашIыгъ, мэкъуогъум и 1-м шъхьадж зэпхыгъэ чIыпIэм екIолIагъ.
АР-м и Къэралыгъо аттестационнэ къулыкъу къызэрэщытаIуагъэмкIэ, мы мафэм базовэ шIыкIэм тетэу нэбгырэ 1038-мэ, профильнэмкIэ 659-мэ заушэтыгъ. Ушэтыныр зыщатырэ чIыпIэ 11-мэ Iоф ашIагъ, ар зэрифэшъуашэу кIуагъэ, шапхъэхэм адимыштэу зи агъэунэфыгъэп.
Мыекъопэ лицееу N 19-м мы мафэм профильнэ хьисапыр нэбгыри 141-мэ щатыгъ. ЗэкIэмкIи аудиторие 11-мэ ныбжьыкIэхэр ачIэсыгъэх. Апэрэ къатым зы аудиторие щагъэпсыгъэу зипсауныгъэкIэ илэгъухэм акIэмыхьэрэ зы нэбгырэм зыщиушэтыгъ. ПэшIорыгъэшъэу ащ ипсауныгъэ изытет ауплъэкIугъ. IофшIэнхэр ыгъэцэкIэнхэмкIэ ащ нахь охътабэ иIагъ.
— НыбжьыкIэхэр фэхьазырхэу ушэтыным къекIуалIэх. Рэхьатныгъэ ахэлъэу яшIэныгъэхэр къагъэлъэгъоным пае пэшIорыгъэшъ Iофтхьабзэхэр афызэхэтщагъэх, ащ ишIуагъэ къызэрэкIуагъэр нэрылъэгъу. Непэ пшъэдэкIыжь ин тиI, класс пэпчъ кIэлэегъэджэ тIурытIу ачIэт, ащ нэмыкIэу общественнэ лъыплъэкIуищ ахэт, мы илъэсым ахэм япчъагъэ нахь макI, сыда пIомэ онлайн шIыкIэм тетэу ушэтыным лъыплъэхэр мымакIэу щыIэх. IофшIэнхэр аудиторием къыщыдагъэкIых ыкIи хьазырхэр ыпэрапшIэу сканировать ашIыжьых, — еIо пунктым ипащэ.
Сыхьатыр 10-м конвертхэр къызэIуахыгъэх, IофшIэнхэр рагъэжьагъэх. Сыхьатищрэ такъикъ 55-рэ кIэлэеджакIохэр гъэцэкIэнхэм апылъыгъэх. Мэкъуогъум и 16-м хьисапымкIэ базовэ ушэтыным изэфэхьысыжьхэр къэнэфэщтых, профильнэр мэкъуогъум и 19-м. Ар зыфэмытыгъэхэм е ушъхьагъу зэфэшъхьафхэм апкъ къикIыкIэ ушэтыным къемыкIолIэшъугъэхэм IэпэчIэгъэнэ мафэ яIэщт.
ЕджапIэр къэзыухыхэрэм мы мафэм ехъулIэу географиемкIэ, литературэмкIэ, химиемкIэ ыкIи урысыбзэмкIэ заушэтыгъах. Мэкъуогъум и 5-м тарихъыр ыкIи физикэр къыхэзыхыгъэхэм яшIэныгъэхэр къагъэлъэгъощтых.
ДЕЛЭКЪО Анет.