Сабый ибэхэм ыкIи ны-тыхэр зылъымыплъэжьхэу къэнэгъэ кIэлэцIыкIухэм псэупIэ ягъэгъотыгъэным игумэкIыгъохэм, ахэм яфитыныгъэхэр зэтегъэуцожьыгъэнхэм ыкIи IэпыIэгъу афэхъугъэным афытегъэпсыхьэгъэ Iэнэ хъурае Мыекъопэ къэлэ прокуратурэм щыкIуагъ. Iофтхьабзэр зэрищагъ зыныбжь имыкъугъэхэм ыкIи ныбжьыкIэхэм яхэбзэ фитыныгъэхэм ягъэцэкIэнкIэ ыкIи алъыплъэгъэнымкIэ АР-м ипрокурор иIэпыIэгъоу Елена Алексейцевам.

[caption id="attachment_133695" align="aligncenter" width="800"] Сурэтыр: А. Iэшъын[/caption]

Iэнэ хъураем хэлэжьагъэх АР-м ыкIи Мыекъуапэ ипрокуратурэ, кIэлэцIыкIум ифитыныгъэхэр къэухъумэгъэнымкIэ Уполномоченнэ аппаратэу АР-м щыIэм, АР-м гъэсэныгъэмрэ шIэныгъэмрэкIэ и Министерствэ, Адыгэ Республикэм псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ и Министерствэ, Мыекъопэ къэлэ администрацием ялIыкIохэр, журналистхэр.

Е. Алексейцевам Iофтхьабзэр къызэIуихызэ къыкIигъэтхъыгъ прокуратурэм иIофшIэн апэрапшIэу зыфэгъэзагъэр кIэлэцIыкIухэм, сабый ибэхэм ыкIи ны-тыхэр зылъымыплъэжьхэу къэнагъэхэм, джащ фэдэу социальнэу мыухъумэгъэ цIыфхэм (ахэм ахэхьэх гъот макIэ зиIэ унагъохэр, сабыибэ зиIэхэр ыкIи федеральнэ хэбзэгъэуцугъэм къызэригъэ­нафэу социальнэ IэпыIэгъу зищыкIэгъэ унагъохэр) яфитыныгъэхэр къэухъумэгъэнхэр. Анахьэу прокуратурэм ынаIэ зытыригъэтыхэрэм ащыщ сабый ибэхэм ыкIи ны-тыхэр зылъымыплъэжьхэу къэ­нэгъэ кIэлэцIыкIухэм унэхэр ягъэгъотыгъэнхэм игумэкIыгъо.

Е. Алексейцевам къызэриIуагъэмкIэ, сабый ибэхэм унэхэр ягъэгъотыгъэнхэм епхыгъэу хэбзэгъэуцугъэр гъэцэкIагъэ зэрэхъугъэм изэфэхьысыжьхэм къызэрагъэнэфагъэмкIэ, республикэм ихэбзэ къулыкъухэм мы лъэныкъом сыд фэдизэу анаIэ тырагъэтми, кIэлэцIыкIу ибэхэм игъом псэупIэхэр арагъэгъотыхэрэп. Сабый ибэхэм яфитыныгъэхэр къэухъу­мэгъэнхэмкIэ Iофыр къызэтезыгъэуцорэр икъоу ахъщэ къызэрамытIупщырэр ары. Джащ фэдэу уполномоченнэ къулыкъу­хэм япшъэрылъхэр зэрифэшъуашэу агъэцакIэхэрэп.

Илъэс къэс сабый ибэхэм унэхэр ягъэгъотыгъэнхэм епхыгъэу республикэм ипрокуратурэ хэукъоныгъэхэр къыхегъэ­щых. Мы мафэм ехъулIэу тишъолъыркIэ ыпшъэкIэ зигугъу къэтшIыгъэхэм ахахьэу нэбгырэ 800-м ехъур псэупIэ учетым щыт, ахэм азыныкъо нахьыбэм унэ зэрагъэгъотынэу фитыныгъэ яI, ау ар гъэцэкIагъэ хъугъэп.

— Республикэ прокуратурэм уп­лъэкIунэу ышIыгъэхэм къызэрагъэлъэгъуагъэмкIэ, 2022-рэ илъэсым телъытагъэу сабый ибэхэм псэупIэ ягъэгъотыгъэнымкIэ АР-м ибюджет сомэ миллион 80-у къыдыхэлъытэгъагъэр миллиони 105-м нагъэсыгъ. 2023-рэ илъэсым а пчъагъэр сомэ миллиони 150-рэ мэхъу. 2023-рэ илъэсым сабый ибэхэу ыкIи ны-тыхэр зылъымыплъэжьхэу къэнэгъэ кIэлэцIыкIу­хэм псэупIэ ягъэгъотыгъэным фэшI федеральнэ гупчэм ахъщэ IэпыIэгъу къытIупщыным щы­гу­гъ­хэу АР-м и ЛIышъхьэ Урысыем псэолъэшIынымкIэ и Министерствэ зыфигъэзагъ. Мы программэр икъоу гъэцэкIагъэ хъунымкIэ сомэ миллиард 1, 4-м ехъу ищыкIагъ, — къыIуагъ Е. Алексейцевам.

МыщкIэ прокурорым щысэхэр къыхьыгъэх. ГущыIэм пае, сабый ибэхэм псэупIэ арагъэгъотынымкIэ 2022-рэ илъэсым Теуцожь межрайон прокуратурэр даоу къырахьылIагъэм зыхэплъэм ыуж муниципальнэ образованиеу «Адыгэкъалэ» ипащэ чIыпIэ бюджетым щыщ сомэ миллиони 3,5-рэ афитIупщи, республикэ бюджетым иахъщэ хагъэхъожьи, зытефэхэрэм псэупIи 2 афащэфыгъ.

Джащ фэдэу псэупIэу афащэфыгъэхэр санитар ыкIи техническэ шапхъэхэм адимыштэу прокурорхэм хэукъоныгъэхэр къыхагъэщыгъэх. Лажьэ зиIэхэм пшъэ­дэкIыжь арагъэхьыгъ. Мы аужырэ илъэси 2-м къыкIоцI хэушъхьафыкIыгъэ псэупIэ фондым къыхэ­гъэкIыгъэу хэбзэ къулыкъухэм сабый ибэхэм псэупIэ арагъэгъотыным фэгъэ­хьыгъэу прокурорхэм ядэо 19-мэ хьыкумхэм адырагъэштагъ. КIэлэцIыкIухэм зыщалъыплъэхэрэ ыкIи зыщапIухэрэ чIыпIэ къулыкъухэм алъэныкъокIи хэукъо­ныгъэхэр мымакIэу къыхагъэщыгъэх.

Адыгэ Республикэм псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ и Министерствэ иотдел ипащэу Ныбэ Руслъан къызэриIуа­гъэмкIэ, сабый ибэхэм псэупIэхэр ягъэ­гъотыгъэнхэм 2023-рэ илъэсым респуб­ликэм сомэ миллиони 177,5-рэ щыпэIуа­гъэхьащт. Ащ щыщэу сомэ миллиони 150-р республикэ бюджетым къыхэгъэ­кIыгъ, федеральнэ гупчэм сомэ миллион 27,5-рэ къетIупщы. Мы IэпыIэгъум ишIуа­гъэкIэ псэупIэ 73-рэ къащэфынэу агъэ­нафэ. Мы мафэм ехъулIэу нэбгырэ 32-мэ псэупIэхэр арагъэгъотыгъэх.

Мы лъэныкъомкIэ агъэцакIэхэрэр, гумэкIыгъоу яIэхэр ведомствэхэм ялIыкIохэм къаIотагъэх. ШIуагъэ къытэу IофшIэныр зэхащэнымкIэ яшIошIхэмкIэ зэхъожьыгъэх.

КIАРЭ Фатим.