КIэлэцIыкIухэм якъэухъумэн и Дунэе мафэ тефэу Урысые Федерацием и Правительствэ и Тхьаматэ игуадзэу Татьяна Голиковамрэ Урысые Федерацием просвещениемкIэ иминистрэу Сергей Кравцовымрэ кIэлэцIыкIу IыгъыпIэхэм якъызэIухынкIэ Урысые онлайн-марафон зэхащэгъагъ.

[caption id="attachment_133630" align="aligncenter" width="800"] Сурэтыр: А. Гусев[/caption]

Зы мафэм къыкIоцI хэгъэгум ишъо­лъыр 12-мэ кIэлэцIыкIу IыгъыпIэ 19 къащызэIуахыгъ, ахэм зыкIэ ащыщ АдыгеимкIэ Шэуджэн районым ит къутырэу Тихоновым къыщызэIуахыгъэ кIэлэцIыкIу IыгъыпIэу «Солнышко» зыфиIорэр.

Республикэм ыцIэкIэ мы Iофтхьабзэм хэлэжьагъ АР-м и ЛIышъхьэу КъумпIыл Мурат. Джащ фэдэу ащ щыIагъэх Адыгэ Республикэм и Къэралыгъо Совет — Хасэм и Тхьаматэу Владимир Нарожнэр, АР-м гъэсэныгъэмрэ шIэныгъэм­рэкIэ иминистрэ ипшъэрылъхэр зыгъэцэкIэрэ Евгений Лебедевыр, Шэуджэн районым ипащэу Аулъэ Рэщыд.

Iофтхьабзэр къызэIуихызэ УФ-м и Правительствэ и Тхьаматэ игуадзэу Татьяна Голиковам къызэрэхигъэщыгъэм­кIэ, Хэгъэгум и Президентэу Владимир Путиным пшъэрылъ къыгъэуцугъ мы илъэсым ыкIэм нэс УрысыемкIэ кIэлэцIыкIу IыгъыпIэм чIэхьан фаеу щытхэм япроценти 100-м чIыпIэ арагъэ­гъотынэу.

Лъэпкъ проектэу «Демографиер» а гухэлъым фытегъэпсыхьагъэу щыт. 2017-рэ илъэсым къыщыублагъэу 2023-рэ илъэсым нэс а гухэлъхэм сомэ миллиарди 166-рэ апэIуагъэхьагъ, кIэлэцIыкIу мин 235-м ехъу зычIэфэщт IыгъыпIэ 1623-рэ а уахътэм къыкIоцI дгъэпсыгъэ. Ар дэгъу, гъэхъэгъэшху. Джащ фэдэу унэе кIэлэцIыкIу IыгъыпIэхэри ашIых, 2020-рэ илъэсым къыщыублагъэу кIэлэцIыкIу мин 16,3-рэ фэдизмэ а IыгъыпIэхэм чIыпIэ ащагъотыгъ. Мы лъэныкъомкIэ Iофтхьабзэхэр лъагъэкIуатэх. Мэзи 2-м къыщегъэжьагъэу илъэси 7-м нэс зыныбжь кIэлэцIыкIухэм гурытымкIэ япроцент 99,6-м Урысые Федерацием иIыгъыпIэхэм чIыпIэ ащагъотыгъ.

ХэушъхьафыкIыгъэу УФ-м и Правительствэ и Тхьаматэ игуадзэ къыхигъэ­щыгъ кIэлэпIухэу шIэныгъэу ыкIи амалэу яIэхэр зэкIэ кIэлэцIыкIухэм апае зыгъэ­федэхэрэм, апэрэ къулайныгъэхэм афэзгъасэхэрэм инэу зэрафэразэр.

[caption id="attachment_133628" align="alignnone" width="800"] Сурэтыр: А. Гусев[/caption]

Министрэу Сергей Кравцовым къызэриIуагъэмкIэ, Iоныгъом и 1-м къыщыублагъэу мы илъэсым Урысыем икIэлэцIыкIу IыгъыпIэхэр зэкIэ федеральнэ программэ зыкIым техьащтых ыкIи ащ диштэу Iоф ашIэщт. «Методикэ анахь дэгъухэр, еджапIэм джыри мыкIорэ кIэлэцIыкIухэм япIункIэ ыкIи яхэхъоныгъэкIэ технологие анахь дэгъухэр IэубытыпIэ ашIыщтых. Илъэси 7-м шIомыкIыгъэ кIэлэцIыкIухэр зэрыт лъэхъаным мэхьанэшхо иI, ахэм унаIэ атетэу икъоу уадэлэжьэн фае. Тэри къыттефэрэр зэкIэ тшIэщт кIэлэцIыкIу­хэр тэрэзэу пIугъэнхэм, хэхъоныгъэ ашIыным апае. Шэн-хэбзэ дахэхэр яцIыкIугъом къыщыублагъэу ахэлъхьэгъэнхэ фае. Ащ пае унэгъо пытэм, нахьыжъхэм шъхьэ­кIафэ афэшIыгъэным, чIыопсым уфэсакъын зэрэфаем икъоу ыкIи игъом, кIэлэцIыкIу IыгъыпIэм къыщегъэжьагъэу, анаIэ атырядгъэдзэн фае», — къыIуагъ Сергей Кравцовым. Адыгеим и ЛIышъхьэу КъумпIыл Мурат пэIудзыгъэ шIыкIэм тетэу шIуфэс къари­хыгъ мы марафоным хэлэжьэрэ пстэуми. Джащ фэдэу лъэпкъ проектэу «Демографиер» пхырыщыгъэным ипIалъэ къэмысызэ анахь лъэшэу цIыфхэр зыгъэгумэкIыхэрэ Iофыгъоу кIэлэцIыкIу IыгъыпIэхэм зэкIэми чIыпIэ щагъотын алъэкIыным иамал зэрэщымыIэр къыхигъэщыгъ.

«Мы аужырэ илъэсхэм къэралыгъом Iофышхоу зэшIуихыгъэм ишIуагъэкIэ кIэ­лэцIыкIу IыгъыпIэхэм зищыкIэгъэ пстэуми чIыпIэ ащагъотыным иIофыгъо­шхо зэшIохыгъэ мэхъу. Аужырэ илъэс заулэм республикэм кIэлэцIыкIу IыгъыпIэ 15 щыдгъэпсын тлъэкIыгъ ыкIи а Iофыр лъытэгъэкIуатэ. Урысыем и Президентэу Владимир Путиным, УФ-м и Правительствэ и Тхьаматэ игуадзэу Татьяна Голиковам, УФ-м просвещениемкIэ иминистрэу Сергей Кравцовым ренэу яшIуагъэ къызэрэтагъэкIырэм пае сызэрафэразэр къэсIонэу сыфай. Ахэм яшIуа­гъэкIэ мы проектхэр гъэхъагъэ хэлъэу щыIэныгъэм щыдгъэцэкIэнхэ тлъэкIыгъ», — къыхигъэщыгъ КъумпIыл Мурат.

Къутырэу Тихоновым нэбгыри 120-м телъытэгъэ кIэлэцIыкIу IыгъыпIэу непэ къыщызэIуахыгъэри лъэпкъ проектэу «Демографием» ишIуагъэкIэ агъэпсыгъ. Ащ сомэ миллион 200-м ехъу пэIухьагъ. Джырэ уахътэм диштэрэ унэм кIэлэцIыкIухэм япIункIэ ищыкIагъэр зэкIэ хэт: зыщыджэгущтхэ унэ Iэрыфэгъухэр, музыкэмрэ спортымрэ афытегъэпсыхьэгъэ залыр, методическэ кабинетыр, психологымрэ логопедымрэ якабинетхэр. Дукмасовскэ къоджэ коим хэхьэрэ псэупIи 6-мэ къарыкIырэ кIэлэцIыкIу­хэри ащ чIэфэщтых. Мы илъэсым ыкIэхэм яхъулIэу лъэпкъ проектым тегъэпсыхьагъэу Шэуджэн районым джыри кIэлэцIыкIу IыгъыпIитIу къыщызэIуахынэу гухэлъ яI, ащ амал къытыщт муниципалитетым кIэлэцIыкIу IыгъыпIэхэмкIэ ищыкIэгъэ чIыпIэм фэдиз иIэ хъунэу.

АР-м и ЛIышъхьэ ипресс-къулыкъу