Непэ, кIэлэцIыкIухэм якъэухъумэн и Мафэ, къэралыгъом ипащэу Владимир Пути­­ныр видеозэпхыныгъэкIэ аIукIагъ «Родительская слава» зыфиIорэ орденыр къызфа­гъэшъошагъэхэм. Шъолъыриимэ ащыпсэурэ унагъохэм Президентыр афэгушIуагъ, ахэм ахэтыгъ Адыгеим щыщхэу Шишкинхэр.

[caption id="attachment_133631" align="aligncenter" width="800"] Сурэтыр: Кремлин.ру[/caption]

Ащ сабый 11 щапIу. ЗэкIэ кIэлэцIыкIухэр ягъусэхэу Шишкинхэр зэIукIэм къекIолIагъэх. Къэралыгъом IэпыIэгъоу аригъэгъотырэм пае рэзэныгъэ гущыIэхэр ахэм Президентым фагъэза­гъэх, яунэгъо хабзэхэм, гъэхъагъэу яIэхэм афэгъэхьыгъэу къыфаIотагъ.

ЯкIэлэ анахьыжъэу Владимир зэнэ­къокъу зэфэшъхьафхэм текIоныгъэ къа­щыдихыгъ ыкIи къэралыгъом ипащэ зэIукIэгъоу дашIыщтым аккордеоныр къызыдихьи, исэнаущыгъэ къыщигъэлъэ­гъуагъ.

[caption id="attachment_133632" align="aligncenter" width="800"] Сурэтыр: АР-м и ЛIышъхьэ ипресс-къулыкъу[/caption]

«Унагъор мамырэу, зэгурыIожьэу ыкIи зэрэлъытэжьы зыхъукIэ, сабыйхэри къэхъух зэдиштэхэу, ясэнаущыгъэ зыкъызэIуехы. НахьыкIэхэр нахьыжъхэм акIырэплъых ыкIи искусствэхэмкIэ еджа­пIэм щеджэх, ны-тыхэм яIэпыIэгъух. Джащ фэдэ унагъохэр арых къэралы­гъом иIэпыIэгъухэр. Джащ пае сабыибэ зэрыс унагъохэм адэIэпыIэгъэныр сыдигъокIи анахь шъхьаIэхэм ащыщыщт», — къыкIигъэтхъыгъ Адыгеим и ЛIышъхьэу КъумпIыл Мурат ыкIи Владимир Путиным непэ къыIогъэ гущыIэхэр щысэу къыхьыгъэх: «Ныгъом, сабыигъом, унагъом, анахьэу унэгъо Iужъум, сабыибэ зыщапIурэм, адеIэгъэныр къэралыгъом ипшъэрылъ анахь ин, ащ икъэкIощт уахътэ фэгъэзэгъэ IофшIэн». Шишкинхэр зыкIэхъопсыхэрэр афигъэ­цэкIэнэу Владимир Путиным къыгъэгугъагъэх ыкIи Москва ахэр къыригъэблэгъагъэх.