Урысые Федерациемрэ Аб­хъазымрэ яуплъэкIокIо-лъытэкIо къулыкъухэм япа­­­щэхэм ясеминар-зэIукIэу геополитикэмрэ экономикэмрэ зэхъокIы­ныгъэ зыщафэхъурэ лъэхъаным IэкIыб къэрал финанс уплъэкIунхэм язытет фэгъэхьыгъэр Адыгеим щэкIо. Абхъазым испециалистхэр Iофтхьаб­зэм къырагъэблэгъагъэх.

Семинарыр къызэIуахыным ыпэкIэ Адыгеим и ЛIышъхьэ хьакIэхэм шIуфэс къарихыгъ. Урысыем и Президент къафи­гъэуцугъэ пшъэрылъхэм, лъэпкъ проект­хэм, къэралыгъо программэхэм ягъэцэкIэнкIэ уплъэкIокIо-лъытэкIо къулыкъу­хэм Iофышхо зэрашIэрэр КъумпIыл Мурат къыхигъэщыгъ.

«Республикэм иуплъэкIокIо- лъытэ­кIо къулыкъухэм зэдэлэжьэныгъэ пытэ адытиI. Федеральнэ лъытэкIо палатэми дытиIэ зэфыщытыкIэхэм зядгъэушъомбгъу тшIоигъу. Лъэныкъо зэфэ­шъхьаф­хэмкIэ, бюджет зэфыщытыкIэхэмкIэ, финанс дисциплинэмрэ зыпкъитыныгъэмрэ ягъэпытэнкIэ зэ­дэлэжьэныгъэм зедгъэушъом­бгъуным тыфэхьазыр», — къы­Iуагъ КъумпIыл Мурат.

Республикэм и ЛIышъхьэ Абхъазым къикIыгъэ хьакIэхэм шъхьафэу шIуфэс арихыгъ, Адыгеимрэ Абхъазымрэ бэшIагъэу зэкъош зэфыщытыкIэхэр зэрэзэдыряIэр къыхигъэщыгъ. «Ткъош Абхъазым зэдэлэжьэны­гъэу дытиIэм осэшхо фэтэшIы. ЭкономикэмкIи, финансхэмкIи, нэмыкI лъэныкъохэмкIи респуб­ликэм зэпхыныгъэу дытиIэм зетэгъэушъомбгъу. Ащ тиреспубликэ­хэм арысхэм шIогъэшхо къафехьы. ТапэкIи тизэдэлэжьэныгъэ зызэ­редгъэу­шъомбгъущтым ыуж титыщт», — къыIуагъ КъумпIыл Мурат.

Абхъазым и УплъэкIокIо палатэ иауди­торэу Торчуа Беслан Iофтхьабзэм къы­зэрэрагъэблэгъагъэхэм фэшI зэрафэразэр къыIуагъ, Абхъазым и Президентэу Бжания Аслан ишIуфэс Адыгеим и ЛIышъхьэ къылъигъэ­Iэсыжьыгъ.

«Адыгеир тиунэ шъыпкъэм фэд, ткъош адыгэхэр къызэрэткъотхэр, зэрэ Урысыеу IэпыIэгъу къызэрэтфэхъурэр ренэу зэхэтэшIэ.

Семинар-зэIукIэм тыкъызэрэра­гъэблэгъагъэм къегъэлъагъо гухэ­лъэу тиIэхэр гъэцэкIагъэ зэрэхъу­хэрэр», — къыIуагъ Торчуа Беслан.

Семинарыр зыщыкIощт чIыпIэмкIэ Адыгеир аукъодыеу къызэрэхамыхыгъэр зэIукIэм къыщаIуагъ. Илъэс 20-м къыкIоцI Адыгеим и УплъэкIокIо-лъы­тэкIо палатэ опытышхо иIэ хъугъэ. Бюджет мылъкур шъхьэ­ихыгъэу зэрагъэфедэрэмкIэ рейтингым Адыгэ Республикэм мызэу, мытIоу апшъэрэ чIыпIэ­хэр щиубытыгъэх. УФ-м финансхэмкIэ и Министерствэ инаучнэ-ушэтэкIо финанс институт зэхищэгъэгъэ уплъэкIунхэм нафэ къашIыгъ 2022-рэ илъэсым бюджет мылъкур шъхьэихыгъэу зэрагъэфедэрэмкIэ Адыгэ Рес­публикэм апэрэ чIыпIэр хэгъэгум зэрэщиубытыгъэр.

УФ-м и ЛъытэкIо палатэ иаудиторэу Дмитрий Зайцевым къызэриIуагъэмкIэ, семинар-зэIукIэм опытышIоу яIэмкIэ щызэхъожьыщтых, къэралыгъо финанс уплъэкIунхэр нахьышIоу зэхэщэгъэнхэмкIэ амалыкIэхэм щяусэщтых.

«Лъэпкъ проектхэр, къэралыгъо, шъолъыр программэхэр зэрагъэцакIэ­хэрэм, шъолъырыкIэхэм ябюджет зэрэзэрагъэу­Iурэм татегущыIэщт. Адыгеим ищысэкIэ мэкъу-мэщым ылъэныкъо­кIэ гъэхъагъэу пшIын плъэкIыщтхэм, IэкIыб къэралыгъохэм къащыда­гъэкIыщтыгъэхэм ачIыпIэкIэ тищыкIэгъэ пкъыгъохэр Урысыем къы­щышIыгъэнхэм, экономикэ зэпхыныгъакIэ­хэр адэшIыгъэнхэм яп­хыгъэ Iофыгъохэм танэсыщт. Шъолъырхэм ащызэхэщэгъэ уплъэ­кIокIо къулыкъухэм Iоф зэрашIэрэр зэдгъашIэ тшIоигъу», — къыIуагъ Дмитрий Зайцевым.

Адыгеим и ЛIышъхьэ зэIукIэм къыщиIотагъ экономикэм хэхъо­ныгъэ егъэшIыгъэнымкIэ зыгъэ­псэфыпIэу «Лэгъонакъэрэ» про­мышленнэ паркэу «Инэмрэ» ягъэцэкIэнкIэ республикэм амалэу щызэрахьэхэрэм фэгъэ­хьыгъэу.

Адыгеим и Къэралыгъо Совет — Хасэм и Тхьаматэу Владимир Нарожнэмрэ АР-м и УплъэкIо­кIо-лъытэкIо палатэ итхьаматэу Павел Стаценкэмрэ зэIукIэм къыщыгущыIагъэх. ИкIэухым Адыгеим и ЛIышъхьэ зэIу­кIэм хэлэжьагъэхэм къафэлъэIуагъ шIуа­гъэ къытэу республикэм Iоф щашIэнэу ыкIи къыхигъэщыгъ хэбзэукъоныгъэ­хэр амышIынхэм фытегъэпсы­хьэгъэ Iофэу зэдагъэцакIэрэм мэхьэнэ ин зэриIэр.

«Къэралыгъо гъэIоры­шIэным шIуа­гъэу къытырэм хэпшIыкIэу зы­къегъэIэтыгъэнымкIэ тизэдэлэжьэныгъэ, унашъоу зэдит­хъухьэхэрэм яшIуагъэ къызэрэкIощтым сицыхьэ телъ», — къыIуагъ КъумпIыл Мурат.

АР-м и ЛIышъхьэ ипресс-къулыкъу