Шъэумэн Хьазрэт ыцIэ зыхьырэ кIэлэцIыкIу Унэ-лицееу Красноярскэ ежь шIушIэзехьэм щаригъэшIыгъэр къызызэIуахыгъэр илъэс 20 зэрэхъурэр тыгъуасэ игъэкIотыгъэу щыхагъэунэфыкIыгъ. Адыгеим икIыгъэ лIыкIо купэу нэбгыри 100 фэдиз хъущтыгъэр ащ хэлэжьагъ.

АР-м культурэмкIэ иминистрэу Аулъэ Юр, общественнэ IофышIэу Пэрэныкъо Казбек, АР-м итеатральнэ объединение ипащэу Ацумыжъ Рустам, шъолъырым иныбжьыкIэ пэрытхэм ялIыкIохэу АкIэхъу Закиррэ Тхьаркъохъо Тимуррэ, мэкъэмэусэу ЛIыбзыу Аслъан, лъэпкъ къэшъокIо ансамблэу «Мыекъуапэ инэфылъэхэр», орэдыIо-къэ­шъокIо купэу «Казачата», къэбарлъыгъэ­Iэс амалхэм ялIыкIохэр.

МэфэкI Iофтхьабзэхэм ахэлэжьагъэх Красноярскэ краим игубернаторэу Михаил Котюковыр, краим ихэбзэгъэуцу ЗэIукIэ итхьаматэу Алексей Додатко, Красноярскэ ипащэу Владислав Логиновыр.

АР-м и ЛIышъхьэу КъумпIыл Мурат ишIуфэс тхылъэу мэфэкIым хэлажьэхэрэм афакIорэм Аулъэ Юрэ зэхахьэм къыще­джагъ. Шъэумэн Хьазрэт Адыгеим къыфишIэрэм лъэпкъымкIэ осэшхо зэриIэр, шIушIэ Iофэу къэралыгъом щызэшIуихыхэрэм уасэ зэрафэшIыгъуаер шIуфэс тхылъым щыхэгъэунэфыкIыгъ.

Адыгеим икъэралыгъо гъэпсыкIэ илъэ­си 100 зэрэхъугъэм фэгъэхьыгъэ бгъэ­хьалъхьэу фагъэшъошагъэр Аулъэ Юрэ Шъэумэн Хьазрэт ритыжьыгъ.

Унэ-лицеир зыфишIыгъэ сабыйхэм ны-тыхэм яIэшIугъэ анимгъэсышъугъэми, зыми щымыкIэнхэм ылъэкI къызэрихьэу зэрэпылъым ищыIэныгъэ зэрэлъигъэкIуа­тэрэр Шъэумэн Хьазрэт къыхигъэщыгъ, фэдэ амал зэриIэр насыпыгъэкIэ зэрэзыфилъэгъужьырэр къыIуагъ, Адыгеим къикIыгъэ лIыкIо купышхом зэрэфэразэр къыкIигъэтхъыгъ.

МэфэкI Iофтхьабзэхэм къадыхэлъытагъэу Шъэумэн Хьазрэт Красноярскэ Унэ-лицеим музей къыщыфызэIуахыгъ. ИщыIэныгъэ гъогу ащ игъэкIотыгъэу къыщыгъэлъэгъуагъ.

Лъэпкъ тхакIоу МэщбэшIэ Исхьакъ итхыгъэ зэхэугъоягъэхэр къыздэхьэгъэ том 25-рэ, тхылъ зырызэу къыдэкIыгъэ­хэри ахэтэу Унэ-лицеим итхылъеджапIэ шIухьафтынэу ритыгъ.

МэфэкI концертым Адыгеим икIыгъэ купхэр, Унэ-лицеим икIэлэеджакIохэмрэ икIэлэегъаджэхэмрэ хэлэжьагъэх. Илъэс 20-м Красноярскэ Унэ-лицеир къэзыухыгъэхэм ащыщхэр мэфэкIым къырагъэблэгъагъэх, ящыIэныгъэ къырыкIуагъэр, апшъэрэ еджапIэу къаухыгъэхэр, зычIэ­хьагъэхэр, IофшIапIэу зыIутхэр гущыIэ аратызэ къарагъэIотагъ.

ЗимэфэкI хэзгъэунэфыкIырэ лицеим чIэс сабыйхэм шIухьафтын зэфэ­шъхьафхэр, IэшIу-IушIухэр а мафэм бэу апагъохыгъэх, спорт зэнэкъокъухэр афызэхащагъэх. МэфэкI Iофтхьабзэхэр пчыхьэм жъогъотопкIэ зэфашIыжьы­гъэх.

ТIэшъу Светлан.