Адыгеим хъызмэтзехьанымкIэ иIофы­шIэ ыкIи ипэщэ цIэрыIохэм зыкIэ ащыщыгъэ Пщыжъ Мос Билъэустэн ыкъор илъэс 87-м итэу дунаим ехыжьыгъ.

Игупсэ республикэм ихэхъоныгъэ Пщыжъ Мосэ щэIэфэ фэлэжьагъ. Илъэс зэфэшъхьафхэм колхозэу «Путь к коммунизму», Кировым ыцIэкIэ щыт колхозэу Кощхьаблэ дэтыгъэм пэщэныгъэ адызэрихьагъ. Iэшъхьэтет ныбжьыкIэу ригъэжьэгъагъэ нахь мышIэми, чIыгулэжьынымкIи былымхъунымкIи пэрыт шIыкIэ-амалхэр чанэу ыгъэфедэщтыгъэх, хъызмэтшIапIэхэм яфэныкъо­ныгъэхэм ателъытагъэу кадрэхэм ренэу ынаIэ атыригъэтыгъ, къуаджэхэмрэ къутырхэмрэ нахь зэтегъэпсыхьагъэ хъунхэм, гъогухэр шIыгъэнхэм, электричествэр ящэлIэгъэным чанэу ауж итыгъ. Илъэс 25-м къыкIоцI Советскэ Союзым щыцIэрыIогъэ совхоз-заводэу «Элитым» пэщэныгъэ дызэрихьагъ. Парфюмернэ продукциемкIэ ыкIи эфирнэ дагъэхэмкIэ лъэшэу а заводыр цIэрыIуагъ. Пащэм игукъэкIыкIэ заводыр зыдэт псэупIэр зэтырагъэпсыхьэгъагъ, культурэм и Унэрэ хьакIэщрэ щашIыгъагъ, район сымэджэщ къыщызэIуахыгъагъ.

Пщыжъ Мосэ пэщэ чанэу щытыгъ, цIыфхэм ренэу ынаIэ атетыгъ, пшъэ­рылъышхохэр щыIэныгъэм щыпхырыщыгъэнхэм фэкъулаигъ. Зыдэлажьэхэрэми, нэмыкI Iэшъхьэтетхэми ифэшъошэ шъыпкъэу ащ шъхьэкIэфэ ин фашIыщтыгъ. Адыгеим ихэхъоныгъэ иIахьы­шхо зэрэхишIыхьагъэм пае Пщыжъ Мосэ Билъэустэн ыкъом щытхъуцIэхэр ыкIи тын лъапIэхэр бэу къыфагъэшъоша­гъэх. Ахэм ащыщых Октябрьскэ революцием, ЛэжьэкIо Быракъ Плъыжьым, лъэпкъхэм я Зэкъошныгъэ иорден, Щытхъум иорден, медалэу «Адыгеим и Щытхъузехь» зыфиIорэр.

Пщыжъ Мосэ Билъэустэн ыкъор дунаим зэрехыжьыгъэр гухэкIышхо тщыхъоу игупсэхэмрэ къыпэблагъэ­хэмрэ тафэтхьаусыхэ.

Адыгэ Республикэм и ЛIышъхьэрэ АР-м иминистрэхэм я Кабинетрэ