КIэлэцIыкIухэм якъэухъумэн и Дунэе Мафэ тефэу Къэралыгъо фондэу «Хэ­гъэгум иухъумакIохэр» зыфиIорэм ишъолъыр къутамэу Адыгеим къыщызэIуахы-гъэр кIэщакIо фэхъуи, АР-м IофшIэнымкIэ ыкIи социальнэ хэхъоныгъэмкIэ и Министерствэ, хэгъэгум идзэкIолIхэм яунагъохэм и Комитет иIэпыIэгъухэу «ДзэкIолIхэм письмэ афэтхыгъэныр» зыфиIорэ Iофтхьабзэ зэхищагъ.

Ащ къырагъэблэгъагъэх хэ­ушъхьафыкIыгъэ дзэ операцием хэлажьэхэрэм якIэлэцIыкIухэр, яшъхьэгъусэхэр ыкIи яIахьыл гупсэхэр. ЗэхэщакIохэм гущыIэ дахэхэр кIэлэцIыкIухэм апагъо­хыхэзэ IэшIу-IушIу зэфэшъхьаф­хэр зытелъ Iанэм апагъэтIысхьагъэх ыкIи ямэфэкIкIэ афэгушIуа­гъэх.

Джащ фэдэу дзэкIолIхэм янэхэм ыкIи яшъхьэгъусэхэм Хэгъэгу зэошхом ТекIоныгъэр къызыщыдахыгъэм тефэу къагъэхьазырыгъэ сурэтхэр Iоф­тхьабзэм къыщагъэлъэгъуагъэх.

— Тиреспубликэ имызакъоу зэрэ Урысыеу Къэралыгъо фондэу «Хэгъэгум иухъумакIохэр» зыфиIорэм иIофшIэн непэ щыригъэжьагъ. КIэлэцIыкIухэм якъэу­хъумэн и Дунэе Мафэ тефэу хэушъхьафыкIыгъэ дзэ операцием хэлэжьэрэ тыхэм письмэ афатхын алъэкIынэу мы Iофтхьабзэр зэхэтщагъ. МыщкIэ мурадэу тиIэр тикIэлэцIыкIухэм тынаIэ зэратетыр, шIу зэрэтлъэ­гъухэрэр, тызэрафэгумэкIырэр зэхяд­гъэшIыкIыныр, яхэгъэгу шIу алъэгъоу къэтэджынхэр ары, — къыIуагъ Къэралыгъо фондэу «Хэгъэгум иухъумакIохэр» зыфиIорэм ипащэ игуадзэу Джарымэ Еленэ.

Адыгэ республикэ гимназием икIэлэегъаджэ Iофтхьабзэм хэлэжьагъ. ЯмэфэкIыкIэ ар къафэгушIуагъ ыкIи хэгъэгум фэгъэхьыгъэ усэ цIыкIухэр кIэ­лэ­­цIыкIухэм къаригъэ­Iуагъ. Нэужым ахэм тхьапэр ыкIи къэлэмыр арати, ятэ лIы­хъужъхэм афагъэхьынхэу сурэт­хэр арагъэшIыгъэх ыкIи письмэ цIыкIухэр арагъэтхыгъэх. Адыгэ къэралыгъо университетым истудент волонтерхэр ахэм адэIэпыIагъэх.

ХэушъхьафыкIыгъэ дзэ операцием хэкIодагъэхэм ыкIи непэ ащ щыIэхэм якIэлэцIыкIухэм ятэхэм, ашыхэм ыкIи янэхэм ясурэтхэр ашIыгъэх, ахэм на­хьыбэрэм чIыопсым идэхагъэ ыкIи мамыр щыIакIэр къащыраIотыкIыгъ. Сурэтэу ыкIи тхыгъэу кIэлэцIыкIухэм къагъэхьазырыгъэхэр письмэхэм адалъ­хьа­гъэх, нэужым ахэр ты дзэ­кIолIхэм аIэкIагъэхьащтых. Фондым итхьаматэ игуадзэ къызэрэхигъэщыгъэмкIэ, хэ­ушъхьа­фыкIыгъэ дзэ операцием иветеранхэм ыкIи ахэм яунагъохэм обществэм ынаIэ зэратыригъэтырэр ыкIи IэпыIэгъу зэрафэхъурэр зэхашIэнымкIэ мыщ фэдэ Iофтхьабзэхэм яшIогъэшхо къэкIо.

КIАРЭ Фатим.