Урысые Федерацием и Президентэу Владимир Путиным и УказкIэ Адыгеим и ЛIышъхьэу КъумпIыл Мурат республикэм исоциальнэ-экономикэ хэхъоныгъэ иIахьышхоу хишIыхьагъэм фэшI орденэу «Хэгъэгум ыпашъхьэ гъэхъагъэу щыриIэхэм апае» зыфиIоу я IV-рэ шъуашэ зиIэр къыфигъэшъошагъ.Урысые Федерацием иапшъэрэ къэралыгъо тынхэр Кремлым щаратыжьыгъэх. Ахэм Адыгеим и ЛIышъхьэ ахэтыгъ. Урысыем и Президентэу Владимир Путиным республикэм и ЛIышъхьэ орденыр къыритыжьыгъ ыкIи къылэжьыгъэ тын лъапIэмкIэ къыфэгушIуагъ.

Iофэу ышIэрэм осэшхо къызэрэфишIыгъэм пае КъумпIыл Мурат Владимир Путиным зэрэфэразэр къыIуагъ ыкIи къыхигъэщыгъ республикэм ифедэ хэлъэу Iоф зышIэрэ пстэуми ар къызэралэжьыгъэр. Адыгеим и ЛIышъхьэ ар къыгъэгугъагъ цIыфхэм щыIакIэу яIэр нахьышIу шIыгъэнымкIэ, Адыгеим ыкIуа­чIэ нахь хэхъонымкIэ, Хэгъэгушхом — Урысыем игъэпытэн иIахьэу хишIы­хьэрэм джыри нахь зиушъомбгъунымкIэ Iофэу ышIэрэр лъигъэкIотэнэу.

АР-м и ЛIышъхьэ ипресс-къулыкъу