КIэлэцIыкIугъор насыпышIоу щэрэт!
Сыд фэдэрэ лъэхъани анахь мэхьанэ зэратырэр сабыир ары. КIэлэцIыкIур щыIэныгъэм зэрилъапсэр къыушыхьатэу, ащ насыпи гушIуагъуи унагъом къырехьэх. КIэлэцIыкIухэм якъэухъумэн и Дунэе мафэ мэхьанэшхо зиIэ мэфэкIхэм ащыщ. Урысыем икIэлэцIыкIухэм ямэфэкIэу мыр зэрэщытым имызакъоу тэ, нахьыжъхэм, джыри зэ тыгу къегъэкIыжьы ахэмкIэ пшъэдэкIыжьэу тхьырэр зыфэдэр.
[caption id="attachment_133597" align="aligncenter" width="800"] Сурэтыр: Е. Сергеев[/caption]
Тинеущырэ мафэ зыфэдэщтыр зэлъытыгъэ кIэлэцIыкIухэм пIуныгъэ тэрэз ягъэгъотыгъэныр Iофыгъо шъхьаIэхэм ащыщ. Яхэгъэгу шIу алъэгъоу, нахьыжъхэм, янэ-ятэхэм лъытэныгъэ афашIэу пIугъэнхэр зэкIэми типшъэрылъ. Ахэр непэ гъогу тэрэз тедгъэуцохэмэ, тиунагъохэри, къэралыгъори зыщыгугъынхэ лIэуж щыIэщт. Адыгеим и ЛIышъхьэу КъумпIыл Мурат унагъом, ным, кIэлэцIыкIугъом яIофыгъохэм ынаIэ лъэшэу атет. КIэлэцIыкIухэм языгъэпсэфыгъо уахътэ зэхэщэгъэным, ахэм апкъышъол псыхьэгъэным анаIэ тырагъэтыным мэхьанэшхо иIэу елъытэ.
Тиреспубликэ щыпсэухэрэм ямызакъоу, Херсон хэкум и Геническэ район къыращыгъэ кIэлэцIыкIухэми языгъэпсэфыгъо уахътэ Адыгеим щырагъэжьагъ. Херсон хэкум къикIыгъэ нэбгырэ 345-мэ Мыекъопэ районым ит псэупIэу Каменномостскэм дэт лагерэу «Лань» зыфиIорэм зыщагъэпсэфы. Ащ «Адыгэ макъэр» непэ еблэгъагъ.
Куп-купэу гощыгъэ кIэлэцIыкIухэм ячэф макъэ инэу къэIущтыгъ, ахэм ашъхьарыт вожатэхэри гъэкIэрэкIагъэх. Апэу тызIукIагъэр зыгъэпсэфыпIэу «Лань» зыфиIорэм ипащэу Вероника Кручининар ары.
[caption id="attachment_133598" align="aligncenter" width="800"]
Сурэтыр: А. Балабась[/caption]
— Херсон хэкум къыращыгъэ кIэлэцIыкIухэр жъоныгъуакIэм и 29-м къыщегъэжьагъэу мэкъуогъум и 18-м нэс щыIэщтых, — къеIуатэ Вероника Николай ыпхъум. – Зызщагъэпсэфыщт мэфэ 21-м телъытэгъэ хэушъхьафыкIыгъэ программэ мыхэм афэдгъэхьазырыгъ. ЗыдэщыIэгъэхэ чIыпIэхэр, зыщыгупсэфыгъэхэр, зыщычэфыгъэхэр агу къинэжьынымкIэ Адыгеим ичIыопс дахэ нэIуасэ фэтшIыщтых, шIуагъэ къытэу языгъэпсэфыгъо уахътэ агъэкIонымкIэ тишIуагъэ ядгъэкIыщт. ТигущыIэгъу къызэрэхигъэщыгъэмкIэ, сыхьат 19-рэ гъогу тетыгъэ кIэлэцIыкIухэр автобусхэмкIэ къащагъэх ыкIи япшъыгъэ шIэхэу текIыным щыгугъыгъэхэп. КъызэрашIомышIыгъэу, мэфитIум къыкIоцI зыпкъ къиуцуагъэх, чанэу къакIухьаным зэрэфэхьазырхэр къаIоу аублагъ. НыбыжьыкIэ цIыкIухэр ятеплъэкIи, ящыгъынкIи зэтегъэпсыхьагъэх.
— Къызыдыращыгъэхэ чIыпIэм хэушъхьафыкIыгъэ дзэ операциер зэрэщыкIорэм елъытыгъэу япсихологическэ зытет тигъэгумэкIыгъ, — еIо Вероника Кручининам. — Ащ пае психологищмэ мыщ Iоф щашIэнэу тштагъэх. Ау тызэрапэгъокIыгъэр, тызэрафыщтыр залъэгъум гупсэфыгъэх. ЗэрэгушIохэрэм гъунэ иIэп. Зы кIэлэцIыкIу закъу психолог зищыкIагъэу къахэкIыгъэр. Ари тэ гу лъыттагъ зэрэчъэфынчъэм, ыныбжь елъытыгъэу янэ зэрэфэзэщырэр къызытеIом видеозэпхыныгъэкIэ дэдгъэгущыIи, къызэкIэкIыжьыгъ. Къыхэзгъэщымэ сшIоигъу, блэкIыгъэ илъэсым мыщ зыщагъэпсыфэнэу кIэлэцIыкIухэр къызащэхэм алъыплъэщт нахьыжъ нэбгырэ 36-рэ зэрягъусагъэр. Мыгъэ зы нэбгырэ къадэкIуагъэп, джащ фэдизэу Адыгеир зэрапэблагъэр, зэраготыр, зэрафэгумэкIырэр зэхашIыкIыгъ.
[caption id="attachment_133599" align="aligncenter" width="800"]
Сурэтыр: А. Балабась[/caption]
Лагерэу «Лань» зыфиIорэм щызэхащэщт Iофтхьабзэхэм тишъолъыр культурэмкIэ и Министерствэ, Адыгеим физическэ культурэмкIэ ыкIи спортымкIэ и Комитет, АР-м гъэсэныгъэмрэ шIэныгъэмрэкIэ и Министерствэ къахагъэлэжьэщтых. Джащ фэдэу муниципальнэ ыкIи республикэ творческэ купхэр къырагъэблэгъэщтых. Тинеущырэ мафэ зэлъытыгъэ сабыйхэр чэфынхэм фэшI къэгъэлъэгъон зэфэшъхьафхэр афызэхащэнхэу агъэнафэ.
— Мэфэ 21-м къыкIоцI мэфэкIэу къыхафэхэрэр зэкIэ зэрифэшъуашэу хэдгъэунэфыкIыщтых. ГущыIэм пае, мэкъуогъум и 1-м пчэдыжьым кIэлэцIыкIухэр къызэрэущыжьхэу зэрямэфэкIыр зэхашIэнэу щагум фырыгъунэу дгъэкIэрэкIэщтых, ащ дакIоу зэнэкъокъухэр, джэгукIэхэр афэдгъэхьазырыгъэх, творческэ купхэр къедгъэблэгъагъэх, — хигъэунэфыкIыгъ Вероника Кручининам.
КIэлэцIыкIухэм ахэтэу Iоф адэзышIэрэ вожатэ шъхьаIэу Нэхэе Айдэмыр гущыIэгъу тыфэхъугъ. Ар Адыгэ къэралыгъо университетым ия 4-рэ курс щеджэ. Айдэмыр апэрэп лагерым Iоф зэрэщишIэрэр, зэхэщэным хэшIыкI дэгъу фыриI.
— Адыгэ къэралыгъо университетым, Адыгэ кIэлэегъэджэ колледжым истудент 22-рэ вожатэу мыщ щыIэх, — къеIуатэ ащ. — Ахэм ащыщхэм блэкIыгъэ илъэсхэм лагерь зэфэшъхьафхэм Iоф ащашIагъ, адрэхэм джы ащ фэдэ IэпэIэсэныгъэ зэрагъэгъотыщт. Мыхэм зэкIэми егъэджэн курсхэр акIугъэх. МэфитIум къыкIоцI дэгъоу зэрагурыIуагъэхэр кIэлэцIыкIухэм къыхагъэщы. Мы илъэсым джырэ лъэхъаным диштэрэ ушэтын программэу «Опыт» зыфиIорэр пхырэтэщы, ар проект Iофхэм афэгъэхьыгъ. НыбжьыкIэхэм агу рихьынэу тыщэгугъы.
КIэлэцIыкIухэр насыпышIонхэмкIэ, псауныгъэ пытэ яIэу къэтэджынхэмкIэ, гъэсагъэ хъунхэмкIэ тфэлъэкIыщтыр зэкIэ тшIэныр типшъэрылъ. Непэ мы ныбжьыкIэхэр къызхащыгъэхэ плъыр-стырым фэдэ ныбжьи тисабыйхэр хэрэмыплъэх, неущрэ мафэм яцыхьэ телъэу, якIэлэцIыкIугъо насыпышIоу щэрэт!
Iэшъынэ Сусан.