Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ тыгъуасэ Ады­геим къыщызэIуахыгъ. Уры­сые Федерацием и Президентэу Владимир Путиным къыгъэ­уцугъэ пшъэрылъхэу хэушъхьафыкIыгъэ дзэ операцием хэла­жьэхэрэм ыкIи ахэм яунагъохэм IэпыIэгъу ятыгъэным тегъэпсыхьагъэу зэрэхэгъэгоу ащ фэгъэхьыгъэ IофшIэныр щаублэщт.

Iофтхьабзэм икъызэIухын хэлэжьагъэх АР-м и ЛIышъхьэу КъумпIыл Мурат, федеральнэ инспектор шъхьаIэу Сергей Дрокиныр, АР-м и Къэралыгъо Совет — Хасэм и Тхьаматэ игуадзэу Цэй Эдуард, АР-м Iоф­шIэнымрэ социальнэ хэхъоныгъэмрэкIэ иминистрэу Мырзэ Джанбэч, АР-м гъэсэныгъэмрэ шIэныгъэм­рэкIэ иминистрэ ипшъэрылъхэр зыгъэцэкIэрэ Евгений Лебедевыр, АР-м псауныгъэм икъэухъумэнкIэ иминистрэу Мэрэтыкъо Рустем, къэралыгъо фондым ишъолъыр къутамэ ипащэу ПIатIэкъо Аслъан, общественнэ организациехэм, хэушъхьафыкIыгъэ дзэ операцием хэлэ­жьагъэхэм, ахэм яунагъохэм ялIыкIохэр.

Къэралыгъо фондым икъутамэ иIоф­шIэнкIэ ищыкIэгъэ амалхэр зэкIэ егъэгъотыгъэным пае Адыгеим и ЛIышхьэ пшъэрылъ зэрафишIыгъэм тетэу Мые­къуапэ игупчэ унэ хъоо-пщау къащаратыгъ. КIэлэцIыкIу поликлиникэу щыты­гъэм игъэкIотыгъэ гъэцэкIэжьынхэр непэ щэкIох. Ащ епхыгъэ Iоф­шIэнхэр аухыфэ нэс къэралыгъо фондым икъутамэ цIыфхэм яфэIо-фашIэхэр зыщагъэцэкIэрэ зэхэт гупчэу къалэу Мыекъуапэ дэтым Iоф щишIэщт. Джащ фэдэу къэралыгъо фондым икъутамэ щылажьэхэрэм яIоф­шIэн щаублэщт район гупчэ пэпчъ.

Къэралыгъо фондэу «Хэгъэгум иухъу­ма­кIохэр» зыфиIорэм итхьаматэу Анна Цивилевам пэIудзыгъэ шIыкIэм тетэу закъыфигъазэзэ къыIотагъ фондым гухэ­лъэу ыкIи пшъэрылъэу иIэхэм афэгъэ­хьыгъэу, джащ фэдэу ащ къыхигъэщыгъ дзэ къулыкъушIэхэмрэ ахэм яунагъохэмрэ япхыгъэ Iофыгъохэр зэкIэ нахь икъоу зэшIохыгъэ зэрэхъущтхэм тегъэпсыхьагъэу Iофхэр зэрэзэхащэщтхэр.

Республикэм и ЛIышъхьэ АдыгеимкIэ къутамэм IэпыIэгъу ритыщт. Iофтхьабзэр къызэIуихызэ КъумпIыл Мурат къызэрэхигъэщыгъэмкIэ, къэралыгъо фондым къыгъэуцурэ пшъэрылъхэм япхыгъэ Iоф­тхьабзэхэр ихъухьэгъэнхэмкIэ Урысыем и Президент къыгъэнэфэгъэ лъэныкъохэр зэкIэ къыдэлъытэгъэнхэм мэхьанэшхо иI, джащ фэдэу хэушъхьафыкIыгъэ дзэ операцием хэлажьэхэрэм IэпыIэгъу икъу ятыгъэнымкIэ хэти къытефэрэр дэгъоу зэшIуихын фае.

«Мыщ ыпэкIэ дзэкъулыкъушIэхэмрэ ахэм яунагъохэмрэ япхыгъэ IофшIэныр тыублагъэ. Унагъо пэпчъ, ветеран пэпчъ IэпыIэгъу тыфэхъу, ахэм ренэу яIофыгъохэм защытэгъэгъуазэ. Муниципалитет пстэуми а Iофыгъохэм язэшIохын фэгъэ­зэгъэ IофышIэ купхэр яIэх. ТидзэкъулыкъушIэхэм апае ренэу хэушъхьафыкIыгъэ дзэ операцием ишъолъыр хьылъэхэр лъытэгъэIэсых. Джы къэралыгъо фондым икъутамэ нахь ишIуагъэ къэкIощт зы чIыпIэм къэуцурэ Iофыгъохэр нахь шIуа­гъэ хэлъэу щызэшIохыгъэнхэмкIэ. Общественнэ организациехэри, гуфакIохэри IофшIэным къыхэдгъэлэжьэщтых. Ти­- дзэ­кIолIхэм ашIэн фае тичIыпIэгъухэм IэпыIэгъу аратыным пае ищыкIагъэу щытхэр зэкIэ зэрэзэшIуахыхэрэр, ахэм ягупсэхэми анаIэ зэратырагъэтырэр», — къыхигъэщыгъ КъумпIыл Мурат.

Къэралыгъо фондым ишъолъыр къутамэ ипащэу ПIатIэкъо Аслъан къызэриIуагъэм­кIэ, цIыфхэр социальнэу ухъу­мэгъэнхэмкIэ къулыкъухэм, волонтер-медикхэм, социальнэ фэIо-фашIэхэм афэгъэзэгъэ организациехэм яIофышIэхэу анахь ухьазырыныгъэ дэгъу зиIэхэм ко­ординаторхэр къахахыгъэх ыкIи муниципальнэ районхэмрэ къэлэ койхэмрэ атырагощагъэх. ХэушъхьафыкIыгъэ дзэ операцием иветеранхэм, хэкIодэгъэ зэолIхэм яунагъохэм ащыщхэу IэпыIэгъу зищыкIагъэу закъыфэзыгъэзагъэхэм амал зэриIэкIэ нахь икъоу яшIуагъэ арагъэкIыным ахэр дэлэжьэщтых. Мыщ дэжьым нэбгырэ пэпчъ илъэIу зищыкIэгъэ къулыкъум IэкIэгъэхьэгъэнымкIэ социальнэ координаторым мэхьэнэ гъэ­нэфагъэ иIэу щыт .

Анахь пшъэрылъ шъхьаIэхэм ащыщэу къэнэжьы мы къыкIэлъыкIорэ Iофтхьабзэхэр зэрахьанхэр: медикэ, социальнэ психологическэ IэпыIэгъу ятыгъэныр, Iэзэгъу уцхэр аIэкIэгъэхьэгъэнхэр, ятыгъэныр, техническэ амалхэр аIэкIэгъэ­хьэгъэнхэр, къяIэзэнхэм пае зыгъэпсэфыпIэхэм чIыпIэ къафыхэгъэкIыгъэныр. Ащ дакIоу ынаIэ атыригъэтыщт ветеранхэм IофшIэн ягъэгъотыгъэным, ящы­IэкIэ-псэукIэ епхыгъэ Iофыгъо зэфэшъхьафхэм.

Фондым испециалистхэм хэушъхьафыкIыгъэ дзэ операцием иветеранхэр общественнэ проектхэм къахэлэжьэнхэ амал яIэнымкIи яшIуагъэ къагъэкIощт. ГущыIэм пае, цIыфхэр яхэгъэгу шIу алъэ­гъоу, ащ фэшъыпкъэхэу пIугъэнхэр, тарихъ шIэжьыр ыкIи цIыфыгъэ шэпхъэ дахэхэр мыукъогъэнхэмкIэ Iофтхьабзэхэр зэшIохыгъэнхэр. Ахэм анэмыкIэу фондым ишIуагъэ аригъэкIыщт мысатыу шIушIэ организациехэу зигугъу къэтшIыгъэ ветеранхэмрэ ахэм яунагъохэмрэ IэпыIэгъу язытыхэрэм.

Ащ фэдэ IофшIэным мэхьанэу иIэм фэгъэхьыгъэу къаIуагъ хэушъхьафыкIыгъэ дзэ операцием хэлэжьагъэу, взводым икомандирэу, медалэу «За отвагу» зыфиIорэр къызыфагъэшъошагъэу Сергей Артюшенкэм, мобилизацием къыхиубытагъэм ишъхьэгъусэу Надежда Растворовам. Анахьэу къэзэрэугъоигъэхэм анаIэ зытырадзагъэр хэушъхьафыкIыгъэ дзэ операцием хэлажьэхэрэм якIэлэцIыкIу­хэр ары. Ахэм зыкIэ ащыщэу, илъэситф зыныбжь Семен Рябикиным шIогъэшIэгъонэу республикэм и ЛIышъхьэ гущыIэгъу фэхъугъ, и Хэгъэгу шIулъэгъоу фыриIэм фэгъэхьыгъэ усэ ар къеджагъ.

Адыгеим и ЛIышъхьэ хьакIэхэр игъу­сэ­хэу фондым икъутамэ иIофшIэн зыщыригъэжьэгъэ унэр къаплъыхьагъ, нэужым ар гущыIэгъу афэхъугъ хэушъхьафыкIыгъэ дзэ операцием хэлэжьагъэхэмрэ ахэм яунагъохэм арысхэмрэ. Анахьэу ахэм язэдэгущыIэн зыфэгъэхьыгъагъэр IэпыIэгъоу аратыщтыр, тишIуагъэ зэкIырэ Гени­ческэ районым епхыгъэ IофшIэнэу зэшIуа­хыщтхэр, шIушIэ IэпыIэгъоу арагъэщэщтым епхыгъэ Iофыгъохэр ихъухьэгъэнхэр ары. Хьылъэхэм яз мы мэфэ благъэхэм атIупщыщт. А лъэныкъомкIэ Iофэу ашIэрэм нахь игъэкIотыгъэу къыщыуцугъэх АР-м ибзылъфыгъэхэм я Союз итхьаматэу Вэрэкъо Хьалимэтрэ АР-м хэгъэгум иухъумакIохэм яунагъохэм я Комитет икъутамэ ипащэу Ольга Пронтенкэмрэ.

ИкIэухым Адыгеим и ЛIышъхьэ къызэрэхигъэщыгъэмкIэ, республикэм ихэбзэ къулыкъухэм хэушъхьафыкIыгъэ дзэ опе­рацием хэлажьэхэрэм ыкIи ахэм яунагъохэм IэпыIэгъу ятыгъэнымкIэ общественностым къахилъхьэрэ Iофтхьабзэхэм адыригъэштэщт — республикэм икъулыкъухэм яIофшIэнкIэ ар лъэныкъо шъхьаIэхэм ащыщ.

Шъугу къэтэгъэкIыжьы: Урысые Федерацием и Президентэу Владимир Путиныр 2023-рэ илъэсым мэлылъфэ­гъум и 3-м кIэтхэжьыгъ Указэу хэушъхьафыкIыгъэ дзэ операцием хэлажьэхэрэм IэпыIэгъу ятыгъэным пае къэралыгъо фон­дэу «Хэгъэгум иухъумакIохэр» зыфиIорэр зэхэщэгъэным епхыгъэм. А фондым итхьаматэу агъэнэфагъэр Анна Цивилевар ары. Фондым и ЛъыплъэкIо совет пащэ фашIыгъэр Урысые Федерацием и Президент и Администрацие ипащэ иапэрэ гуадзэу Сергей Кириенкэр ары. Мы Советым хэхьагъэх федеральнэ министерствэхэмрэ ведомствэхэмрэ япащэхэр, общественнэ ыкIи ветеран организациехэм ялIыкIохэр, дзэ корреспондентхэр ыкIи журналистхэр.

АР-м и ЛIышъхьэ ипресс-къулыкъу