2007-рэ илъэсым бэдзэогъум и 24-м аштэгъэ Федеральнэ законэу N 221-р зытетэу «Кадастрэ IофшIэным ехьылIагъ» зыфиIорэм диштэу Адыгэ Республикэм мылъку зэфыщытыкIэхэмкIэ и Комитет макъэ къегъэIу Адыгэ Республикэм иреспубликэ бюджет имылъкукIэ муниципальнэ образованиеу «Къалэу Мыекъуапэ» икадастрэ кварталэу 01:08:0516117-м кадастрэ IофшIэн игъэкIотыгъэхэр 2023-рэ илъэсым зэрэщагъэцэкIэщтхэмкIэ. 2023-рэ илъэсым имэлылъфэгъу къыщегъэжьагъэу итыгъэгъазэ нэс ащ фэдэ кадастрэ IофшIэнхэр агъэцэкIэщтых.

Федеральнэ законэу N 221-р зытетэу «Кадастрэ IофшIэным ехьылIагъ» зыфиIорэм диштэу ащ фэдэ кадастрэ IофшIэнхэр зыщызэрахьэхэрэр зы кадастрэ кварталым е зэголъ кадастрэ квартал заулэмэ:

1) ячIыгу Iахьхэм якъэбархэу амыгъэкощырэ мылъкумкIэ къэ­ралыгъо реестрэ зыкIым (ЕГРН) итхэр 2015-рэ илъэсым бэдзэ­огъум и 13-м аштэгъэ Федеральнэ законэу N 218-р зытетэу «Амыгъэкощырэ мылъкур къэра­лыгъо регистрацие шIыгъэным ехьылIагъ» зыфиIорэм щыгъэ­нэ­фэ­гъэ шапхъэхэм адимыштэ­хэрэр;

2) чIыгу Iахьхэу зигъэнэфэн Федеральнэ законэу N 221-р зытетэу «Кадастрэ IофшIэным ехьылIагъ» зыфиIорэм ия 42.1-рэ статья ия 6-рэ Iахь зигугъу къышIырэ документхэм къащыдэлъытагъэр;

3) псэуалъэхэу, унэхэу, псэолъэныкъошIхэу амыгъэкощырэ мылъкумкIэ къэралыгъо реестрэ зыкIым зикъэбар итхэр ары. Кадастрэ IофшIэн игъэкIотыгъэхэр Адыгэ Республикэм ирес­публикэ бюджет имылъкукIэ агъэцэкIэщтых. НэмыкIэу къэпIон хъумэ, чIыгу Iахьхэр зиехэм ащ фэдэ IофшIэнхэм ыпкIэ лъатыщтэп.

Амыгъэкощырэ мылъкоу кадастрэ IофшIэн игъэкIотыгъэхэр зэрашIылIэщтхэр зиехэм фитыныгъэ яIэп ащ фэдэ IофшIэнхэм ягъэцэкIэн пэрыохъу фэхъунхэу. Кадастрэ IофшIэнхэр зыгъэца­кIэрэр амыгъэкощырэ мылъкоу зигугъу къэтшIыгъэхэм якIолIэн ылъэкIынэу амал рагъэгъотыныр ахэм япшъэрылъ.

Амыгъэкощырэ мылъкур зиехэм кадастрэ IофшIэнхэр зыгъэ­цакIэрэм яадрес ыкIи (е) яэлектрон почтэ иадрес IэкIагъэхьан алъэкIыщт. Амыгъэкощырэ мылъкоу учетым агъэуцугъэкIэ алъытагъэхэр, ау зи­къэбархэр ЕГРН-м имыхьагъэ­хэр е 1997-рэ илъэсым бэдзэ­огъум и 21-м аштэгъэ Федеральнэ законэу N 122-р зытетэу «Амыгъэкощырэ мылъкур зэряунаер къэзыушыхьатырэ тхылъыр регистрацие зэрашIырэм ехьы­лIагъ» зыфиIорэм джыри кIуачIэ имыIэзэ яунае хъугъэхэр, ау къэралыгъо учетым амыгъэуцугъэхэр зиIэхэм фитыныгъэ яI зигугъу къэтшIыгъэ амыгъэкощырэ мылъкур зэряер къэзыгъэшъыпкъэ­жьырэ документхэм якопиехэу зэрэгъэнэфэгъэ шIы­кIэм тетэу аIапэ зыкIэдзэжьыгъэхэр ара­хьы­лIэнэу. Кадастрэ IофшIэн игъэкIотыгъэхэр зыгъэ­цакIэрэм фитыныгъэ тхылъхэр регистрацие зышIырэ къулы­къум лъэIу тхылъхэр рихьылIэнхэ фае зигугъу къэтшIыгъэ псэуалъэхэм якъэбархэр, ахэр зиехэм яадрес ыкIи (е) яэлектрон почтэ иадрес амыгъэкощырэ мылъкумкIэ къэ­ра­лыгъо кадастрэм ратхэнхэм пае.

Кадастрэ IофшIэн игъэкIотыгъэхэр зэхащэхэзэ, чIыпIэм икартэ-план агъэхьазыры. ЧIыгу Iахьхэу, псэуалъэхэу, унэхэу, псэолъэныкъошIхэу кадастрэ IофшIэныр зыщыкIо­рэ чIыпIэм къыхиубытэ­хэрэм яхьылIэгъэ къэбархэу ЕГРН-м рагъэхьан фаехэр ащ итыщтых.

ЧIыгу Iахьым игъунапкъэхэр зынэсыхэрэм ахэплъэжьыхэ зыхъукIэ, ащ иинагъэу Федеральнэ законэу «Амыгъэкощырэ мылъкур къэралыгъо регистрацие зэрашIырэм ехьылIагъ» зыфиIорэм къыщыдэлъытэгъэ шапхъэхэм адиштэу агъэнэфагъэр:

— чIыгу Iахьэу зикъэбархэр ЕГРН-м итым нахьи проценти 10-кIэ нахь цIыкIу хъущтэп;

— чIыгу Iахьэу зикъэбархэр ЕГРН-м итым нахьи чIыгум епхыгъэ хэбзэгъэуцугъэм диштэу чIыгу Iахь анахь цIыкIу дэдэу агъэнэфагъэм нахьи нахь ин хъу хъущтэп.

ЧIыгу Iахьыр проценти 10-м ехъукIэ нахь цIыкIу хъугъэ зыхъукIэ, ащ фэдэ чIыгу Iахьым ехьылIэгъэ къэбархэр чIыпIэм икартэ-план зыратхэрэр чIыгу Iахьыр зиер кадастрэ IофшIэнхэм якIэуххэм зэрагъэрэзагъэм тхыгъэу къызезэгъыкIэ ары. Ащ къызэрезэгъырэр чIыпIэм икар­тэ-план игуадзэ гуалъхьэ.

Кадастрэ IофшIэн игъэкIотыгъэхэр агъэцакIэхэ зыхъукIэ, чIыгу Iахьхэм ягъунапкъэхэр зыдэщыIэхэмкIэ зэдегъэштэн Iофхэр зэшIозыхырэр зэгъэшIу комиссиер ары.

Амыгъэкощырэ мылъкоу кадастрэ IофшIэн игъэкIотыгъэхэр зэрашIылIэрэр зием игъоу зилъэ­гъукIэ, кадастрэ IофшIэнхэр зы­гъэцакIэрэм ыпкIэ аIимыхэу чIыпIэм икартэ-планым ипроектэу къагъэхьазырыгъэм диштэу чIыгу Iахьхэм ягъунапкъэхэр зынэсыхэрэр ригъэлъэгъунхэ фае.