ГъэпцIагъэкIэ къаIихыгъ
Социальнэ тыныр къызIэкIигъэхьанымкIэ бюджет ахъщэ зэритыгъугъэм ылъэныкъокIэ Адыгэ Республикэм щыпсэурэ бзылъфыгъэм къыфызэIуахыгъэ уголовнэ IофымкIэ унашъом кIуачIэ иIэ хъугъэ.
ЩынэгъончъэнымкIэ федеральнэ къулыкъум иIофышIэхэм зэрагъэунэфыгъэмкIэ, С. Н. Кушъум страховой тыныр къаIихыным фэшI УФ-м ПенсиехэмкIэ фондым и ГъэIорышIапIэу АР-м щыIэм Тэхъутэмыкъое районымкIэ иотдел сэкъатныгъэ зэриIэмкIэ документ нэпцIхэр ритыгъ, ащ къыхэкIэу сомэ мин 740-м ехъу хэбзэнчъэу къызIэкIигъэхьагъ.
ЩынэгъончъэнымкIэ федеральнэ къулыкъум къыгъэхьазырыгъэ материалхэмкIэ УФ-м и Следственнэ комитет иследственнэ ГъэIорышIапIэу АР-м щыIэм оперативнэ-лъыхъун Iофтхьабзэхэр зэрихьагъэх. Ащ зэфэхьысыжьэу фэхъугъэмкIэ, Инэм щыщ бзылъфыгъэу илъэс 46-рэ зыныбжьым гъэпцIэн бзэджэшIагъэ зэрэзэрихьагъэм фэшI уголовнэ Iоф къыфызэIуахыгъ.
Тэхъутэмыкъое район хьыкумым С. Н. Кушъум лажьэ иIэу ыгъэунэфыгъ, тазырэу сомэ мини 120-рэ тырилъхьагъ.
Ащ нэмыкIэу АР-м ипрокуратурэ даоу къытыгъэм къыпкъырыкIыхэзэ, С. Кушъум хэбзэнчъэу къаIихыгъэ ахъщэ тыныр къэралыгъом ифедэ хэлъэу къыIахыжьыгъ.
ЩынэгъончъэнымкIэ федеральнэ къулыкъум и ГъэIорышIапIэу АР-м щыIэм ипресс-къулыкъу.