Мэкъуогъум и 1-р — кIэлэцIыкIухэм якъэухъумэн и Дунэе маф
Адыгэ Республикэм щыпсэухэу лъытэныгъэ зыфэтшIыхэрэр!
[caption id="attachment_133606" align="aligncenter" width="800"] Сурэтыр: А.Гусев.[/caption]
Илъэс къэс гъэмафэм иапэрэ мафэ кIэлэцIыкIухэм якъэухъумэн и Дунэе мафэ хагъэунэфыкIы. Мы мэфэкIым гур къеIэты, уегъэчэфы, нахьыжъхэм джыри зэ агу къегъэкIыжьы кIэлэцIыкIухэм шIулъэгъурэ фэбагъэрэ зэрящыкIагъэр, ахэр къэухъумэгъэнхэ зэрэфаер.
КIэлэеджакIохэм ягъэмэфэ зыгъэпсэфыгъуи заублэрэр а мафэм тефэ. КIэлэцIыкIухэмкIэ ар зыгъэпсэфыгъо, агукIэ къыхахыгъэ, нахь зыфэщэгъэхэ Iофтхьабзэхэм зыщапылъхэрэ, гъэшIэгъоныбэ зыщызэхахырэ ыкIи зыщалъэгъурэ уахътэу щыт.
Нахьыжъхэм япшъэрылъыр кIэлэцIыкIу пэпчъ ыгукIэ нахь зыфэщагъэм лъыIэсынымкIэ амал рагъэгъотыныр, псауныгъэ пытэ яIэу, Iушыхэу, я Хэгъэгу шIу алъэгъоу къэтэджынхэмкIэ афэлъэкIыщтыр зэкIэ ашIэныр ары.
Къэралыгъо хабзэм икъулыкъухэм яIофшIэнкIэ анаIэ зытырагъэтыхэрэм ар ащыщ. Унагъом, кIэлэцIыкIухэм IэпыIэгъу ятыгъэным фытегъэпсыхьэгъэ федеральнэ ыкIи шъолъыр программэхэр Адыгеим щагъэцакIэх, унэгъо ныбжьыкIэхэм социальнэ IэпыIэгъу, субсидиехэр араты, кIэлэцIыкIухэм языгъэпсэфыгъо уахътэ тэрэзэу зэхэщэгъэным иIофыгъохэм адэлажьэх.
ТапэкIи сабыйхэр зэрыс унагъохэм IэпыIэгъу тафэхъущт, кIэлэцIыкIухэм япсауныгъэ игъэпытэн уахътэм диштэу зэхэщэгъэным тынаIэ тедгъэтыщт, шIэныгъэ куу ягъэгъотыгъэным тыдэлэжьэщт, спортым нахьыбэу ахэр хэщэгъэнхэм ыуж титыщт.
Мы мэфэкI шIагъом Адыгеим щыпсэурэ кIэлэцIыкIу пстэуми тыгу къыддеIэу тафэлаIо псауныгъэ пытэ яIэнэу, языгъэпсэфыгъо уахътэ дэгъоу агъэкIонэу, шIоу щыIэр зэкIэ къадэхъунэу!
Адыгэ Республикэм и ЛIышъхьэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр