Апэрэ каналым икъэтынэу «Поехали!» зы­фиIорэм изещакIохэу Мария Овсадникрэ Евгений Покровскэмрэ Адыгеим къэ­кIуа­гъэх, Урысыем иавтомобиль зекIо программэм изичэзыу едзыгъо мыщ щы­тырахыщт.

[caption id="attachment_133556" align="aligncenter" width="800"] Сурэтыр: Къэтынэу "Поехали!".[/caption]

Телеканал шъхьаIэм ижур­налист цIэрыIомэ зыгъэпсэфыгъо ямыIэу республикэм щы­лэжьэнхэ гухэлъыр зыдаIыгъ. Адыгеим изекIо чIыпIэ дахэхэм, икъушъхьэтхыхэм, ипсыхъо къаргъохэм, адыгэ лъэпкъым икультурэ, игушъхьэ баиныгъэ, ишэн-хабзэхэм, ишхыныгъохэм, нэмыкIхэм хэ­гъэгум щыпсэухэ­рэр щагъэгъо­зэщтых.

ЗэкIэми къашIэжьырэ автомобилэу «Поехали!» зыфиIорэ гущыIэхэр зытетхагъэм Адыгеим щыщхэмрэ ихьакIэхэмрэ поселкэу Каменномостскэм щыпэгъокIыгъэх. ТелезекIохэм яэкскурсие гъогу хахьэх псыхъоу Рыфабгъо ипсыкъефэххэр, Михайло-Афонскэ чылысым игъочIэгъхэу чIычIэгъ гъогухэм­кIэ зэтеутыгъэр, адыгэ къуаджэ­хэр, испунэхэр зыдэщыIэ чIыпIэхэр, илъэс мин пчъагъэхэр зыныбжь Iуашъхьэхэр.

Щынагъо зыхэлъ зекIо гъогухэми зещакIомэ ялIыгъэ ащаушэтыщт. Мариерэ Евгенийрэ къушъхьэ псы чъэрым къошъо­жъыехэмкIэ техьащтых, кIапсэм пышIагъэхэу Мышъэкъо къушъхьэ тIуакIэмэ азыфагу щыбыбыщтых, пэрыохъумэ, псынжъымэ ахэкIышъухэрэ автомобиль­хэмкIэ ыкIи квадроциклэхэмкIэ къачъыхьащт, джащ фэдэу Урысыем ианахь мэшIоку гъогу бгъузэм мэшIокумкIэ рычъэщтых.

Республикэм икъэлэ шъхьаIэу Мыекъуапи каналым исъемочнэ куп зыщигъэзыещтэп. Республикэ гупчэм — мэщытым, саугъэт зэхэтэу «ЗыкIыныгъэр ыкIи зэгурыIоныгъэр» зыфи­Iо­рэм, Мэздэхэ дэкIояпIэм адэжь къащакIухьанэу, Нэгыежъ Iуашъхьэ икъушъхьэтх зыщаплъы­хьа­нэу рахъухьэ.

— Адыгеир шъолъыр гъэшIэгъон, — къеIуатэ Мария Овсадник. — Республикэр зэ­рэ­дахэр ары зекIохэр ыкIи хьа­кIэхэр нахьыбэу къызкIебла­гъэхэрэр. Мэфэ заулэкIэ Темыр Кавказым идэхагъэ зэбгъэлъэгъун плъэкIыщт: къушъхьэ лъагэхэр, псыхъо бырсырхэр, къу­шъхьэтххэр, гъочIэгъхэр, шъоф зэикIхэр… Сабыйхэр зыпылъ унагъохэми, романтикхэми, ­щы­­нэгъо спортыр къыхэзы­хыхэрэми, тарихъыр зикIасэхэми Адыгеим зыщагъэпсэфыныр къякIущт. ТыдэгуIэ IофшIэныр едгъэжьэным, чIыпIэ дахэхэр зэдгъэлъэгъунхэм ыкIи цIыф гъэшIэгъонхэм таIукIэным. Къыт­пэгъокI, Адыгеир! Тэ тыкъэкIо!

Проектым фэгъэхьыгъэу гу­щыIэ заул. «Поехали!» зыцIэ тревел-шоур зэлъашIэгъэ къэтын. Урысыем ичIыпIэ зэфэшъхьафхэр къэпкIухьанэу уфаемэ, ар зекIо гъогум ухэзыщэщт лъэныкъоу бгъэфедэн плъэкIыщт. Мария Овсадникрэ Евгений Покровскэмрэ яавтомобиль исхэу зэрэхэгъэгоу къызэпа­кIухьэ. Ахэр ащыIэгъахэх Москва, Санкт-Петербург, Карелием, Татарстан, Башкирием, Ингушетием, Чэчэным, Дагъыстаным, Темыр Осетием, Къэ­бэртэе-Бэлъкъарым, Къэрэщэе­Щэрджэсым, Ставрополь краим, Ярославскэ, Новгородскэ, Владимирскэ, Ивановскэ, Нижегородскэ, Самарскэ, Саратовскэ, Волгоградскэ, Астраханскэ, Новосибирскэ, Тверской, Московскэ, Иркутскэ, Рязанскэ, Тульскэ, Воронеж хэкухэм ыкIи нэмыкIыбэм.