АР-м и ЛIышъхьэу КъумпIыл Мурат непэТэхъутэмыкъое районым щыIагъ, гурыт еджапIэхэм, IэзапIэм яшIын зынэсыгъэм зыщигъэгъозагъ.

[caption id="attachment_133512" align="aligncenter" width="800"] Сурэтыр: А. Гусев.[/caption]

Ащ игъусагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэ игуадзэу Къонэ Заур, АР-м гъэсэныгъэмрэ шIэныгъэм­рэкIэ иминистрэ ипшъэрылъхэр зыгъэцакIэу Евгений Лебедевыр, АР-м псэ­олъэ­шIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ игуадзэу Лафышъэ Рэмэзан, Тэхъутэмыкъое районым ипащэу Шъэо Аскэр, псэупIэхэм япащэхэр.

Гурыт еджапIэхэм яшIын

Гурыт еджэпIищмэ яшIын мыгъэ Тэхъутэмыкъое районым щаухыщт. КъэкIо­рэгъым Мые­къуапэ, Мыекъопэ, Тэхъутэмыкъое районхэм гурыт еджэпIищ къащызэIуахынэу рахъухьэ.

[caption id="attachment_133513" align="aligncenter" width="800"] Сурэтыр: А. Гусев.[/caption]

Къэлэ гъэпсыкIэ зиIэ поселкэу Яблоновскэр ары апэу къызыщыуцугъэхэр. Лъэпкъ про­ектэу «Гъэсэныгъэм» къыдыхэлъытэгъэ шъолъыр проектэу «Джырэ шапхъэхэм адиштэрэ гурыт еджапI» зыфиIорэм тетэу нэбгырэ 1100-мэ ателъытэгъэ гурыт еджэпIитIу мыщ щагъэпсы. Зыр къихьащт илъэсым, адрэр мыгъэ аухыщт. АР-м и ЛIышъхьэ псэолъэшIыпIэхэр къызэпиплъы­хьагъэх, IофшIэнэу зэшIуахы­хэрэм уасэ къафишIыгъ. Урамэу Заводскоим псэуа­лъэм ишIын щыфежьагъэх: пкъэухэр агъэуцугъэх, унэ лъапсэм игъэчъын зыфа­гъэхьазыры. 2024-рэ илъэ­сым ыкIэм ехъулIэу псэолъэшIыныр аухынэу ра­хъухьэ.

Яблоновскэм иурамэу Дорожнэм щашIырэ гурыт еджапIэр мы илъэсым итыгъэгъэзэ мазэ атын фае. Ар унитIоу зэхэтыщт: зыр ублэпIэ еджапIэм ще­джэхэрэм, адрэр нэмыкI классхэм атегъэпсыхьэгъэщт.

Проектым къызэрэщыдэлъытагъэмкIэ, актовэ зал, спортивнэ залитIурэ тренажерэ залрэ, шхапIэ, медпункт ащ хэтыщтых. Нэбгырэ 1100-мэ ателъытэгъэ гурыт еджапIэр къуаджэу АдыгеякIэми щагъэпсы. 2023-рэ илъэсым ыкIэм ехъулIэу ащ ишIын аухыщт. ПсэолъэшIхэм унэпкъхэр аIэты, инженер коммуникациехэр агъэпсых. Сомэ миллиард 1,3-м къыщегъэжьагъэу сомэ миллиард 1,5-м нэсэу псэолъэшIын IофшIэнхэм ате­фэщт.

[caption id="attachment_133515" align="aligncenter" width="800"] Сурэтыр: А. Гусев.[/caption]

Нэужым АР-м и ЛIышъхьэ нэбгырэ 250-мэ ателъытэгъэ гурыт еджапIэу къуаджэу Бжы­хьэкъоежъым щагъэпсырэм щы­Iагъ. Къатищэу зэтет унитIур къаIэтыгъах. Кабинетхэр, производственнэ мастерскойхэр, спорт, актовэ залхэр, кружок зэфэшъхьафхэм Iоф зыщашIэщт унэхэр, тхылъеджапIэр, шхапIэр, медицинэ пунктыр ахэм ахэтыщтых. Джащ фэдэу гурыт еджапIэм ищагу спорт джэгупIи, зыгъэпсэфыпIэ чIыпIи иIэщтых. ПстэумкIи псэуалъэм ишIын сомэ миллион 361,5-рэ фэдиз пэIуагъэхьащт. Мы илъэсым ыкIэм ехъулIэу IофшIэнхэр зэкIэ аухынэу псэолъэшIхэм къаIо. КъоджэдэсхэмкIэ ащ икъызэ­Iухын хъугъэ-шIэгъэшхоу хъущт. Сыда пIомэ джыдэдэм гурыт еджапIэр зычIэтыр я XX-рэ лIэшIэгъум иублэгъу агъэпсыгъэ­гъэ унэр ары.

УплъэкIунхэм якIэуххэм ате­тэу КъумпIыл Мурат АР-м гъэсэныгъэмрэ шIэныгъэмрэкIэ и Министерствэрэ муниципалитетымрэ япащэхэм пшъэрылъ заулэ афишIыгъ. Республикэм и ЛIышъхьэ зэрэхигъэунэфыкIыгъэмкIэ, псэолъэшIынымкIэ пIалъэхэр амыукъонхэм пхъашэу гъунэ лъафын, щагухэм язэтегъэпсыхьан анаIэ тырагъэтын, ищыкIэгъэ оборудованиемрэ мебелымрэ гурыт еджапIэм IэкIэгъэхьэгъэнхэм япхыгъэ Iофыгъохэм икъоу адэлэжьэнхэ фае. КIэлэегъэджэ коллективхэм язэхэщэнкIи, кIэлэеджакIохэм яегъэджэнкIэ, япIункIэ опытышIоу щыIэхэм якъызфэгъэфедэнкIи пшъэрылъ гъэнэфагъэ­хэр КъумпIыл Мурат афишIы­гъэх.

«ГъэсэныгъэмкIэ инфраструктурэр гъэкIэжьыгъэным, зы сменэкIэ кIэлэ­еджакIохэр егъэджэгъэнхэу хэгъэгум и Президент къыгъэуцугъэ пшъэрылъыр зэшIохыгъэным апае федеральнэ IэпыIэгъури, къэралыгъо программэхэри нахь шIуагъэ къатэу къызэрэзфэдгъэфедэщтхэм тыпылъ. Гурыт еджэпIи 4 Тэхъутэмыкъое районым зэрэщызэдагъэпсырэм ишIуагъэкIэ мы охътэ благъэм еджэпIэ чIыпIакIэхэр бэу щыIэхэ хъущтых. Гурыт еджапIэхэм ягъэцэкIэжьынкIэ «Единэ Россиер» кIэщакIо зыфэхъугъэ программэри щыIэныгъэм щыпхырытэщы. КIэлэцIыкIухэм яегъэджэнкIэ, гъэсэныгъэ, пIуныгъэ дэгъу ахэм ягъэгъотыгъэнымкIэ джырэ уахътэм диштэрэ амалхэр зетэхьэх», — къыIуагъ КъумпIыл Мурат.

[caption id="attachment_133516" align="aligncenter" width="800"] Сурэтыр: А. Гусев.[/caption]

ПсынкIэу хэхъоныгъэ зышIырэ Тэхъутэмыкъое районэу микрорайоныкIэхэр зыщагъэпсырэм гъэсэныгъэмкIэ псэолъа­кIэхэр зэрэщашIырэм мэхьанэшхо зэриIэр Адыгеим и ЛIышъхьэ къыхигъэщыгъ. Социальнэ инфраструктурэм игъэпсынкIэ республикэм ипащэ пшъэры­лъэу ышIыгъэр мыщ щагъэцакIэ.

«Тэ пшъэрылъ зыфэтшIыжьыгъ Яблоновскэм дэсхэм ящыIэкIэ-псэукIэ зыкъедгъэIэтынэу. Ащ фэдэ пшъэрылъыр зэрэд­гъэцакIэрэм, IофшIэным къыкIакIорэр цIыфхэм зэралъэгъурэм мэхьанэшхо яI. ГущыIэм пае, гурыт еджа­пIэхэр зэрэдгъэ­псыхэрэм ыкIи зэрэдгъэцэкIэжьыхэрэм анэмыкIэу инженер инфраструктурэми зетэгъэушъомбгъу. ГъэрекIо гъогуи 10 Яблоновскэм щагъэцэкIэжьыгъ. Мыгъэ сомэ миллион 360-рэ зытефэщт гъогуи 6 щагъэцэкIэжьыщт, псауныгъэр зыщагъэпытэрэ физкультурэ комплекси 2 щагъэпсыщт. Муниципалитет пстэуми социальнэ инфраструктурэм заще­гъэушъомбгъугъэнымкIэ Iофхэр лъыдгъэкIотэщтых», — къыIуагъ рес­публикэм ипащэ.

Псауныгъэм икъэухъумэн

[caption id="attachment_133517" align="aligncenter" width="800"] Сурэтыр: А. Гусев.[/caption]

КIэлэцIыкIухэмрэ зыныбжь икъугъэхэмрэ апае псэупIэу Инэм щашIырэ поликлиникэр псауныгъэм икъэухъумэнкIэ IэзапIэхэм ягъэкIэжьын епхыгъэ шъолъыр программэм тегъэ­псыхьагъэу ашIы. Сомэ миллион 380-рэ фэдиз ащ къы­фы­хагъэкIыгъ.

АР-м и ЛIышъхьэ псэолъэшIыныр зэрэкIорэм зыщигъэгъо­загъ, псэолъэшIхэм гущыIэгъу афэхъугъ. Проектым игъэцэкIэн зэрэкIорэм фэгъэхьыгъэу ахэм къаIотагъ. Шъугу къэтэгъэкIы­жьы: илъэсэу икIыгъэм квадрат метрэ 5135-рэ фэдиз хъурэ псэуалъэм ишIын рагъэжьагъ, ар илъэс заулэкIэ аухыным телъытагъ. НепэкIэ унэм ыпкъ игъэуцун епхыгъэ IофшIэнхэр макIох. Зы сменэм нэбгырэ 450-рэ фэдизмэ яфэIо-фашIэхэр ыгъэцэкIэнхэм поликлиникакIэр фытегъэпсыхьэгъэщт. Ащ терапевтхэм ыкIи педиатрхэм Iоф щашIэщт, рентгенологым, ультра­звуковой диагностикэм ыкIи нэмыкIхэм япхыгъэ кабинетхэр къащызэIуахыщтых.

«ПоликлиникакIэм ишIын псауныгъэм икъэухъумэн ипэублэ звенэ игъэкIэ­жьынкIэ мэхьанэшхо зиIэ лъэбэкъоу щыт. Медицинэ учреждениякIэм изэте­гъэпсыхьан мэхьанэшхо иI медицинэм ылъэныкъокIэ цIыфхэм яфэIо-фашIэхэр дэгъоу ыкIи игъом зэшIохыгъэ хъунхэмкIэ. Ащ пае поликлиникэм Iоф щызышIэщтхэм, джырэ уахътэм диштэрэ оборудованиемкIэ зэтегъэ­псыхьэгъэным яIофыгъо­хэм икъоу ягупшысэгъэн фае. ЧIыпIэу къыпэIулъыщтыри зэтегъэпсыхьэ­гъэным епхыгъэ Iофтхьабзэхэр къыдэлъытэгъэнхэ фае», — къыхигъэщыгъ КъумпIыл Мурат.

Ащ нэмыкIэу республикэм и ЛIышъхьэ муниципалитетымрэ АР-м псауныгъэм икъэухъумэнкIэ и Министерствэрэ япащэхэм пшъэрылъ афишIыгъ социальнэ мэхьанэ зиIэ псэуа­лъэм ишIын шапхъэу щыIэхэм адиштэу щытыным ыкIи ипIа­лъэм ар ухыгъэ хъуным тэрэзэу лъыплъэнхэу. Поликлиникэхэм ягъэкIэжьын, язэтегъэпсыхьан Урысые Федерацием и Президент къыгъэуцугъэ пшъэрылъхэм язэшIохынкIэ мэхьанэшхо зэря­Iэр ащ къыхигъэщыгъ.

АР-м и ЛIышъхьэ ипресс-къулыкъу