Мыекъуапэ иурамэу Красногвардейскэм иIахьэу Хьахъуратэм ыцIэ зыхьырэмрэ Курган­нэмрэ азыфагу къыриубытэрэм иавтомобиль гъогу игъэцэкIэжьын ыкIэм рафылIагъ.

ЦIыфхэр къыкIэлъэIугъэхэу ар лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу агъэ­кIэжьыщтхэм ахагъэуцогъагъ.

Къэлэ администрацием исоциальнэ интернет нэкIубгъохэм ащыщ къызэрэратхэгъагъэмкIэ, ермэлыкъэу зыгъэ­псэфыгъо мафэхэм зэхащэхэрэм екIо­лIэщтхэми, кIэлэцIыкIу IыгъыпIэм сабый­хэр ащэхэми, мы гъогур бэрэ агъэфедэ, ау асфальтэу телъыри, лъэс­рыкIо гъогоу иIэри зэрэзэхэтэкъуагъэ­хэм къыхэкIыкIэ ущызекIоныр къин хъугъэ.

Администрацием джэуапэу аритыжьыгъэм итхэгъагъ лъэпкъ проектым къыдыхэлъытагъэу агъэцэкIэжьыщтхэм зэрахагъэуцуагъэр, 2024-рэ илъэсыр пIалъэу зэриIэр, ау федеральнэ IэпыIэгъум ишIуагъэкIэ, ыпэ итхэу IофшIэнхэр зэрэзэшIуахыщтхэр. ГъогушI хъызмэтшIапIэу «Бак-строй» зыфиIорэм зэригъэкIэжьыщтыми, пстэумкIи метрэ 570-рэ ар зэрэхъурэми, сомэ миллион 19-рэ мини 161-м ехъу зэрэпэIухьащтыми къэлэдэсхэр щагъэгъозагъэх, мы илъэсым иIоныгъо мазэ и 1-м нэс аухынэу ары къызэрэщиIощтыгъэр.

Арэу щытми, а пIалъэри къызэкIэхьагъэ хъугъэ. Автомобильхэр зэрыкIохэрэм имызакъоу, лъэсрыкIо гъогури агъэ­кIэжьыгъ, зекIоныр къин къызщыхъу­хэрэм ящыкIагъэхэри фашIыгъэх, гъогу тамыгъэхэр агъэтхъыгъэх.

Асфальтэу тыралъхьагъэр шапхъэхэм адиштэу шIыгъэмэ, охътэ благъэм гъогу лабораторием ыуплъэкIущт.

Сурэтыр: «Адыгеяавтодор»