Дунэе фестивалым хэлэжьагъэх
Спорт программированиемкIэ апэрэу Урысыем дунэе зэнэкъокъухэр щызэхащагъэх, ащ фестивалэу «Дунаим икодкIэ» еджагъэх.
Лъэпкъ проектэу «Демографием» хэхьэрэ федеральнэ проектэу «Спортыр — щыIэныгъэм ишапхъ» зыфиIорэм ар къыдыхэлъытагъ, къалэу Грознэм жъоныгъуакIэм и 24-м къыщегъэжьагъэу и 28-м нэс щырагъэкIокIыгъ. ШIухьафтын фондыр сомэ миллиони 3,5-рэ мэхъу.
Урысыем, Белоруссием, Казахстан, Таджикистан, Армением, Мали, Оман, Узбекистан, Къыблэ Осетием, Палестинэм, Мысырым къарыкIыгъэ спортсмен 300 зэнэкъокъум хэлэжьагъэх. Адыгеир ащ къыщызгъэлъэгъуагъэр Адыгэ къэралыгъо университетым истудент нэбгыри 6.
Фестивалым лъэныкъуитIукIэ щызэнэкъокъугъэх: алгоритмическэ программированиер ыкIи шIуагъэ къэзытырэ программированиер («Хакатон»). Ащ фэшъхьафэу компьютернэ спортымкIэ, джащ фэдэу дронрейсингымкIэ яшIэныгъэхэр аушэтыгъэх.
Адыгэ къэралыгъо университетым икомандэ спорт программированиемкIэ Къыблэ Урысыем истуденческэ командэхэм анахь лъэшэу сыдигъуи зыкъегъэлъагъо. Аужырэ илъэситфыр пштэмэ, ар ренэу апэ итхэм ащыщыгъ, ICPC-м истудентхэм азыфагу щыIэгъэ дунэе зэнэкъокъум зыхэлажьэм финалым благъэу екIолIэгъагъ, финал ныкъом гъогогъуихэ ихьэгъагъ. Хьисапымрэ компьютернэ шIэныгъэхэмрэкIэ АКъУ-м ифакультет хьисапымкIэ, къэбар технологиехэмкIэ ыкIи къэбар щынэгъончъэнымкIэ икафедрэ ипащэу Алый Мурат ары командэм итренерыр.
Адыгэ къэралыгъо университетым ипресс-къулыкъу