Мы лъэхъаным Мыекъуапэ ичIыпIэ зэфэ­шъхьафхэм ащыIэ унэ зэтетхэм ащыщхэм псы стырыр къаIэ­кIахьэрэп. Ар зыфэгъэхьыгъэр къа­лэм дэт гъэфэбапIэхэм ягъэцэкIэжьын зэрэра­гъэжьагъэр ары.

Илъэс къэс бжыхьэр къэмысызэ къалэм иинженер инфраструктурэ изытет ауплъэкIуныр хабзэ хъугъэ. ГъэцэкIэжьын Iоф­шIэнхэр рагъэжьэгъахэх, ахэр зэрэкIохэрэр Мыекъуапэ имэрэу Геннадий Митрофановым ышъхьэкIэ ыуплъэкIугъэх.

Мы лъэхъаным гъэфэбэпIэ 43-у къалэм дэтхэм ащыщэу 3-м Iоф ашIэрэп. Псы стырыр зэрэзэпагъэущтымкIэ пэшIорыгъэшъэу къэлэдэсхэм макъэ арагъэIугъ. ГъэфэбапIэхэм ачIэт хьакушхо­хэм кIымэфэ лъэхъаным зэпымыоу Iоф ашIэным пае ахэм пкъыгъо къутагъэхэр ахэлъмэ зэблахъух, гъэцэкIэжьынхэр лъагъэкIуатэх.

Предприятиеу «Майкопские тепловые сети» зыфиIорэм иинженер шъхьаIэу И. Скрипниченкэм къызэриIорэмкIэ, непэ къэлэ­дэс мин 25-рэ фэдизмэ псы фабэ яIэп. ЦIыфхэм къагурэIо гъэ­мафэм псырыкIуапIэхэр зэтырамыгъэпсыхьажьыхэмэ, кIымафэм япсэупIэхэр икъоу къызэрамыгъэфэбэшъущтхэр.

КъалэмкIэ къэбарышIухэм ащыщ коммунальнэ инфраструктурэр гъэкIэжьыгъэным фэгъэхьыгъэ къэралыгъо программэм Мыекъуа­пэ зэрэхагъэуцуагъэр. Тызыхэт илъэсым псырыкIопIэ километрэ 11-рэ, къэкIорэ илъэсым километрэ 27-рэ агъэкIэжьыщт. Джащ фэдэу «Майкопские тепловые сети» зыфиIорэр федеральнэ программэм зэрэхагъэхьащтым пащэхэм Iоф дашIэ.

Шъаукъо Аслъангуащ.