«Уигухэлъ щыIэныгъэм щыпхырыщ» зыфиIорэ ныбжьыкIэ проектхэм я Урысые зэнэкъокъу Адыгеим щызэфахьысыжьыгъ.

Ар зыгъэпсэфыпIэу «Лагъонакъэ» ипроект офис ыгъэнэфэгъэ хэушъхьафыкIыгъэ лъэныкъоу «ЗекIо зыпкъитыныгъ» зыфиIорэм къыдыхэлъытагъэу рагъэкIокIыгъ.

Адыгэ Республикэм ишъолъыр щагъэцэкIэщт зыгъэпсэфыпIэу «Лэгъонакъэм» хэхъоныгъэ езыгъэшIыщтхэр къыдэлъытэгъэныр, итарихъ-культурэ кIэн къэгъэгъу­нэгъэныр зэнэкъокъум ипшъэрылъ шъхьаIэхэм ащыщыгъ.

Адыгеим истудентхэм къагъэлъэгъогъэ проектищмэ текIоны­гъэр къыдахыгъ. Ящэнэрэ чIыпIэр зыубытыгъэр проектэу экологическэ лъэсрыкIо гъогоу «Адыгэмэ ялъэуж утетэу» зыфиIорэр ары. Ар лъэныкъуитIоу зэтеутыгъ: апэ­рэр чIыопсым идэхагъэ ухэплъэныр, ащ зыщыбгъэпсэфыным фытегъэпсыхьагъ, ятIонэрэр экскурсиеу гъэпсыгъэщт, адыгэ тхыдэхэр, лъэпкъым итарихъ, ишэн-хабзэхэм якъэIотэн къыдыхэлъы­тагъ. ЛъэсрыкIо гъогум икIэухыщтыр «Адыгэ къэлэжъыер» ары. А чIы­пIэм зыщыбгъэпсэфышъущт, суве­нир тучанхэр, лъэпкъ шхыныгъомэ уазщыхэIэн плъэкIыщт шхапIэхэр щыIэщтых. Авторхэм пэшIорыгъэ­шъэу сувенир продукциер ыкIи шхыныгъохэр зыфэдэщтхэр зэ­хагъэуцуагъэх. ЯтIонэрэ чIыпIэр зыубытыгъэ командэм ыпэрапшIэу Адыгеим зекIоным ихэхъоныгъэ епхыгъэ предложениемэ ахэп­лъагъ, зэфихьысыжьыгъэх. Ащ къыхэкIэу агу къэкIыгъ экскурсионнэ-музейнэ комплексэу «ЭтноАулит» зыцIэр зэхащэнэу, ащ адыгэ лъэпкъхэр пчъагъэу зэрэ­хъухэрэм елъытыгъэу чIыпIэ 12 къыхахыгъ. Апэрэ чIыпIэр — хьа­кIэщыр ары. Ар унэшхоу щытыщт, экскурсием хэхьэрэ купыр чIэ­фэнэу, зыушэтынхэр, мастер-классхэр афызэхащэнхэр, сувенирхэм ящэн къыхеубытэх. ЗекIомэ зы мафэр хьакIэщым щагъэкIон алъэ­кIыщт.

ТекIоныгъэр къыдэзыхыгъэ командэм къыгъэлъэгъогъэ проек­тыр гъэшIэгъоны, ар Лагъонакъэ икъушъхьэтх щызэхащэнэу гъэпсыгъэ, экологием зэрар къызфимыхьырэ лъэсрыкIо гъогоу «Прометей игъогукIэ» зэджагъэхэр ары. Гупшысэу проектым халъхьагъэр нартмэ яэпос гъогум щыпхыращыныр, псэушъхьэхэм, къэкIыхэрэм, Лагъонакъэ икъу­шъхьэтх, икъушъхьэ кIыIу, гео­логием язэгъэшIэн.

— ОсэшIмэ ашIогъэшIэгъон хъугъэр проектхэр зэрагъэкIэ­рэкIэгъэ шIыкIэр ары — «мыжъо хъокIыгъэм» фэдэу гъэпсыгъэхэу, къэбархэр ащ тетхагъэу шIыгъагъэх. Къушъхьэ чIыопсым ухэтэу узекIо зыхъурэм, ащ фэдэ шIыкIэр Iэрыфэгъу мэхъу. ЛъэсрыкIо гъо­гуитIум язырэм километри 7 икIы­хьагъ, ар псауныгъэ пытэ зиIэ цIыфхэр ары зыкIушъущтхэр. Лъэ­сэу зекIохэрэмкIи, кушъхьэфачъэр е лыжэхэр зыгъэфедэхэрэмкIи гъогур дэеп, — къыщыхагъэ­щыгъ АР-м зекIонымкIэ ыкIи зыгъэпсэфыпIэхэмкIэ и Ко­митет.

Зэнэкъокъум хэлэжьагъэхэм зэкIэми шIухьафтынхэр араты­гъэх. ТекIоныгъэр къыдэзыхыгъэхэр «Красная поляна» зыфиIорэ зыгъэпсэфыпIэм шышъхьэIу мазэм рагъэблэгъэщтых ыкIи тхьамафэм къыкIоцI зекIон Iофхэм афагъэсэщтых.