Республикэм и ЛIышъхьэу КъумпIыл Мурат тхьамэтагъор дызэрихьэзэ Адыгеим и Правительствэ иунэ непэ щыкIогъэ зэIукIэр зыфэгъэхьыгъагъэр ощхышхохэм апкъ къикIэу Кощхьэблэ ыкIи Мыекъопэ районхэм зэрарэу ахьыгъэм идэгъэзыжьын иIофыгъохэр ары.

Ащ хэлэжьагъэх ошIэ-дэмышIэ IофхэмкIэ Министерствэм и ГъэIорышIапIэу Адыгэ Республикэм щыIэм ипащэу Станислав Илющенкэр, Адыгэ Респуб­ликэм ошIэ-дэмышIэ IофхэмкIэ ыкIи цIыфхэр къэухъумэгъэнхэмкIэ и Комитет итхьаматэу Вячеслав Лотаковыр, АР-м финансхэмкIэ иминистрэу Виктор Орловыр, Кощхьэблэ ыкIи Мыекъопэ районхэм япащэхэу Хьамырзэ Зауррэ Михаил Марьинымрэ.

Шъугу къэтэгъэкIыжьы: ощхышхохэм апкъ къикIэу Кощхьэблэ рйоным жъоныгъуакIэм и 26-м унэ ыкIи ахэм къапэIулъ чIыпIэ шъэ пчъагъэмэ псыр къакIэуагъ. Ащ ыпэкIэ, жъоныгъуакIэм и 24-м, Мыекъопэ районым ипсэупIэхэм джащ фэдэу утынышхо ахьыгъ – муниципалитетым ошъушхо къыщехыгъ.

Кощхьэблэ районым ипащэу Хьамыр­зэ Заур къызэрэхигъэщыгъэмкIэ, къуа­джэу Фэдз, къутырэу Кармолино-Гидроицкэм, селоу Вольнэм яхэтэ ыкIи ящагу 699-мэ, псэупIэ 58-мэ псыр акIэхьагъ. Районым иадминистрацие зэрар зыхьыгъэ чIыпIэхэм ащыпсэухэрэм псэу зэшъощтхэр аIэкIагъахьэщтыгъ. ПстэумкIи литрэ тфырытф зэрыфэрэ псы бэшэрэб 5400-рэ (тонн 27-рэ) къа­фащагъ. Къуаджэм ипсырыкIуапIэ хлоркэ халъхьагъ, дезинфекцие ашIыгъ. Анахьэу хагъэунэфыкIыгъэр социальнэ псэуалъэхэм зэрар зэрамыхьыгъэр ары. Районым иадминистрацие зэрарэу ахьыгъэм епхыгъэ спискэм изэхэгъэуцонкIэ комиссием иIофшIэн зэхищагъ.

Кощхьэблэ районым зыпкъ игъэуцожьын IофшIэнхэм анахьыбэр щызэшIуа­хыгъах. ОшIэ-дэмышIэ IофхэмкIэ Министерствэм республикэмкIэ и Гъэ­Iо­ры­шIапIэ ипащэу Станислав Илющенкэм къызэриIуагъэмкIэ, чIыпIэ 98-мэ: чIыунэхэмрэ щагухэмрэ псыр къачIащыгъ, щагу пшIы пчъагъэмэ яукъэбзыжьынкIэ унагъохэм IэпыIэгъу аратыгъ, гъогухэм япхыгъэ къулыкъухэм джащ фэдэу укъэ­бзын IофшIэнхэр зэшIуахыгъэх.

Адыгэ РеспубликэмкIэ Роспотребнадзорым иIофышIэхэм, псэушъхьэхэм ыкIи псыкъэкIуапIэхэм якъэухъумэнкIэ ГъэIоры­шIапIэм, АР-м къэбзэныгъэмкIэ ыкIи эпидемиологиемкIэ и Гупчэ Iофхэм язытет икъоу зыщагъэгъозагъ. Станислав Илющенкэм къызэриIуагъэмкIэ, IофшIэнхэм азыныкъо нахьыбэр агъэцэкIэгъах, пшъэдэкIыжь зыхьырэ къулыкъухэм лъэIу тхылъхэу къашIыгъэхэмкIэ Iоф­тхьэбзэ заулэ джыри зэшIуахын ыкIи ощхыпсхэр зэрылъадэхэрэм яукъэбзын аухын фае.

Адыгэ Республикэм цIыфхэм якъэухъу­мэнкIэ ыкIи ошIэ-дэмышIэ IофхэмкIэ и Комитет итхьаматэу Вячеслав Лотаковым къызэриIуагъэмкIэ, республикэм имуниципалитет зэфэшъхьафхэм ятехникэ 12 зыуж итыгъэр къуаджэу Фэдз псыр дэщыгъэныр ары.

Джащ фэдэу ошъушхо къызэрехыгъэм къыхэкIэу Мыекъопэ районым ицIыф псэупIэхэм ыкIи имэкъумэщ лэжьэкIу­пIэхэм зэрар ахьыгъ. Район администрацием ипащэу Михаил Марьиным къызэриIуагъэмкIэ, къутырэу Шунтукрэ станицэу Кужорскэмрэ яуни 6-мэ яунашъхьэ зэщыкъуагъэ хъугъэ. Мы псэупIэ дэдэхэм яхэтэ 20-мэ ошъум зэрар арихыгъ.

Адыгеим и ЛIышъхьэ унашъо ышIыгъ Кощхьэблэ ыкIи Мыекъопэ районхэм яцIыф псэупIэхэм адэсхэу зэрар зыхьыгъэхэм мылъку IэпыIэгъу ятыгъэным пае АР-м иминистрэхэм я Кабинет иIэпэчIэгъэнэ фонд ахъщэ къыхагъэкIынэу. ГущыIэм пае, КъумпIыл Мурат унашъоу ышIыгъэм тетэу Кощхьэблэ районымкIэ хатэхэмрэ щагухэмрэ зиунэе нэбгырэ 699-мэ сомэ мин 20 зырыз, зиунэ псыр ихьэгъэ унэгъо 58-мэ сомэ 50 зырыз аратыщт. Джащ фэдэу Мыкъопэ районым щыпсэухэрэм ащыщхэу зихатэхэм псыр къызкIэогъэ нэбгырэ 20-мэ сомэ мин 20 зырыз аратыщт, зиунашъхьэ зэщыкъогъэ унэгъуи 6-мэ сомэ мин 50 зырыз аIэкIагъэхьащт.

«ПIэлъэ анахь кIэкI дэдэхэм къакIоцI ищыкIэгъэ Iофтхьабзэхэр зэкIэ зэшIохыгъэ хъунхэ фае. Непэ унашъохэм такIэтхагъэмэ, неущ муниципалитетхэм яадминистрациехэр ахъщэ зытефэхэрэм аIэкIэгъэхьэгъэным иIоф фежьэнхэ фае», — къыIуагъ Адыгеим и ЛIышъхьэу КъумпIыл Мурат.

ЗэIукIэм икIэухым КъумпIыл Мурат пшъэдэкIыжь зыхьырэ ведомствэ заулэмэ пшъэрылъхэр афишIыгъэх. Ахэр зыфэгъэхьыгъэхэр псыр къакIэмыоным епхыгъэ Iофтхьабзэхэр зэшIохыгъэнхэр, цIыфхэм IэпыIэгъу ятыгъэныр, зэрар зыхьыгъэ псэупIэхэм а гумэкIыгъоу къыкъокIыгъэм икIэуххэр дэгъэзыжьы­гъэнхэмкIэ яшIуагъэ арагъэкIыныр ары.

АР-м и ЛIышъхьэ ипресс-къулыкъу