Адыгеим и ЛIышъхьэу КъумпIыл Мурат Урысые Iофтхьабзэу «Прогулка со Знанием» зыфиIо­рэм хэлэ­жьагъ. Урысые обществэу «ШIэны­гъэр» кIэщакIо зыфэхъугъэ Iоф­тхьабзэр федеральнэ просветительскэ марафонэу «Знание. Первые» зыфи­Iорэм къыдыхэлъытагъэу зэхащэ.

[caption id="attachment_133414" align="aligncenter" width="800"] Сурэтыр: А. Гусев.[/caption]

Тихэгъэгу ишъолъырхэм япащэхэмрэ дэгъоу еджэрэ кIэлэеджакIохэм, студентхэм ащыщхэмрэ экскурсие зэдакIох. Пащэхэм кIэлэцIыкIухэр лъэгъупхъэ чIыпIэхэм нэIуасэ афашIых. Адыгеим гъэхъагъэу иIэхэм, Урысыем ихэхъоныгъэ ащ иIахьэу хишIыхьагъэм афэгъэ­хьыгъэу къафаIуатэ.

Адыгеим икIэлэеджакIохэу Iофтхьабзэу «Прогулка со Знанием» зыфиIорэм хэлэжьагъэхэр урысые олимпиадэхэм щатекIуагъэхэр, шIухьафтынхэр къащызыхьыгъэхэр, интеллектуальнэ, творческэ, спорт зэнэкъокъухэм щатекIуагъэхэр ары.

Республикэм и ЛIышъхьэ Адыгэ Рес­публикэм и Къэралыгъо филармоние къыпэблэгъэ скверэу агъэкIэжьыгъэм ныбжьыкIэ сэнаущхэм щаIукIагъ. Iоф­тхьабзэм джащ фэдэу хэлэжьагъэх АР-м гъэсэныгъэмрэ шIэныгъэмрэкIэ иминистрэ ипшъэрылъхэр зыгъэцакIэу Евгений Лебедевыр, Мыекъопэ къэралыгъо тех­нологическэ университетым иректорэу Къуижъ Саидэ, Адыгэ Республикэм ныбжьыкIэхэм яIофхэмкIэ и Комитет итхьаматэу Максим Галушкиныр, кIэлэцIыкIу сэнаущхэр къыхэзгъэщырэ ыкIи IэпыIэгъу афэхъурэ шъолъыр гупчэу «Полярис — Адыгея» ипащэу Роман Чумаковыр.

КъумпIыл Мурат республикэм хэхъоныгъэ егъэшIыгъэнымкIэ, гъэсэныгъэм зегъэушъомбгъугъэ­нымкIэ, IэпэIэсэныгъэшхо зы­хэлъ IофышIэхэу лъэныкъо зэфэшъхьафхэм Iоф ащызышIэщтхэм ягъэхьазырынкIэ Iофэу ашIэрэр ныбжьыкIэхэм къафиIотагъ.

«Мы аужырэ илъэсхэм тиреспубликэ итеплъэ нахьышIум ылъэныкъокIэ зызэрэзэрихъо­кIырэм гу лъышъутагъэщтын. Инфраструктурэр зэрагъэкIэ­жьырэм, бизнесым IэпыIэгъу зэрэфэхъухэрэм, энергетикэми, нэмыкI лъэныкъохэми проектышхохэр зэращагъэцакIэхэрэм ар афэгъэхьыгъ. Индустриальнэ паркыр Тэхъу­тэмыкъое районым щыгъэпсыгъэным, зыгъэпсэфыпIэу «Лэгъонакъэм» ишIын япхыгъэ инвестиционнэ проект инхэри щыIэныгъэм щыпхырытэщых. А пстэури экономикэм хэхъоныгъэ ышIыным фэIорышIэ. АмалыкIэу щыIэхэр къыз­фэдгъэфедэхэзэ, социальнэ лъэ­ныкъомкIи Iофхэм язытет нахьышIу тшIыщт, щыIэ­кIэ-псэукIэм зыкъедгъэIэтыщт цIыф пэпчъ иамалхэм зыкъызэIуа­ригъэхыным пае», — къы­Iуагъ Адыгеим и ЛIышъхьэ.

Республикэм ипащэ зэрэхигъэунэфыкIыгъэмкIэ, сыд фэдэрэ лъэныкъокIи анахьэу уасэ зыфашIырэр IэпэIэсэныгъэшхо зыхэлъ IофышIэхэр ары. Ахэм ягъэхьазырын гурыт еджапIэм щырагъажьэ, кIэлэцIыкIу сэнаущхэм IэпыIэгъу зэрафэхъухэрэ системэ дэгъу республикэм щызэхащагъ. ГущыIэм пае, кIэ­лэцIыкIу сэнаущхэр къыхэзгъэщырэ, IэпыIэгъу афэхъурэ шъо­лъыр гупчэу «Полярис — Адыгея», технопаркэу «Кванториум», кIэлэцIыкIухэр цифрэ технологиехэм афэзыгъэсэрэ Гупчэу «IТ-куб», гъэсэныгъэмкIэ гупчэхэу «Точка роста» зыфиIохэрэр зэхащагъэх. Адыгеим икIэлэцIыкIухэм амал яI респуб­ликэ естественнэ-хьисап еджапIэм пэIудзыгъэу щеджэнхэу.

КIэлэцIыкIухэм упчIэхэр Адыгеим и ЛIышъхьэ ратыгъэх, гъэхъагъэу, гухэлъэу яIэхэмкIэ ащ дэгощагъэх. Гуманитар лъэ­ныкъомкIэ гъэсэныгъэ тедзэм зырагъэушъомбгъун зэралъэкIыщтым, кIэлэеджакIохэм атегъэ­псыхьэгъэ урысые, шъолъыр Iофтхьабзэхэр нахьыбэу Адыгеим щызэхащэнхэмкIэ, адыгабзэм икъэухъумэнкIэ амалэу щыIэхэм кIэлэеджакIохэр къа­кIэупчIагъэх.

Урысые олимпиадэхэмрэ зэнэкъокъухэмрэ щатекIуагъэ­хэр къэзыгъэхьазырыгъэ кIэлэегъа­джэхэми IэпыIэгъу ятыгъэн зэрэфаем шъхьафэу зэIу­кIэм щытегущыIагъэх. Джащ фэдэу сэнэхьатхэм якъыхэ­хынкIэ гурыт еджапIэхэм Iоф­тхьабзэу щызэрахьэхэрэм, Урысыем иапшъэрэ еджэпIэ пэрытхэм зэращырагъа­джэхэрэм япхыгъэ Iофыгъохэми алъыIэсыгъэх.

«Тиреспубликэ хэхъоныгъэ езыгъэшIыщт сыд фэдэрэ гукъэкI­хэми къадедгъэштэным тыфэхьазыр. Мыщ фэдэ IофыгъохэмкIэ ныбжьыкIэхэм еплъы­кIэу яIэм мэхьанэшхо етэты. Непэрэ зэIукIэхэм афэдэхэр чIыпIэ зэфэшъхьафхэм бэрэ ащызэхэтэщэ. ГущыIэм пае, ныбжьыкIэхэм язэхахьэу «Фыщт» зыфиIорэр илъэс къэс зэхэтэщэ. НыбжьыкIэхэм яуп­чIэхэр республикэм иминистерствэхэмрэ иведомствэхэмрэ япащэхэм араты. Шъори ащ фэдэ Iофтхьабзэм шъукъыхэлэжьэнэу шъукъесэгъэблагъэ», — къыIуагъ АР-м и ЛIышъхьэ.

КъумпIыл Мурат кIэлэеджа­кIохэм яупчIэхэм джэуапхэр къаритыжьыгъ, пащэм АР-м гъэсэныгъэмрэ шIэныгъэмрэкIэ и Министерствэ пшъэрылъ фишIыгъ къэлэеджэкIо сэнаущ­хэм ягукъэкIхэм япхырыщынкIэ ипредложениехэр къыхьынхэу.

АР-м и ЛIышъхьэ ипресс-къулыкъу